நாடாளுமன்ற மழைக்கால கூட்டத்தொடர் நிறைவடைந்துள்ள நிலையில், “இந்தியா கூட்டணியில் திமுக இல்லை; காங்கிரஸ் கட்சிதான் இந்தியா கூட்டணியில் இருக்கிறது” என திமுக எம்பி கனிமொழி தெரிவித்திருப்பது தேசிய அரசியலில் பரபரப்பை ஏற்படுத்தியுள்ளது.

நாடாளுமன்ற மழைக்கால கூட்டத்தொடர் ஜூலை 20-ம் தேதி தொடங்கி நேற்று நிறைவடைந்தது. இந்தக் கூட்டத்தொடரில் நீட் தேர்வுக்கு எதிரான மாணவர்கள் போராட்டம், ராமர் கோயில் நன்கொடை விவகாரம் உள்ளிட்ட பல்வேறு பிரச்சனைகளை முன்வைத்து எதிர்க்கட்சிகள் தொடர்ந்து அமளியில் ஈடுபட்டன. அதேநேரத்தில், மத்திய அரசு பல்வேறு மசோதாக்களை நாடாளுமன்றத்தில் நிறைவேற்றியது.

கூட்டத்தொடரின் இறுதி நாளில் பிரதமர் மோடி மற்றும் மத்திய உள்துறை அமைச்சர் அமித் ஷா மக்களவைக்கு வந்திருந்த நிலையில், மாணவர்கள் மீதான தாக்குதல் உள்ளிட்ட விவகாரங்கள் குறித்து அவர்கள் பேசுவார்கள் என எதிர்பார்க்கப்பட்டது. ஆனால், வந்தே மாதரம் பாடல் பாடப்பட்டதைத் தொடர்ந்து மக்களவை தேதி குறிப்பிடாமல் ஒத்திவைக்கப்பட்டது. இதேபோல் மாநிலங்களவையும் ஒத்திவைக்கப்பட்டது.

இதையடுத்து மக்களவை சபாநாயகர் ஓம் பிர்லா, எம்பிக்களுக்கு தேநீர் விருந்து அளித்தார். இந்தியா கூட்டணியில் இடம்பெற்றுள்ள பல்வேறு கட்சிகளின் எம்பிக்கள் இந்த விருந்தை புறக்கணித்த நிலையில், திமுக சார்பில் கனிமொழி மட்டும் பங்கேற்றார். இதனால் திமுகவும் பாஜகவும் நெருக்கமாகி வருகிறதா என்ற விவாதம் அரசியல் வட்டாரத்தில் எழுந்தது.

இந்த நிலையில், சென்னை விமான நிலையத்தில் செய்தியாளர்களை சந்தித்த கனிமொழியிடம் தேநீர் விருந்தில் பங்கேற்றது குறித்து கேள்வி எழுப்பப்பட்டது. அதற்கு பதிலளித்த அவர், சபாநாயகர் அளித்த தேநீர் விருந்தில் என்ன சர்ச்சை இருக்கிறது என்றும், தாங்கள் ஏற்கனவே இடமாற்றம் தொடர்பாக கோரிக்கை வைத்திருந்ததாகவும், அது குறித்து கேட்பதற்காகவே சென்றதாகவும் தெரிவித்தார்.

அதன் பின்னர் கனிமொழி தெரிவித்த கருத்துதான் தற்போது அரசியல் விவாதத்தை ஏற்படுத்தியுள்ளது. “நாங்கள் இந்தியா கூட்டணியில் இல்லை. காங்கிரஸ் கட்சிதான் இந்தியா கூட்டணியில் இருக்கிறது. நாங்கள் இல்லை” என அவர் கூறியதாக தகவல் வெளியாகியுள்ளது.

கனிமொழியின் இந்தக் கருத்து காங்கிரஸ் கட்சியினரிடையே மட்டுமின்றி, இந்தியா கூட்டணியில் இடம்பெற்றுள்ள மற்ற கட்சிகளிடையேயும் அதிர்ச்சியை ஏற்படுத்தியுள்ளதாக கூறப்படுகிறது.

ஏற்கனவே இந்தியா கூட்டணி சார்பில் நடைபெற்ற ஆலோசனைக் கூட்டத்தில் திமுக பங்கேற்காதது அரசியல் ரீதியாக கவனம் பெற்றிருந்தது. தற்போது கனிமொழியின் இந்த வெளிப்படையான கருத்து, திமுக–காங்கிரஸ் உறவில் ஏற்பட்டுள்ள விரிசல் மேலும் வெளிப்படுகிறதா? என்ற கேள்வியை எழுப்பியுள்ளது.

இதனால், நாடாளுமன்ற அரசியலில் திமுகவின் அடுத்தகட்ட வியூகம் என்னவாக இருக்கும் என்பதும், காங்கிரஸுடனான உறவு எந்த திசையில் செல்லும் என்பதும் தேசிய அரசியல் வட்டாரத்தில் கவனம் பெற்றுள்ளது.