2026 ஆம் ஆண்டு நடைபெற உள்ள தமிழக சட்டமன்றத் தேர்தலில், கடந்த மக்களவைத் தேர்தலில் இணைந்திருந்த கூட்டணி கட்சிகளுடன் மீண்டும் திமுக களம் காணும் என எதிர்பார்க்கப்படுகிறது. இந்த சூழலில், கடந்த தேர்தலில் திமுகவை எதிர்த்து போட்டியிட்ட நடிகரும் மக்கள் நீதி மய்யம் (மநீம) கட்சி தலைவருமான கமல்ஹாசன், இந்த முறை திமுகவுடன் கூட்டணி அமைத்து தேர்தலை சந்திக்க உள்ளதாக தகவல்கள் வெளியாகியுள்ளன. இதன் ஒரு பகுதியாக, மக்கள் நீதி மய்யம் கட்சிக்கு 2 சட்டமன்ற தொகுதிகளை ஒதுக்க திமுக முன்வந்துள்ளதாகவும் அரசியல் வட்டாரங்களில் பேசப்படுகிறது.

தமிழக அரசியலில் சினிமாவுக்கும் அரசியலுக்கும் இடையேயான தொடர்பு நீண்ட வரலாற்றைக் கொண்டது. கடந்த 60 ஆண்டுகளில் முதல்வர் பதவியையும், எதிர்க்கட்சி தலைவர் பதவியையும் அலங்கரித்த பலர் திரைத்துறையைச் சேர்ந்தவர்களாகவே இருந்துள்ளனர். அண்ணா தொடங்கி, கலைஞர் கருணாநிதி, எம்.ஜி.ஆர், ஜெயலலிதா, விஜயகாந்த் வரை – திரையுலகில் புகழ்பெற்ற பல கலைஞர்கள் அரசியலிலும் முக்கிய இடத்தைப் பிடித்துள்ளனர்.

அந்த வரிசையில், விஜயகாந்துக்குப் பிறகு அரசியலுக்கு வந்த மிகப் பெரிய நட்சத்திரம் என்றால் அது ‘உலகநாயகன்’ கமல்ஹாசன் தான். திரையுலகில் சகலகலா வல்லவனாக விளங்கிய அவர், அரசியல் கனவுடன் மதுரையில் ‘மக்கள் நீதி மய்யம்’ கட்சியை தொடங்கினார். “இடதும் இல்லை, வலதும் இல்லை – மய்யம்” என்ற கொள்கையுடன், அதிமுக, திமுக உள்ளிட்ட அனைத்து முக்கிய கட்சிகளையும் விமர்சித்து அரசியல் பயணத்தை தொடங்கினார்.

ஆனால், அதன் பிறகு நடைபெற்ற நாடாளுமன்ற மற்றும் சட்டமன்றத் தேர்தல்கள் கமல்ஹாசனுக்கு பெரிய வெற்றியைத் தரவில்லை. குறிப்பாக, 2021 சட்டமன்றத் தேர்தலில் கோவை தெற்கு தொகுதியில் போட்டியிட்டு, பாஜக வேட்பாளர் வானதி சீனிவாசனிடம் அவர் தோல்வியடைந்தார். இந்த தோல்விக்குப் பிறகு அவரது அரசியல் நிலைப்பாட்டில் மாற்றம் ஏற்பட்டதாகக் கூறப்படுகிறது. ராகுல் காந்தியுடன் நெருக்கம் காட்டத் தொடங்கிய கமல்ஹாசன், கடந்த மக்களவைத் தேர்தலில் திமுக கூட்டணிக்கு ஆதரவாக பிரச்சாரம் மேற்கொண்டார். சுமார் 10 தொகுதிகளில் பிரச்சாரம் செய்ததற்கான அரசியல் அங்கீகாரமாக, திமுக அவருக்கு மாநிலங்களவை உறுப்பினர் பதவியை வழங்கியது.

இந்நிலையில், 2026 சட்டமன்றத் தேர்தலுக்கான கூட்டணி அமைப்புப் பணிகளில் திமுக தீவிரமாக ஈடுபட்டு வருகிறது. காங்கிரஸ், விடுதலைச் சிறுத்தைகள், மறுமலர்ச்சி திராவிட முன்னேற்றக் கழகம், இந்திய கம்யூனிஸ்ட், மார்க்சிஸ்ட் கம்யூனிஸ்ட் உள்ளிட்ட கட்சிகள் திமுக கூட்டணியில் தொடரும் என கூறப்படுகிறது. இதற்கிடையே, கடந்த தேர்தலில் திமுகவை எதிர்த்து போட்டியிட்ட கமல்ஹாசன், இந்த முறை முதன்முறையாக திமுக கூட்டணியில் இணைவது அரசியல் ரீதியாக முக்கியமான திருப்பமாக பார்க்கப்படுகிறது.

திமுக தரப்பில் ஏற்கனவே ஒரு ஆரம்ப நிலை தொகுதி பங்கீடு பட்டியல் தயார் செய்யப்பட்டுள்ளதாக தகவல்கள் தெரிவிக்கின்றன. அதன்படி,

• காங்கிரசுக்கு சுமார் 25 தொகுதிகள்,

• இந்திய கம்யூனிஸ்ட் மற்றும் மார்க்சிஸ்ட் கம்யூனிஸ்ட் கட்சிகளுக்கு சேர்த்து 10 தொகுதிகள்,

• விடுதலைச் சிறுத்தைகள் கட்சிக்கு 7 தொகுதிகள்
  ஒதுக்கப்படலாம் என கூறப்படுகிறது.

இந்த பட்டியலில், மக்கள் நீதி மய்யம் கட்சிக்காக 2 தொகுதிகள் ஒதுக்கப்பட்டுள்ளதாகவும் தகவல் வெளியாகியுள்ளது. அதே நேரத்தில், பாமக போலவே, மக்கள் நீதி மய்யம் வேட்பாளர்கள் அறிவிக்கப்பட்டாலும், அவர்கள் திமுக சின்னத்திலேயே போட்டியிடும் வாய்ப்பு அதிகம் என திமுக வட்டாரங்கள் தெரிவிக்கின்றன.

மேலும், கமல்ஹாசன் இந்த முறை மீண்டும் கோவை தொகுதியில் களமிறங்கலாம் என்ற பேச்சும் அரசியல் வட்டாரங்களில் அடிபடத் தொடங்கியுள்ளது. இது உறுதி செய்யப்பட்டால், 2026 தேர்தலில் திமுக கூட்டணிக்கு சினிமா அரசியல் அனுபவமும், கமல்ஹாசனின் தனிப்பட்ட செல்வாக்கும் ஒரு கூடுதல் பலமாக அமையலாம் என அரசியல் பார்வையாளர்கள் கருதுகின்றனர்.