புதுடெல்லி: நாடு முழுவதும் 100 சதவீத எத்தனால் (E100) எரிபொருளைப் பயன்படுத்த மத்திய அரசு அனுமதி அளித்துள்ளதாக மத்திய சாலைப் போக்குவரத்து மற்றும் நெடுஞ்சாலைத்துறை அமைச்சர் நிதின் கட்கரி தெரிவித்துள்ளார். இந்த அறிவிப்பு எரிபொருள் துறையில் முக்கிய முன்னேற்றமாகக் கருதப்பட்டாலும், E100 எரிபொருளை சாதாரண பைக்குகள் மற்றும் கார்களில் பயன்படுத்துவது கடுமையான தொழில்நுட்ப பாதிப்புகளை ஏற்படுத்தும் என வாகன நிபுணர்கள் எச்சரிக்கை விடுத்துள்ளனர்.

கரும்புச் சாறு, சோளம் மற்றும் பிற தானியங்களிலிருந்து தயாரிக்கப்படும் எத்தனால் மூலம் விவசாயிகளுக்கு கூடுதல் வருமானம் கிடைக்கும் என்றும், பெட்ரோல் இறக்குமதி சார்பை குறைக்க முடியும் என்றும் மத்திய அரசு வலியுறுத்தி வருகிறது. இதன் ஒரு பகுதியாகவே E100 எரிபொருளுக்கு அனுமதி வழங்கப்பட்டுள்ளது.

ஆனால், தற்போது இந்தியாவில் பயன்படுத்தப்படும் பெரும்பாலான இருசக்கர மற்றும் நான்கு சக்கர வாகனங்கள் அதிகபட்சமாக E10 அல்லது E20 (10% அல்லது 20% எத்தனால் கலந்த பெட்ரோல்) மட்டுமே தாங்கும் வகையில் வடிவமைக்கப்பட்டுள்ளன. எனவே, E100 எரிபொருளை சாதாரண வாகனங்களில் பயன்படுத்தினால் என்ஜின் மற்றும் எரிபொருள் அமைப்பில் கடுமையான சேதம் ஏற்படக்கூடும் என நிபுணர்கள் தெரிவிக்கின்றனர்.

குறிப்பாக, சாதாரண வாகனங்களில் பயன்படுத்தப்படும் ரப்பர் ஃப்யூல் குழாய்கள், சீல்கள் மற்றும் கேஸ்கெட்டுகள் எத்தனால் தாக்கத்தால் மெல்ல மெல்ல சேதமடையலாம். இதனால் எரிபொருள் கசிவு ஏற்படும் அபாயம் உள்ளது. மேலும், எத்தனால் காற்றில் உள்ள ஈரப்பதத்தை உறிஞ்சும் தன்மை கொண்டதால், ஃப்யூல் டேங்க், கார்பூரேட்டர், ஃப்யூல் இன்ஜெக்டர் உள்ளிட்ட அலுமினியம் மற்றும் இரும்புப் பாகங்களில் துருப்பிடிப்பு ஏற்பட்டு வாகனத்தின் செயல்திறன் பாதிக்கப்படலாம் என எச்சரிக்கப்படுகிறது.

இதற்கான மாற்றாக, Flex-Fuel Vehicles (FFVs) எனப்படும் பிரத்யேக வாகனங்களை பயன்படுத்த வேண்டும் என்று மத்திய அரசு தெரிவித்துள்ளது. இந்த வாகனங்கள் E100 உட்பட பல்வேறு அளவிலான எத்தனால் கலந்த எரிபொருளில் இயங்கும் வகையில் வடிவமைக்கப்பட்டுள்ளன.

ஆனால், இந்திய சந்தையில் தற்போது ஃப்ளெக்ஸ்-ஃப்யூல் வாகனங்களின் எண்ணிக்கை மிகவும் குறைவாகவே உள்ளது. இந்த வகை வாகனங்களின் பயன்பாடு இன்னும் 1 சதவீதத்தைக் கூட எட்டவில்லை என தகவல்கள் தெரிவிக்கின்றன.

சமீபத்தில் மாருதி சுசுகி நிறுவனம் தனது முதல் ஃப்ளெக்ஸ்-ஃப்யூல் காரான வேகன் ஆர் ஃப்ளெக்ஸ்-ஃப்யூல் (WagonR Flex-Fuel) மாடலை அறிமுகப்படுத்தியது. அதேபோல், ஹீரோ மோட்டோகார்ப் நிறுவனம் ஸ்பிளெண்டர் பிளஸ் மற்றும் எச்.எஃப் டீலக்ஸ் ஃப்ளெக்ஸ்-ஃப்யூல் மாடல்களையும் அறிமுகப்படுத்தியுள்ளது. இருப்பினும், இந்த வாகனங்களின் விலை வழக்கமான பெட்ரோல் வாகனங்களை விட அதிகமாக இருப்பதால், பொதுமக்கள் மத்தியில் வரவேற்பு இன்னும் குறைவாகவே உள்ளது.

இதனால், E100 எரிபொருளுக்கு அனுமதி வழங்கப்பட்டிருந்தாலும், அது அனைத்து வாகனங்களுக்கும் பொருந்தும் என்று கருதி சாதாரண பைக் அல்லது கார்களில் பயன்படுத்தக் கூடாது என்றும், வாகன உற்பத்தியாளர் நிறுவனங்கள் பரிந்துரைக்கும் எரிபொருளையே பயன்படுத்த வேண்டும் என்றும் நிபுணர்கள் அறிவுறுத்தியுள்ளனர்.