தமிழக சட்டமன்றத் தேர்தல் சூடுபிடித்து வரும் நிலையில், தேர்தலுக்கு பிறகு நடிகர் விஜய் தலைமையிலான தமிழக வெற்றிக் கழகத்துடன் கூட்டணி அமைக்க பாஜக திட்டமிட்டு வருவதாக அரசியல் வட்டாரங்களில் தகவல்கள் வெளியாகியுள்ளன.

தற்போது திமுக மற்றும் அதிமுக இடையே நேரடி போட்டி நிலவினாலும், இந்த முறை எந்தக் கட்சிக்கும் தனிப்பெரும்பான்மை கிடைக்காது என்பதே பாஜக மேலிடத்தின் கணிப்பாக கூறப்படுகிறது. இதன் அடிப்படையில், “தொங்கு சட்டசபை” உருவாகும் வாய்ப்பு அதிகம் என டெல்லி அரசியல் வட்டாரங்கள் மதிப்பிடுகின்றன.

இதனை உறுதிப்படுத்தும் வகையில், மத்திய அமைச்சர் ராமதாஸ் அத்வாலே அண்மையில், “தமிழகத்தில் யாருக்கும் பெரும்பான்மை கிடைக்காவிட்டால், தேர்தலுக்கு பிறகு விஜய்யுடன் பேசி NDA ஆட்சியை அமைப்போம்” என்று தெரிவித்தது குறிப்பிடத்தக்கது. இந்த கருத்து பாஜகவின் தேர்தலுக்கு பிந்தைய அரசியல் திட்டத்தின் சிக்னலாக பார்க்கப்படுகிறது.

பாஜகவின் கணக்குப்படி, தேர்தல் முடிவுகளுக்குப் பிறகு மூன்று முக்கிய சக்திகளை இணைத்து ஆட்சி அமைக்கும் முயற்சி இருக்கலாம் என கூறப்படுகிறது. அதாவது, எடப்பாடி பழனிசாமி தலைமையிலான அதிமுக, விஜய்யின் தமிழக வெற்றிக் கழகம் மற்றும் பாஜக இணையும் வாய்ப்பு குறித்து ஆய்வு நடந்து வருவதாக தகவல்கள் தெரிவிக்கின்றன.

விஜய்யின் கட்சி இளைஞர்கள் மற்றும் புதிய வாக்காளர்களிடம் ஆதரவைப் பெற்றால், பல தொகுதிகளில் வெற்றி-தோல்வியை தீர்மானிக்கும் ‘கிங் மேக்கர்’ ஆக மாறக்கூடும் என்பதே பாஜக கணிப்பு. இதனால், விஜய்யின் ஆதரவை தேர்தலுக்கு பின் பெறுவது முக்கியம் என டெல்லி கருதுகிறது.

அதே நேரத்தில், விஜய் முன்பாக பாஜகவை “கருத்தியல் எதிரி” என விமர்சித்திருந்தாலும், சமீபத்தில் அந்த தாக்குதல் குறைந்துள்ளதாகவும் கவனிக்கப்படுகிறது. இதுவும் அரசியல் கணக்கில் முக்கிய அம்சமாக பார்க்கப்படுகிறது.

மொத்தத்தில், தமிழகத்தில் ஆட்சியை பிடிக்க பாஜக நேரடி போட்டியை விட கூட்டணி அரசியல் வழியே செல்லத் திட்டமிட்டுள்ளது போலத் தெரிகிறது. ஆனால் இந்த ‘போஸ்ட் எலக்சன்’ கணக்குகள் நடைமுறைக்கு வரும் என்றால் அது தேர்தல் முடிவுகள் எப்படி அமைகிறது என்பதையே சார்ந்தது.