தாராபுரம் தொகுதி இடைத்தேர்தல் பிரசாரத்தின் பின்னணியில் செய்தியாளர்களைச் சந்தித்த தமிழகச் சட்டமன்ற முன்னாள் சபாநாயகர் அப்பாவு, தற்போதைய தவெக அரசையும் மாநில மின்துறையையும் கடுமையாகச் சாடிப் பேசினார். தேர்தலில் வெற்றி பெற்ற சிலர் ரூ.50 கோடி பெற்றுக் கொண்டு சென்றுவிட்டதாகக் குறிப்பிட்ட அவர், தாராபுரம் பகுதி மக்களுக்கு திமுக வேட்பாளர் சுகன்யா மட்டுமே பாதுகாப்பாக இருப்பார் என்றும், முன்னாள் முதலமைச்சர் மு.க.ஸ்டாலின் ஆட்சிக் காலத்தில் வழங்கப்பட்ட மாதம் ரூ.1,000 உரிமைத் தொகை உள்ளிட்ட நலத்திட்டங்களை மக்கள் இன்னும் நன்றியுடன் நினைவில் வைத்துள்ளனர் என்றும் தெரிவித்தார்.

"அதானிக்கு விற்கப்படும் மின்துறை":

மாநிலத்தில் நிலவும் கடுமையான மின்கட்டண உயர்வைச் சுட்டிக்காட்டிய அப்பாவு, முன்பு ரூ.2,000 கட்டணம் செலுத்திய மக்களுக்கு தற்போது ரூ.8,000 வரை மின்கட்டணம் உயர்த்தப்பட்டு அதிர்ச்சி அளிக்கப்படுவதாகக் குற்றம்சாட்டினார். மேலும், வீடுகளில் மின் பயன்பாட்டைக் கணக்கெடுக்கும் பணியைத் தனியாருக்குத் தாரைவார்ப்பதன் பின்னணியில் மிகப்பெரிய சதி ஒளிந்துள்ளதாகத் தெரிவித்தார். "கூட்டணிக் கட்சிகளுக்கு அமைச்சர்கள் இருப்பது போல, அமைச்சரவையில் பா.ஜ.க-விற்கும் ஒரு அமைச்சர் இருக்கிறார். அவர்தான் மின்துறை அமைச்சர் நிர்மல் குமார். தமிழ்நாட்டின் மின்சாரத் துறையை அதானி குழுமத்திற்குத் தாரைவார்ப்பதற்காகவே அவருக்கு அந்தப் பதவி வாங்கித் தரப்பட்டுள்ளது. அவர் தவெக ஆட்சியில் செயல்படும் ஒரிஜினல் பா.ஜ.க மந்திரி" எனக் காரசாரமாகச் சாடினார்.

"ஒட்டுமொத்தத் தமிழகமும் தனியார்மயம்":

தமிழகத்தில் வெளித்தோற்றத்திற்கு மட்டுமே தவெக ஆட்சி நடப்பதாகவும், ஆனால் பின்னணியில் முழுமையாக பா.ஜ.க-வே ஆட்சி அதிகாரத்தைச் செலுத்துவதாகவும் அவர் விமர்சித்தார். மாநிலத்தில் செயற்கையாக மின்தடையை ஏற்படுத்தி, மின்துறையை அதானிக்கு விற்பதற்கான சூழல் உருவாக்கப்பட்டு வருவதாகவும், இடைத்தேர்தல் முடிவடைந்தவுடன் இது முழுமையாக நடைமுறைக்கு வந்துவிடும் என்றும் கூறினார். மேலும், மாநிலத்தின் சுரங்கங்கள் அனைத்தும் 'ரெட்டி கேங்' அமைப்பிடமும், அரசுப் போக்குவரத்துத்துறை உத்திரப்பிரதேசத்தைச் சேர்ந்த தனியார் நிறுவனத்திற்கும் விற்பனை செய்யப்பட்டுவிட்டதாகவும், இறுதியில் தமிழகத்தில் அரசுத்துறை என்று எதுவும் மிஞ்சாது என்றும் அப்பாவு கடுமையாக எச்சரித்தார்.