தமிழகத்தில் அண்மையில் நடைபெற்ற அரசியல் அதிரடி மாற்றங்களுக்குப் பிறகு, முதலமைச்சர் விஜய் தலைமையிலான தமிழக வெற்றிக் கழகத்தின் புதிய கூட்டணி அரசு பொறுப்பேற்றுள்ளது. இந்த நிலையில், புதிய அரசின் முழுமையான பட்ஜெட் தாக்கல் செய்யப்படுவதற்கான 17-வது சட்டமன்றத்தின் முதல் கூட்டத்தொடர் இன்று மிகப்பரபரப்பான சூழலில் கூடியுள்ளது.

தமிழகத்தில் காங்கிரஸ், விடுதலை சிறுத்தைகள் கட்சி, மற்றும் இந்திய யூனியன் முஸ்லிம் லீக் ஆகிய முக்கியக் கட்சிகளை உள்ளடக்கிய தவெக-வின் புதிய கூட்டணி அமைச்சரவை அண்மையில் உருவாக்கப்பட்டது. கடந்த மே மாதம் 13-ஆம் தேதி நடைபெற்ற வரலாற்றுச் சிறப்புமிக்க நம்பிக்கை வாக்கெடுப்பில் முதலமைச்சர் விஜய் தலைமையிலான புதிய அரசு பெரும்பான்மையை நிரூபித்துத் தனது வெற்றியை உறுதி செய்தது. இதனைத் தொடர்ந்து, முழுமையான பட்ஜெட்டைத் தயாரிப்பதற்கும், ஆளுநர் உரை மற்றும் புதிய மக்கள் நல அறிவிப்புகள் குறித்து விவாதிப்பதற்கும் கடந்த ஜூன் 5-ஆம் தேதி முதலமைச்சர் தலைமையில் முதல் அமைச்சரவைக் கூட்டம் நடைபெற்றது. இக்கூட்டத்தின் முக்கிய முடிவுகளைத் தொடர்ந்து, புதிய சட்டமன்றத்தின் முதல் அதிகாரப்பூர்வக் கூட்டம் இன்று தொடங்கியுள்ளது.

சட்டமன்றத்தின் முதல் நாளான இன்றே, பிரதான எதிர்க்கட்சியாக உருவெடுத்துள்ள திமுக சட்டமன்ற உறுப்பினர்கள் தவெக அரசுக்கு எதிராகக் கடுமையானப் போராட்டக் களத்தைக் கையில் எடுத்துள்ளனர். அவைக் கூட்டத்தில் பங்கேற்பதற்காக வந்த திமுக எம்.எல்.ஏ-க்கள் அனைவரும் ஒட்டுமொத்தமாகக் கருப்புப் பேட்ஜ் அணிந்து வந்து அவைக்கு வெளியேயும் பேரவை வளாகத்திலும் அதிரடிப் போராட்டத்தில் ஈடுபட்டனர்.

திமுகவினர் அணிந்திருந்த கருப்புப் பேட்ஜ்களில் வாயத் திறங்க CM என்ற காட்டமான வாசகம் அச்சிடப்பட்டு இடம்பெற்றிருந்தது. தவெக அரசின் செயல்பாடுகளைக் கண்டித்தும், பல்வேறு முக்கிய மக்கள் பிரச்சினைகளில் முதலமைச்சர் விஜய் தொடர்ந்து மௌனம் காப்பதாகக் குற்றம் சாட்டியும், திமுக உறுப்பினர்கள் கைகளில் கண்டனப் பதாகைகளை ஏந்திப் பேரவை வளாகத்தை அதிர வைக்கும் வகையில் தீவிர முழக்கங்களை எழுப்பினர். புதிய அரசு பொறுப்பேற்ற முதல் கூட்டத்தொடரிலேயே எதிர்க்கட்சியான திமுக இப்படி ஒரு ஆக்ரோஷமான போராட்டத்தைத் தொடங்கியிருப்பது, வரும் நாட்களில் சட்டமன்றத்தில் ஆளுங்கட்சியான தவெக மற்றும் திமுக இடையே மிகக் கடுமையான விவாதங்களும் அரசியல் மோதல்களும் அரங்கேறும் என்பதைத் தெளிவாகக் காட்டுகிறது

.