சென்னையில் நடைபெற்ற திமுக முப்பெரும் விழா பொதுக்கூட்டத்தில், தமிழக முதல்வர் விஜய்யை ஒருமையில் பேசியதாகக் கூறப்படும் திமுக பெண் கவுன்சிலர் சுதா தீனதயாளனுக்கு எதிராக அரசியல் ரீதியாகக் கடும் எதிர்ப்புகள் எழுந்துள்ளன. அவர் பேசிய விதத்தைக் கண்டித்த திமுக துணைப் பொதுச்செயலாளரும் தூத்துக்குடி எம்பியுமான கனிமொழி, மேடையிலேயே கட்சி நிர்வாகிகள் கண்ணியத்துடன் பேச வேண்டும் என அறிவுறுத்தினார். இதற்கிடையே, தவெக நிர்வாகி அளித்த புகாரின் பேரில் எஸ்பிளனேடு போலீஸார் சுதா தீனதயாளனுக்கு சம்மன் அனுப்பியுள்ளதாகத் தகவல் வெளியாகியுள்ளது.

சென்னையில் அக்டோபர் 17ஆம் தேதி திமுக சார்பில் முப்பெரும் விழா பொதுக்கூட்டம் நடைபெற்றது. இந்த நிகழ்ச்சியில் எம்பி கனிமொழி, சென்னை மேயர் பிரியா, முன்னாள் அமைச்சர் சேகர்பாபு, முன்னாள் எம்பி அப்துல்லா உள்ளிட்ட முக்கிய நிர்வாகிகள் பங்கேற்றனர். அப்போது திமுகவின் 95வது வார்டு கவுன்சிலரான சுதா தீனதயாளன் மேடையில் பேசினார்.

அவர் பேசும்போது, சட்டப்பேரவையில் திமுக தலைவர் மு.க.ஸ்டாலினின் தோற்றம் குறித்து விமர்சிப்பதாகக் கூறி, முதல்வர் விஜய்யின் வயதைச் சுட்டிக்காட்டிப் பேசினார். தொடர்ந்து அவர் பயன்படுத்திய சில வார்த்தைகள் தரக்குறைவானவை என விமர்சனங்கள் எழுந்தன. அவரது பேச்சின்போது மேடையில் இருந்த சிலர் சிரித்ததாகவும், கனிமொழி அதிருப்தியுடன் காணப்பட்டதாகவும் கூறப்படுகிறது.

இதையடுத்து கனிமொழி தனது உரையின்போது கட்சி நிர்வாகிகளுக்கு அறிவுரை வழங்கினார். “முப்பெரும் விழா கண்ட கட்சி திமுக என்பதை நினைவில் வைத்துக்கொண்டு பேச வேண்டும். அவர்களைப் போல் நாமும் தரம் தாழ்ந்து பேசக் கூடாது” என்ற பொருளில் அவர் கூறிய கருத்துகள், சுதா தீனதயாளனின் பேச்சுக்கான மறைமுகக் கண்டிப்பாகப் பார்க்கப்பட்டன.

இருப்பினும், முதல்வர் விஜய் குறித்த சர்ச்சைக்குரிய கருத்துகள் தெரிவிக்கப்பட்டபோதே கண்டிக்காமல், அவர் பேசி முடித்த பிறகே கனிமொழி எதிர்வினையாற்றியதாக தவெக தரப்பினர் விமர்சனம் முன்வைத்தனர். தவெக அமைச்சர் கீர்த்தனா மற்றும் எம்எல்ஏ கனிமொழி சந்தோஷ் உள்ளிட்டோரும் இந்த விவகாரத்தில் தங்களது கண்டனங்களைத் தெரிவித்ததாகக் கூறப்படுகிறது.

இதுதொடர்பாக அமைச்சர் கீர்த்தனா தனது சமூக வலைதளப் பதிவில் திமுக நிர்வாகிகளின் பேச்சுக்கு கடும் எதிர்ப்புத் தெரிவித்திருந்தார். ஜனநாயக முறையில் தேர்ந்தெடுக்கப்பட்ட முதல்வரைத் தரக்குறைவாகப் பேசுவதும், அத்தகைய பேச்சை மேடையில் அமர்ந்திருப்போர் ரசிப்பதும் எந்த வகையான அரசியல் பண்பாடு என அவர் கேள்வி எழுப்பினார். மேலும், பொதுவாழ்வில் இருக்கும் பெண்கள் அரசியல் மேடைகளில் கண்ணியத்தையும் பொறுப்பையும் காப்பது அவசியம் என்றும், நிகழ்வின்போது மேடையில் இருந்த கனிமொழி மற்றும் மேயர் பிரியா இந்தப் பேச்சைக் கண்டிக்க வேண்டுமென்றும் வலியுறுத்தினார். திமுகவின் பேச்சு நடை குறித்து மக்கள் கவனித்து வருவதாகவும், தேர்தல்களில் அதற்கான பதிலை வழங்குவார்கள் என்றும் அவர் தனது பதிவில் குறிப்பிட்டிருந்தார்.

இந்தச் சூழலில், தவெக நிர்வாகி உதயகுமார் அளித்த புகாரின் அடிப்படையில் சுதா தீனதயாளன் மீது எஸ்பிளனேடு போலீஸார் நடவடிக்கை எடுத்துள்ளதாகத் தகவல் வெளியாகியுள்ளது. ஆபாசமாகப் பேசுதல், பொது அமைதியைச் சீர்குலைக்கும் நோக்கில் வேண்டுமென்றே அவமதித்தல் உள்ளிட்ட பிரிவுகளின் கீழ் வழக்குப் பதிவு செய்யப்பட்டுள்ளதாகக் கூறப்படுகிறது. மேலும், விசாரணைக்காக அவருக்குப் போலீஸார் சம்மன் அனுப்பியுள்ளதாகத் தெரிகிறது.

திமுக பொதுக்கூட்டத்தில் தொடங்கிய இந்தப் பேச்சு சர்ச்சை, தற்போது அரசியல் விமர்சனங்களையும் காவல்துறை நடவடிக்கையையும் உள்ளடக்கிய விவகாரமாக மாறியுள்ளது. போலீஸார் அனுப்பியுள்ள சம்மனைத் தொடர்ந்து சுதா தீனதயாளன் அளிக்கும் விளக்கமும், இந்த வழக்கில் அடுத்தகட்டமாக எடுக்கப்படும் நடவடிக்கைகளும் கவனத்தைப் பெற்றுள்ளன.