அதிமுகவில் இருந்து தமிழக வெற்றிக் கழகத்தில் இணைந்த முன்னாள் அமைச்சர் சி. விஜயபாஸ்கருக்கு புதுக்கோட்டை மாவட்ட தவெக அமைப்புச் செயலாளர் பதவி வழங்கப்பட்டுள்ளது. ஆனால், அவர் எதிர்பார்த்தது மாநில அளவிலான முக்கியப் பதவி என்பதால், இந்த நியமனம் அவருக்கு ஏமாற்றத்தை ஏற்படுத்தியுள்ளதாக அவரது ஆதரவாளர்கள் தரப்பில் கூறப்படுகிறது.

அதிமுகவில் இருந்து தவெகவுக்கு வந்த முன்னாள் அமைச்சர்கள் மற்றும் முக்கிய நிர்வாகிகளுக்கு சமீபத்தில் கட்சிப் பொறுப்புகள் அறிவிக்கப்பட்டன. இதில் புதுக்கோட்டை முன்னாள் அமைச்சர் சி. விஜயபாஸ்கருக்கு மாவட்ட அமைப்புச் செயலாளர் பதவி வழங்கப்பட்டது.

ஆனால், தவெகவில் இணைந்த பின்னர் நீண்ட நாட்களாக எந்தப் பொறுப்பும் வழங்கப்படாமல் காத்திருந்த விஜயபாஸ்கர், கட்சியின் பொதுச்செயலாளரும் அமைச்சருமான புஸ்ஸி ஆனந்தை பலமுறை சந்தித்து தனது எதிர்பார்ப்புகளை தெரிவித்ததாக அவரது ஆதரவாளர்கள் கூறுகின்றனர்.

அப்போது, கட்சியின் இணைப் பொதுச்செயலாளர் போன்ற மாநில அளவிலான முக்கியப் பதவி தனக்கு வழங்கப்பட்டால், கட்சிக்கு முழுமையாகப் பணியாற்ற தயாராக இருப்பதாக விஜயபாஸ்கர் தெரிவித்ததாகவும் கூறப்படுகிறது.

குறிப்பாக, அதிமுகவில் இருந்து வெளியேறி தவெகவில் இணைந்ததற்கு அரசியல் முக்கியத்துவம் கிடைக்கும் வகையில் பெரிய பொறுப்பு வழங்கப்பட வேண்டும் என அவர் எதிர்பார்த்ததாக அவரது ஆதரவாளர்கள் தெரிவிக்கின்றனர்.

இதற்கிடையே, நீண்ட காலமாக பதவி கிடைக்காமல் இருப்பதால் தன்னை நம்பி தவெகவில் வந்தவர்கள் கேள்வி எழுப்புவதாகவும், முதல்வர் விஜய்யை சந்திக்க முயன்றும் முடியவில்லை என்றும் விஜயபாஸ்கர் தனது ஆதங்கத்தை புஸ்ஸி ஆனந்திடம் வெளிப்படுத்தியதாக கூறப்படுகிறது.

இதையடுத்து இந்த விவகாரம் விஜய்யின் கவனத்திற்கு கொண்டு செல்லப்பட்டதாகவும், அதன்பிறகு அதிமுகவில் இருந்து தவெகவுக்கு வந்த முக்கிய தலைவர்களுக்கு என்னென்ன பொறுப்புகளை வழங்குவது என்பது குறித்து ஆலோசனை நடைபெற்றதாகவும் தகவல்கள் தெரிவிக்கின்றன.அதன் தொடர்ச்சியாகவே சி. விஜயபாஸ்கருக்கு புதுக்கோட்டை மாவட்ட அமைப்புச் செயலாளர் பதவி வழங்கப்பட்டதாக கூறப்படுகிறது.

எனினும், மாவட்ட அளவிலான பதவி கிடைத்திருப்பது விஜயபாஸ்கருக்கு ஏமாற்றத்தை ஏற்படுத்தியுள்ளதாக அவரது ஆதரவாளர்கள் மத்தியில் பேசப்படுகிறது. விஜய் தன்னை மாநில அளவில் முக்கியப் பொறுப்பில் அமர்த்துவார் என அவர் எதிர்பார்த்ததாகவும், அது நிறைவேறவில்லை என்பதால் வருத்தத்தில் இருப்பதாகவும் அவர்கள் கூறுகின்றனர்.

மேலும், விஜயபாஸ்கருக்கு மாநில அளவில் முக்கியப் பொறுப்பு வழங்கும் முடிவுக்கு கட்சியின் சில முக்கிய நிர்வாகிகள் தடையாக இருந்ததாகவும் அவரது ஆதரவாளர்கள் குற்றம்சாட்டி வருவதாக தகவல் வெளியாகியுள்ளது.

குறிப்பாக, புஸ்ஸி ஆனந்த் மற்றும் கட்சி நிர்வாகத்தில் முக்கியப் பொறுப்பில் இருப்பவர்கள் குறித்தே விஜயபாஸ்கர் ஆதரவாளர்கள் அதிருப்தி தெரிவித்து வருவதாக கூறப்படுகிறது.

இருப்பினும், விஜயபாஸ்கர் தனது அதிருப்தியை வெளிப்படையாக வெளிக்காட்டாமல், வழங்கப்பட்டுள்ள பொறுப்பை ஏற்றுக்கொண்டு செயல்பட முடிவு செய்துள்ளதாக தெரிகிறது.

அதிமுகவின் முக்கிய தலைவராக இருந்து தவெகவில் இணைந்த விஜயபாஸ்கருக்கு மாவட்டப் பொறுப்பு மட்டுமே வழங்கப்பட்டிருப்பது, கட்சிக்குள் ஏற்கனவே நிலவி வரும் "பழைய நிர்வாகிகளா? புதிதாக வந்த முக்கிய தலைவர்களா?" என்ற அதிகார சமநிலை விவாதத்தை மேலும் தீவிரப்படுத்தியுள்ளது.

வரும் உள்ளாட்சித் தேர்தலை முன்னிட்டு தவெக தனது அமைப்பை வலுப்படுத்தி வரும் நிலையில், விஜயபாஸ்கர் உள்ளிட்ட முன்னாள் அதிமுக தலைவர்களுக்கு வழங்கப்பட்டுள்ள பொறுப்புகள் கட்சியின் எதிர்கால அரசியல் வியூகத்தில் எந்த அளவுக்கு தாக்கத்தை ஏற்படுத்தும் என்பது அடுத்தகட்டத்தில் தெரியவரும்.