2024 மக்களவைத் தேர்தலின்போது பாரதிய ஜனதா கட்சி மட்டும் ரூ.1,494 கோடி செலவிட்டுள்ளதாக ஜனநாயக சீர்திருத்த சங்கம் (ADR) தெரிவித்துள்ளது. இது மொத்த தேர்தல் செலவில் 44.56% ஆகும்.

மார்ச் 16 முதல் ஜூன் 6 வரை, மக்களவை மற்றும் ஆந்திரா, அருணாச்சலப் பிரதேசம், ஒடிசா, சிக்கிம் ஆகிய மாநிலங்களில் நடைபெற்ற சட்டமன்றத் தேர்தல்களிலும் சேர்த்து, அரசியல் கட்சிகள் ரூ.3,352.81 கோடியைச் செலவிட்டுள்ளன.

இதில் தேசிய மற்றும் மாநிலக் கட்சிகள் 32-இல் பாஜக அதிக செலவுடன் முதலிடத்தைப் பிடித்துள்ளது. அதன் பின், காங்கிரஸ் ரூ.620 கோடி செலவிட்டு 18.5% பங்கை பெற்றுள்ளது. மொத்த செலவில், தேசிய கட்சிகள் ரூ.2,204 கோடிக்கு மேல் செலவிட்டுள்ளன. தேர்தலுக்காக இக்கட்சிகள் ரூ.6,930 கோடி வசூலித்துள்ளன; இதில் 93% தேசிய கட்சிகளின் வசூலாகும்.

முக்கிய செலவுப் பிரிவுகளில் விளம்பரத்துக்கே அதிகமாக ரூ.2,008 கோடி செலவிடப்பட்டுள்ளது (53%). பயணச் செலவுகள் ரூ.795 கோடியாகவும், வேட்பாளர்களுக்கான நிதி ரூ.402 கோடியாகவும், டிஜிட்டல் பிரச்சாரங்களுக்கு ரூ.132 கோடியாகவும், குற்றப் பின்னணி விளம்பரங்களுக்கு ரூ.28 கோடியாகவும் இருந்தது.

கிட்டத்தட்ட 60% நிதி எங்கே இருந்து வந்தது என்பது தெரியாத நிலைபாடு தொடருகிறது. சில கட்சிகள் போட்டியிட்டும், செலவு செய்ததாக பதிவு செய்யாததும் குறிப்பிடத்தக்கது.