விடுதலை சிறுத்தைகள் கட்சி தலைவர் தொல். திருமாவளவனின் சமீபத்திய கூட்டணி தொடர்பான கருத்துகள் தமிழக அரசியலில் புதிய விவாதத்தை ஏற்படுத்தியுள்ளன. தமிழக வெற்றிக் கழகம் தலைமையிலான கூட்டணி அரசில் அமைச்சரவையில் பங்கேற்று இருந்தாலும், "தவெக கூட்டணியில் முழுமையாக இணைந்துவிடவில்லை", "திமுகவுடனான அரசியல் உறவு தொடர்கிறது" என்று அவர் கூறியிருப்பது அரசியல் வட்டாரங்களில் பல்வேறு கேள்விகளை எழுப்பியுள்ளது. குறிப்பாக, இந்த கருத்துகள் விசிக நிர்வாகிகள் மற்றும் தொண்டர்கள் மத்தியிலும் குழப்பத்தை ஏற்படுத்தியுள்ளதாக கூறப்படுகிறது.

2026 சட்டப்பேரவைத் தேர்தலில் தனிப்பெரும்பான்மையைப் பெறாவிட்டாலும், அதிக தொகுதிகளில் வெற்றி பெற்று தமிழக வெற்றிக் கழகம் ஆட்சியை அமைத்தது. ஆரம்பத்தில் காங்கிரஸ் உள்ளிட்ட சில கட்சிகள் வெளியில் இருந்து ஆதரவு தெரிவித்த நிலையில், பின்னர் இந்திய கம்யூனிஸ்ட், மார்க்சிஸ்ட் கம்யூனிஸ்ட், இந்திய யூனியன் முஸ்லிம் லீக் மற்றும் விடுதலை சிறுத்தைகள் கட்சியும் ஆதரவு அளித்தன. முதலில் அமைச்சரவையில் சேராமல் வெளியில் இருந்து ஆதரவு அளிக்கும் நிலைப்பாட்டை எடுத்திருந்த விசிக, பின்னர் அமைச்சரவையிலும் இடம்பெற்றது. இருப்பினும், "தவெக கூட்டணியில் முழுமையாக இணைந்துவிட்டோம்" என்று திருமாவளவன் இதுவரை வெளிப்படையாக அறிவிக்கவில்லை.

சமீபத்தில் பேசிய திருமாவளவன், "தமிழக வெற்றிக் கழகம் தலைமையிலான கூட்டணி இன்னும் முழுமையாக உருவாகவில்லை. கூட்டணி தொடர்பான இறுதி முடிவு எடுக்கப்படவில்லை. எங்களின் அரசியல் முடிவுகள் அனைத்தும் திமுகவுடன் பகிரப்பட்டு வருகின்றன. அந்த உறவு தொடர்கிறது" என்று தெரிவித்தார். இந்த கருத்து அரசியல் வட்டாரங்களில் பரபரப்பை ஏற்படுத்தியுள்ளது.

2026 சட்டப்பேரவைத் தேர்தலுக்கு முன்பாக நடைபெற்ற பிரச்சாரத்தில் விஜயையும் அவரது அரசியல் நிலைப்பாட்டையும் கடுமையாக விமர்சித்திருந்த திருமாவளவன், தற்போது அதே தலைமையிலான அமைச்சரவையில் இடம்பெற்றிருப்பது குறித்து எதிர்க்கட்சிகள் தொடர்ந்து கேள்வி எழுப்பி வருகின்றன. அந்த விமர்சனங்களுக்கு பதிலளிக்கும் வகையில், தனது முந்தைய கருத்துகளுக்கு அவ்வப்போது விளக்கம் அளித்து வருகிறார்.

அரசியல் பார்வையாளர்களின் கருத்துப்படி, விசிகவின் அடிமட்டத் தொண்டர்களில் ஒரு பகுதியினர் தவெகவுடன் கூட்டணி அமைத்ததை வரவேற்றாலும், சில மூத்த நிர்வாகிகள் திமுக கூட்டணியுடனான உறவைத் தொடர வேண்டும் என்ற கருத்தில் இருப்பதாக கூறப்படுகிறது. இதனால் கட்சிக்குள் கருத்து வேறுபாடுகள் நிலவுவதாகவும் அரசியல் வட்டாரங்களில் பேசப்படுகிறது.

மேலும், விசிக கூட்டணியில் இருந்து விலகிய பிறகு அதன் சில முக்கிய நிர்வாகிகளை திமுக தனது பக்கம் ஈர்க்க முயற்சிப்பதாக குற்றச்சாட்டுகள் எழுந்துள்ளன. இதனால் திமுகவை முழுமையாக எதிர்க்கும் நிலைப்பாட்டை திருமாவளவன் எடுக்கத் தயங்குகிறார் என்ற அரசியல் மதிப்பீடும் முன்வைக்கப்படுகிறது.

ஒருபுறம் தவெக அரசில் அமைச்சரவையில் பங்கேற்பதும், மறுபுறம் திமுகவுடனான அரசியல் உறவு தொடர்கிறது என்று கூறுவதும், விசிக இரட்டை அணுகுமுறையை பின்பற்றுகிறதா என்ற கேள்வியையும் எழுப்பியுள்ளது. அரசியல் விமர்சகர்களின் கருத்துப்படி, ஒருபுறம் ஆட்சியில் பங்கேற்பதன் அரசியல் பலன்களையும், மறுபுறம் எதிர்கால கூட்டணி வாய்ப்புகளையும் திறந்த நிலையில் வைத்திருக்கவே இந்த அணுகுமுறையை விசிக கடைப்பிடித்து வரக்கூடும்.

அதே நேரத்தில், விஜயை முழுமையாக ஆதரித்து பேசினால் "அரசியல் பதவிக்காக நிலைப்பாட்டை மாற்றிவிட்டார்" என்ற விமர்சனங்களையும், திமுகவை முழுமையாக எதிர்த்தால் எதிர்கால கூட்டணி வாய்ப்புகள் பாதிக்கப்படும் என்ற அரசியல் கணிப்பையும் விசிக கருத்தில் கொண்டு செயல்படுவதாக சில அரசியல் நோக்கர்கள் கருதுகின்றனர்.

எதிர்வரும் உள்ளாட்சித் தேர்தல், இடைத்தேர்தல்கள் மற்றும் அடுத்தடுத்த அரசியல் நகர்வுகளே, விடுதலை சிறுத்தைகள் கட்சி எந்த அரசியல் பாதையை உறுதியாகத் தேர்வு செய்யப் போகிறது என்பதற்கான தெளிவை வழங்கும் என்று அரசியல் பார்வையாளர்கள் மதிப்பிடுகின்றனர்.