தமிழகத்தில் 2026-ம் ஆண்டு நடைபெறவுள்ள சட்டமன்றத் தேர்தலுக்கான அரசியல் களம் இப்போதே சூடுபிடிக்கத் தொடங்கியுள்ளது. குறிப்பாக, கடந்த தேர்தல்களில் குறைந்த வாக்கு வித்தியாசத்தில் வெற்றி பெற்றவர்கள் மற்றும் தோல்வியை சந்தித்த முக்கிய அரசியல் தலைவர்கள், இந்த முறை தங்களுக்குச் சாதகமான புதிய தொகுதிகளைத் தேர்வு செய்யும் முயற்சியில் இறங்கியுள்ளதாக அரசியல் வட்டாரங்களில் பேசப்படுகிறது.

திமுக, அதிமுக, பாஜக, நாம் தமிழர் உள்ளிட்ட முக்கிய கட்சிகளின் தலைவர்கள் பலரும், வரவிருக்கும் தேர்தலில் வெற்றி வாய்ப்பை உறுதி செய்ய தொகுதி மாற்றத்தை தீவிரமாக பரிசீலித்து வருகின்றனர். இதனால், தேர்தலுக்கு முன்பே அரசியல் களம் புதிய கணக்குகளுடன் நகரத் தொடங்கியுள்ளது.

பாஜக-வின் தேசிய மகளிர் அணித் தலைவரும், தற்போதைய கோவை தெற்கு தொகுதி எம்.எல்.ஏ-வுமான வானதி சீனிவாசன், கடந்த தேர்தலில் வெறும் 1,728 வாக்குகள் வித்தியாசத்தில் மட்டுமே வெற்றி பெற்றார். இந்த குறைந்த வாக்கு வித்தியாசம் அவருக்கு ஒருவித அரசியல் தயக்கத்தை ஏற்படுத்தியுள்ளதாக கூறப்படுகிறது. இதனால், வரும் தேர்தலில் கோவை வடக்கு தொகுதியில் போட்டியிட அவர் திட்டமிட்டு வருவதாக தகவல்கள் தெரிவிக்கின்றன.

நாம் தமிழர் கட்சியின் தலைமை ஒருங்கிணைப்பாளர் சீமான், கடந்த சட்டமன்றத் தேர்தலில் சென்னை திருவொற்றியூர் தொகுதியில் போட்டியிட்டு மூன்றாம் இடத்தைப் பிடித்தார். இந்த முறை அவர் தனது சொந்த மாவட்டமான சிவகங்கையில் உள்ள காரைக்குடி தொகுதியை குறிவைத்துள்ளதாக கூறப்படுகிறது. நாடாளுமன்றத் தேர்தலில் காரைக்குடியில் நாம் தமிழர் கட்சிக்கு கிடைத்த சுமார் 28 ஆயிரம் வாக்குகளும், அங்குள்ள உள்ளூர் செல்வாக்கும் இந்த முடிவுக்கு முக்கிய காரணமாக பார்க்கப்படுகிறது.

துணை முதல்வர் உதயநிதி ஸ்டாலின் தற்போது சென்னை சேப்பாக்கம்–திருவல்லிக்கேணி தொகுதியின் சட்டமன்ற உறுப்பினராக உள்ளார். இருப்பினும், வரும் தேர்தலில் அவர் தனது தாத்தா கலைஞர் கருணாநிதி போட்டியிட்ட பாரம்பரிய தொகுதியான திருவாரூருக்கு மாறக்கூடும் என்ற பேச்சுகள் அரசியல் வட்டாரங்களில் அடிபடுகின்றன.

மூத்த அமைச்சர் பொன்முடி, தனது தற்போதைய திருக்கோவிலூர் தொகுதியை மகனுக்குத் தந்து விட்டு, அவர் விழுப்புரம் அல்லது விக்கிரவாண்டி தொகுதியில் போட்டியிட திட்டமிட்டுள்ளதாகவும் தகவல்கள் வெளியாகியுள்ளன. அதேபோல், அதிமுகவின் சி.வி. சண்முகம் கடந்த தேர்தலில் விழுப்புரத்தில் தோல்வியை சந்தித்த நிலையில், இந்த முறை ரிஸ்க் எடுக்க விரும்பாமல் மயிலம் தொகுதியைத் தேர்வு செய்ய விருப்ப மனு அளித்துள்ளதாக கூறப்படுகிறது.

பாஜக முன்னாள் மாநிலத் தலைவர் அண்ணாமலை, கடந்த தேர்தலில் அரவக்குறிச்சியில் தோல்வியடைந்தார். ஆனால், சமீபத்திய நாடாளுமன்றத் தேர்தலில் கோவை மாவட்டத்தில் பாஜக கணிசமான வாக்குகளைப் பெற்றதை தொடர்ந்து, அவர் சூலூர், சிங்காநல்லூர் அல்லது திருப்பூர் மாவட்டத்தின் பல்லடம் ஆகிய தொகுதிகளில் ஒன்றைத் தேர்வு செய்யக்கூடும் என எதிர்பார்க்கப்படுகிறது.

தமிழக வாழ்வுரிமைக் கட்சித் தலைவர் வேல்முருகன், தற்போது உள்ள பண்ருட்டி தொகுதியிலிருந்து நெய்வேலிக்கு மாறத் திட்டமிட்டுள்ளதாக கூறப்படுகிறது. தொகுதி மறுசீரமைப்பிற்குப் பிறகு நெய்வேலி தொகுதி அவருக்கு சாதகமாக இருப்பதாக கருதப்படுகிறது.

மேலும், விடுதலைச் சிறுத்தைகள் கட்சியின் வன்னி அரசு வானூர் தொகுதியிலிருந்து எழும்பூர் அல்லது ஸ்ரீவில்லிபுத்தூருக்கு மாறலாம் என்றும், முன்னாள் அமைச்சர் வளர்மதி ஆலந்தூரிலிருந்து ஆயிரம் விளக்கு தொகுதிக்கு மாற வாய்ப்பு இருப்பதாகவும் தகவல்கள் தெரிவிக்கின்றன. அதேபோல், நயினார் நாகேந்திரன் சாத்தூர் தொகுதியையும், டாக்டர் மகேந்திரன் கோவை தெற்கு அல்லது பொள்ளாச்சி தொகுதியையும் தங்களது அடுத்த இலக்காக வைத்துள்ளதாக அரசியல் வட்டாரங்கள் கூறுகின்றன.

இந்த அனைத்து தொகுதி மாற்றங்களும் அதிகாரப்பூர்வ வேட்பாளர் பட்டியல் வெளியான பிறகே உறுதி செய்யப்படும் என்றாலும், 2026 சட்டமன்றத் தேர்தலுக்கு முன்னதாகவே தமிழக அரசியல் களம் பெரிய மாற்றங்களுக்கு தயாராகி வருவது தெளிவாகத் தெரிகிறது.