ஜெயலலிதா மறைவுக்குப் பிறகு அதிமுக தனது வரலாற்றின் மிக முக்கியமான கட்டத்தை எதிர்கொண்டு வருகிறது. நீண்டகால உள் கட்சிப் பூசல்கள், பிரிவினைகள் மற்றும் தலைமைக் குழப்பங்கள் மத்தியில் 2026 சட்டமன்றத் தேர்தல் கட்சியின் அரசியல் எதிர்காலத்தை தீர்மானிக்கும் முக்கியமான சோதனையாக மாறியுள்ளது.

பொதுச்செயலாளர் எடப்பாடி பழனிசாமி தலைமையில் கட்சி ஒருங்கிணைக்கப்பட்டதாக வெளிப்படையாக கூறப்பட்டாலும், பிரிந்து சென்ற மூத்த தலைவர்களின் நகர்வுகள் கட்சிக்குள் அச்சத்தை உருவாக்கியுள்ளன. செங்கோட்டையன், தலைமையுடன் ஏற்பட்ட கருத்து வேறுபாட்டுக்கு பிறகு நீக்கப்பட்டு தமிழக வெற்றிக் கழகத்தில் இணைந்தது அதிமுகவின் பாரம்பரிய ஆதரவாளர்களிடையே அதிர்வை ஏற்படுத்தியது. டிடிவி தினகரன், பாஜக கூட்டணியில் தனிப்பாதையில் பயணித்து வருகிறார். சசிகலாவும் தனிப்பட்ட அரசியல் நகர்வுகளில் ஈடுபட்டு வருவது வாக்கு சிதறலை அதிகரிக்கும் சூழலை உருவாக்கியுள்ளது.

இந்த நிலையில், ஓ.பன்னீர்செல்வம் திமுக அணியில் இணைந்து உதயசூரியன் சின்னத்தில் போட்டியிடத் தயாராகியிருப்பது மிகப்பெரிய அரசியல் திருப்பமாக பார்க்கப்படுகிறது. தனக்கென அங்கீகரிக்கப்பட்ட சின்னம் இல்லாத சூழலில், தேர்தலில் போட்டியிட சின்னத்தின் அவசியம் காரணமாக இந்த முடிவு எடுக்கப்பட்டதாக அரசியல் வட்டாரங்கள் மதிப்பிடுகின்றன. கொள்கை ரீதியாக திமுகவை எதிர்த்து வந்தவர் தற்போது அதே அணியில் இணைவது, அவரது அரசியல் பாதையில் முக்கிய மாற்றமாக கருதப்படுகிறது.

அதிமுக தலைமையினர் ஆரம்பத்தில் இதை சிறுமையாக எடுத்துக் கொண்டது போல தோன்றினாலும், பின்னர் கடுமையான விமர்சனங்கள் முன்வைத்தது அவர்களிடையேயான கவலையை வெளிப்படுத்துவதாக பார்க்கப்படுகிறது. குறிப்பாக தென் மாவட்டங்களில் ஓபிஎஸ்ஸின் தனிப்பட்ட செல்வாக்கு திமுக கூட்டணிக்கு ஆதரவாக மாறக்கூடும் என்ற அச்சம் அதிமுகவினரிடையே உள்ளது. கோவை, நெல்லை, தூத்துக்குடி உள்ளிட்ட பகுதிகளில் பாரம்பரிய வாக்கு வங்கியில் பிளவு ஏற்படும் அபாயம் பேசப்படுகிறது.

ஒரே நேரத்தில் சசிகலா, தினகரன், ஓபிஎஸ், செங்கோட்டையன் ஆகியோர் தனித்தனியாக செயல்படுவதால் அதிமுக வாக்கு வங்கி சிதறக்கூடும் என்ற அரசியல் கணக்குகள் முன்வைக்கப்படுகின்றன. இதனால் திமுக கூட்டணிக்கு மறைமுக பலன் கிடைக்கலாம் என மதிப்பிடப்படுகிறது.

மறுபுறம், ஓபிஎஸ்ஸின் முடிவு அவரது அரசியல் எதிர்காலத்திற்கு இரு முனைக் கூரியாயிருக்கலாம். அதிமுகவின் தீவிர ஆதரவாளர்கள் மத்தியில் எதிர்மறை பார்வை உருவாகும் வாய்ப்பு உள்ளது. கொள்கை மாற்றம் அவரது நம்பகத்தன்மையை கேள்விக்குள்ளாக்கும் அபாயமும் பேசப்படுகிறது. திமுக அவரை அரசியல் வியூகத்தின் ஒரு பகுதியாக மட்டுமே பயன்படுத்தும் என்ற அச்சமும் சில ஆதரவாளர்களிடையே உள்ளது.

2026 தேர்தல் அதிமுகவிற்கு தற்காப்புப் போராட்டமாக மாறுமா? பிரிந்து சென்ற தலைவர்கள் மீண்டும் ஒன்றிணைவார்களா? அல்லது சிதறல்களுடனேயே களம் காணுமா? என்ற கேள்விகள் தற்போது எழுந்துள்ளன. அதேபோல், ஓபிஎஸ்ஸின் இந்த ‘கடைசி இன்னிங்ஸ்’ அவருக்கு பலன் தருமா என்பதும் வரவிருக்கும் தேர்தல் முடிவுகளில்தான் தெளிவாகும்.தமிழக அரசியலில் அடுத்த சில மாதங்கள் தீர்மானிப்பதாக அமையும் என்பது மட்டும் உறுதி.