சென்னை அமைந்தகரையில் நடைபெற்ற பா.ஜ.க பணிமனை திறப்பு விழாவில் பங்கேற்ற மாநிலத் தலைவர் நயினார் நாகேந்திரன், செய்தியாளர்களிடம் கட்சியின் தேர்தல் வியூகம் மற்றும் கூட்டணிக் குறித்துப் பேசியதாவது,

பிரதமர் வருகையும் பேச்சுவார்த்தையும்: சட்டசபை தேர்தல் பிரசாரத்திற்காக வரும் மார்ச் 1-ஆம் தேதி பிரதமர் மோடி தமிழகம் வருகிறார். அவரது வருகைக்குப் பின்னரே அ.தி.மு.க-வுடன் தொகுதிப் பங்கீடு குறித்த அதிகாரப்பூர்வப் பேச்சுவார்த்தைகள் தொடங்கும். எடப்பாடி பழனிசாமியுடன் ஆலோசித்த பிறகே இறுதி முடிவு எடுக்கப்படும் என அவர் தெளிவுபடுத்தினார்.

 வதந்திகளுக்கு முற்றுப்புள்ளி: மத்திய அமைச்சர் பியூஷ் கோயல் நாளை தமிழகம் வருவதாகவும், அ.தி.மு.க-வுடன் உடனே பேச்சுவார்த்தை நடக்கும் என்றும் வெளியான தகவல்களை அவர் திட்டவட்டமாக மறுத்தார்.

  அரசியல் அதிரடி: "தமிழகத்தில் விரைவில் தேசிய ஜனநாயகக் கூட்டணி ஆட்சி மலரும். எம்.ஜி.ஆர் வழியில் மக்களுக்காகப் பணியாற்றும் பா.ஜ.க-வில் 20 அமைச்சர்கள் வருவார்கள் என்று அதிரடியாகத் தெரிவித்தார்.

சமீபத்தில் சென்னையில் நடைபெற்ற கருத்தரங்கில் பேசிய எடப்பாடி பழனிசாமி, "தேசிய ஜனநாயகக் கூட்டணியில் ஆட்சியில் பங்கு என்ற பிரச்சனையே இல்லை" என்று குறிப்பிட்டிருந்தார் என்பது குறிப்பிடத்தக்கது.