மதுரை மாவட்டம் கப்பலூரில் அதிமுக பொதுச் செயலாளர் எடப்பாடி பழனிசாமி செய்தியாளர்களைச் சந்தித்து முக்கிய அறிவிப்புகளை வெளியிட்டார்.

அப்போது பேசிய அவர், “முதலமைச்சர் தாம் விரக்தியின் உச்சத்தில் உள்ளதாக கூறியுள்ளார். நான் எப்போது, எங்கே அவதூறு கூறினேன் என்பதை முதலமைச்சர் வெளிப்படையாக விளக்க வேண்டும்,” என வினவினார்.

விவசாயிகள் சாலைகளில் நெல் மூட்டைகளை குவித்து வைக்கும் நிலை உருவாகியுள்ளதை சுட்டிக்காட்டிய அவர், “அமைச்சர் சக்கரபாணி கூறியது போல் தினமும் 2000 மூட்டைகள் கொள்முதல் செய்யப்பட்டிருந்தால் எந்த மையத்திலும் நெல் தேங்கி இருக்காது. இது தெளிவாகவே பொய்யான தகவல்,” என்றார்.

தற்போதைய நெல் கொள்முதல் செயல்முறையில் விவசாயிகள் கடும் பாதிப்புக்கு உள்ளாகியுள்ளதாக கூறிய அவர், “முதலமைச்சர் பாதிக்கப்பட்ட விவசாயிகளிடம் நேரில் சென்று ஆறுதல் கூற வேண்டியது அவசியம். ஆனால் அதற்கான முனைப்பே காணப்படவில்லை,” என்று விமர்சித்தார்.

மேலும், “திமுக அரசு ஆண்டுக்கு 42 லட்சம் டன் நெல் கொள்முதல் செய்கிறது என்ற அவர்களின் கூற்று உண்மையல்ல. தமிழ்நாடு அரசின் கொள்கை விளக்கக் குறிப்பிலேயே இதற்கு முரணான தகவல்கள் வெளியாகியுள்ளன,” என பழனிசாமி குற்றம்சாட்டினார்.

அரசு விவசாயிகளை ஏமாற்றும் விதத்தில் தகவல் வழங்குவதாகவும், நிலைமைக்கு உடனடி நடவடிக்கை தேவைப்படுவதாகவும் அவர் தெரிவித்தார்.