ம மதுராந்தகம் மற்றும் தாராபுரம் இடைத்தேர்தல்களில் அதிமுக மூன்றாவது இடத்திற்குத் தள்ளப்பட்டதைத் தொடர்ந்து, கட்சியின் பொதுச்செயலாளர் எடப்பாடி பழனிசாமிக்கு எதிராக அதிருப்தி எம்.எல்.ஏ.க்கள் தீவிர நடவடிக்கைகளில் இறங்கியுள்ளனர். தொடர் தேர்தல் தோல்விகளால் அதிருப்தி அடைந்துள்ள தலைவர்கள், கட்சியைத் தன்வசப்படுத்தவும், தலைமைக்குச் சவால் விடும் வகையிலும் ரகசிய வியூகங்களை வகுத்து வருகின்றனர்.

சி.வி.சண்முகம் இல்லத்தில் தொடர் ஆலோசனை
ஏற்கனவே முன்னாள் அமைச்சர் எஸ்.பி. வேலுமணி இல்லத்தில் மூத்த தலைவர்கள் ஆலோசனையில் ஈடுபட்ட நிலையில், தற்போது அதிருப்தி எம்.எல்.ஏ.க்கள் சென்னை எம்.ஆர்.சி. நகரில் உள்ள முன்னாள் அமைச்சர் சி.வி.சண்முகம் வீட்டில் மீண்டும் சந்தித்துப் பேசினர். இந்த ஆலோசனைக் கூட்டத்திற்குச் சில எம்.எல்.ஏ.க்கள் நேரில் வருகை தந்து ஆதரவுக் கடிதங்கள் பெறுவது குறித்து விவாதித்துள்ளனர். இதனால் அதிமுக வட்டாரத்தில் பெரும் பரபரப்பு ஏற்பட்டுள்ளது.

சட்டப்பேரவையில் உரிமை கோரும் திட்டம்
மொத்தமுள்ள அதிமுக எம்.எல்.ஏ.க்களில் குறைந்தது 26 பேரின் ஆதரவைத் திரட்டினால் மட்டுமே சட்டப்பேரவையில் "உண்மையான அதிமுக" என உரிமை கோர முடியும். இதைக் கருத்தில் கொண்டு, அதிருப்தி அணியினர் தங்களுக்கு ஆதரவான எம்.எல்.ஏ.க்களைத் தனித்தனியாகத் தொடர்புகொண்டு ஆதரவு கடிதம் பெறும் பணிகளைத் தீவிரப்படுத்தியுள்ளனர். எடப்பாடி பழனிசாமிக்கு எதிரான இந்த உட்கட்சி பூசல் அதிமுகவின் எதிர்காலம் குறித்த கேள்விகளை எழுப்பியுள்ளது.