மேற்காசியப் போர் நெருக்கடியால் உலகளவில் கச்சா எண்ணெய் விலை உயர்ந்துள்ள சூழலில், பெட்ரோல் மற்றும் டீசலைச் சிக்கனமாகப் பயன்படுத்துமாறு பிரதமர் நரேந்திர மோடி நாட்டு மக்களுக்கு வேண்டுகோள் விடுத்திருந்தார். இதனை ஏற்றுப் பல மாநில அரசுகள் வாகனப் பயன்பாட்டைக் குறைத்து வரும் வேளையில், மத்தியப் பிரதேசம் மற்றும் உத்தரப் பிரதேசத்தில் பாஜக பிரமுகர்கள் நடத்திய பிரம்மாண்ட வாகன ஊர்வலங்கள் பெரும் சர்ச்சையை ஏற்படுத்தியுள்ளன.

மத்தியப் பிரதேசத்தில் அதிரடி நடவடிக்கை:

மத்தியப் பிரதேச மாநிலப் பாடநூல் கழகத்தின் தலைவராக நியமிக்கப்பட்ட பாஜக பிரமுகர் சவுபாக்ய சிங் தாக்கூர், உஜ்ஜயினிலிருந்து போபாலுக்கு நூற்றுக்கணக்கான வாகனங்களுடன் ஊர்வலமாகச் சென்று பொறுப்பேற்க முயன்றார். பிரதமரின் தேசிய நலன் சார்ந்த வழிகாட்டுதலைப் புறக்கணித்த இந்தச் செயல் ஊடகங்களில் வெளியாகி அதிர்ச்சியை ஏற்படுத்தியது.

இதனைத் தொடர்ந்து, அம்மாநில முதல்வர் மோகன் யாதவ் உத்தரவின் பேரில் சவுபாக்ய சிங்கிற்கு விளக்கம் கேட்டு நோட்டீஸ் அனுப்பப்பட்டுள்ளது. மேலும், மறுஉத்தரவு வரும் வரை அவர் மீது கடுமையான கட்டுப்பாடுகள் விதிக்கப்பட்டுள்ளன:

பாடநூல் கழக அலுவலகம் அல்லது வளாகத்திற்குள் நுழைய அவருக்குத் தடை விதிக்கப்பட்டுள்ளது.

கழகத்திற்குச் சொந்தமான அரசு வாகனங்கள், ஊழியர்கள் அல்லது எந்தவொரு வசதியையும் பயன்படுத்தக் கூடாது.

கழகத்தின் நிர்வாகக் கூட்டங்களில் பங்கேற்கவோ, நிதி சார்ந்த முடிவுகளில் கையெழுத்திடவோ தடை விதிக்கப்பட்டுள்ளது.

வாராணாசியிலும் சர்ச்சை:

இதேபோல், உத்தரப் பிரதேசத்தில் பிரதமரின் சொந்தத் தொகுதியான வாராணாசியில், புதிய அமைச்சராகப் பொறுப்பேற்ற மாவட்ட பாஜக தலைவர் ஹன்ஸ்ராஜ் விஷ்வ கர்மாவுக்கு அவரது ஆதரவாளர்கள் சுமார் 80 வாகனங்கள் மற்றும் புல்டோசர்களுடன் பிரம்மாண்ட வரவேற்பு அளித்தனர். இந்த ஊர்வலக் காட்சிகளை அமைச்சரே சமூக வலைதளங்களில் பகிர்ந்தது கடுமையான விமர்சனத்திற்கு உள்ளாகியுள்ளது.

பிரதமரின் சிக்கனக் கொள்கைக்கு எதிராகச் சொந்தக் கட்சி நிர்வாகிகளே ஆடம்பரமாகச் செயல்படுவதாக உ.பி காங்கிரஸ் தலைவர் அஜய் ராய் உள்ளிட்ட எதிர்க்கட்சித் தலைவர்கள் சாடியுள்ளனர். ஒருபுறம் ம.பி அரசு தன் கட்சிப் பிரமுகர் மீது கடுமையான நடவடிக்கை எடுத்துள்ள நிலையில், உ.பி-யில் எழுந்துள்ள இந்தச் சர்ச்சை அரசியல் வட்டாரத்தில் பெரும் பேசுபொருளாக மாறியுள்ளது.