விழுப்புரம் மாவட்டத்தில் மாயமான 7 வயது சிறுமியைப் பத்து நாட்களைக் கடந்தும் கண்டுபிடிக்க முடியாத நிலையில், இந்த வழக்கின் விசாரணையை சிபிசிஐடி அல்லது சிபிஐ அமைப்பிடம் ஒப்படைக்க வேண்டும் என்று அமமுக பொதுச்செயலாளர் டிடிவி தினகரன் வலியுறுத்தியுள்ளார். சிறுமி மாயமான சம்பவத்தில் காவல்துறையினர் இதுவரை குறிப்பிடத்தக்க முன்னேற்றத்தை எட்டாதது கவலை அளிப்பதாகவும் அவர் தெரிவித்துள்ளார்.

இதுதொடர்பாக அவர் வெளியிட்டுள்ள அறிக்கையில், விழுப்புரம் மாவட்டம் செஞ்சி அருகே உள்ள ஆலம்பூண்டு நடுப்பட்டு பகுதியில் கடந்த 11-ஆம் தேதி காணாமல் போன 7 வயது சிறுமியைப் பல்வேறு முயற்சிகளுக்குப் பிறகும் கண்டுபிடிக்க முடியாதது மிகுந்த வேதனையை ஏற்படுத்துவதாகக் குறிப்பிட்டுள்ளார்.

சிறுமியின் பெற்றோர் அளித்த புகாரின் அடிப்படையில் பத்து தனிப்படைகள் அமைக்கப்பட்டு, பல்வேறு கோணங்களில் தேடுதல் வேட்டை நடத்தப்பட்டு வருகிறது. இருப்பினும், சிறுமி குறித்த முக்கியமான தடயங்கள் எதுவும் கிடைக்காததால் விசாரணையில் பின்னடைவு ஏற்பட்டுள்ளதாக அவர் சுட்டிக்காட்டியுள்ளார். இந்த நிலை, காவல்துறையின் செயல்பாடுகள் மீதான பொதுமக்களின் நம்பிக்கையைப் பாதிக்கும் வகையில் அமைந்துள்ளதாகவும் தெரிவித்துள்ளார்.

மேலும், சட்டம் ஒழுங்கைப் பாதுகாத்து மக்களின் பாதுகாப்பை உறுதிப்படுத்த வேண்டிய காவல்துறையினரை, அதிகார துஷ்பிரயோகத்தின் மூலம் ஆளும் அரசு தவறாகப் பயன்படுத்துவதாக டிடிவி தினகரன் குற்றம்சாட்டியுள்ளார். எதிர்க்கட்சியினர் மீதும், அரசின் குறைகளைச் சுட்டிக்காட்டுபவர்கள் மீதும் தேவையற்ற வழக்குகளைப் பதிவு செய்து சிறையில் அடைப்பதற்கே காவல்துறை பயன்படுத்தப்படுவதாகவும், இதனால் தமிழகக் காவல்துறையின் செயல்பாடுகள் படிப்படியாகப் பலவீனமடைந்து வருவதாகவும் அவர் விமர்சித்துள்ளார்.

தமிழகத்தில் சிறுமிகள் தொடர்பான கடத்தல் மற்றும் மாயமாகும் சம்பவங்கள் தொடர்ச்சியாக நிகழ்ந்து வருவதையும் அவர் தனது அறிக்கையில் சுட்டிக்காட்டியுள்ளார். விழுப்புரம் அருகே 7 வயது சிறுமியைக் கடத்த முயன்றதாக வடமாநில இளைஞர் ஒருவர் கைது செய்யப்பட்ட சம்பவத்தையும், ஸ்ரீபெரும்புதூர் அருகே 8 வயது சிறுமி மாயமாகி பின்னர் கண்டுபிடிக்கப்பட்ட நிகழ்வையும் அவர் குறிப்பிட்டுள்ளார்.

இதுபோன்ற சம்பவங்கள் அடுத்தடுத்து நடைபெற்று வரும் சூழலில், இவற்றின் பின்னணியில் ஏதேனும் குழுக்கள் செயல்படுகின்றனவா என்பதையும் காவல்துறையினர் விரிவாக விசாரிக்க வேண்டும் என்று வலியுறுத்தியுள்ளார். சிறுமிகள் பாதுகாப்பு தொடர்பான விவகாரங்களில் அலட்சியம் காட்டாமல், உண்மைகளைக் கண்டறிந்து உரிய நடவடிக்கை எடுப்பது அவசியம் என்றும் தெரிவித்துள்ளார்.

எனவே, மாயமான சிறுமியைத் தேடும் விசாரணையில் ஏற்பட்டுள்ள தாமதத்தையும், தமிழகத்தில் தொடர்ந்து எழுந்துவரும் சிறுமிகள் கடத்தல் தொடர்பான புகார்களையும் கருத்தில் கொண்டு, இந்த வழக்கின் விசாரணையை சிபிசிஐடி அல்லது சிபிஐ அமைப்பிடம் ஒப்படைக்க வேண்டும் என்று டிடிவி தினகரன் கோரிக்கை விடுத்துள்ளார்.

இதுதொடர்பாகத் தமிழக அரசும், முதலமைச்சர் ஜோசப் விஜய்யும் உடனடியாக நடவடிக்கை எடுக்க வேண்டும் என்றும் தனது அறிக்கையில் வலியுறுத்தியுள்ளார்.