இயற்கை இனிப்பாகப் போற்றப்படும் தேன், உடல் எடையை கட்டுப்படுத்தும் முயற்சிகளில் ஒரு துணை சக்தியாக செயல்படக்கூடியது என்றாலும், அதை சீரான முறையிலும் அளவோடு பயன்படுத்துவதில்தான் அதன் உண்மையான பயன் மறைந்துள்ளது என சுகாதார நிபுணர்கள் தெரிவிக்கின்றனர்.

சுத்திகரிக்கப்பட்ட சர்க்கரைக்கு மாற்றாக தேனை பயன்படுத்துவது உடலுக்கு பல அடுக்குகளில் நன்மைகளை அளிக்கக்கூடியதாகும். தேனில் நிறைந்துள்ள ஆன்டிஆக்ஸிடன்ட்கள், வைட்டமின்கள் மற்றும் கனிமச் சத்துக்கள், உடலின் நோய் எதிர்ப்பு திறனை உயர்த்துவதோடு, பசியை கட்டுப்படுத்தும் தன்மையையும் கொண்டுள்ளதாக தெரிவிக்கப்படுகிறது.

குறிப்பாக, அதிகாலையில் வெதுவெதுப்பான நீரில் தேன் மற்றும் எலுமிச்சைச் சாறு கலந்து அருந்துவது, உடலின் வளர்சிதை மாற்ற வேகத்தை தூண்டி, கொழுப்பு எரிப்பு செயல்முறையை ஊக்குவிக்கக்கூடும். மேலும், ஓட்ஸ், தயிர் போன்ற சத்தான உணவுகளுடன் தேன் சேர்த்து உட்கொள்வது, நீண்ட நேரம் பசியை கட்டுப்படுத்தி தேவையற்ற உணவு உட்கொள்ளுதலைக் குறைக்க உதவுகிறது.

தேயிலை, காபி மற்றும் பழச்சாறுகளில் சர்க்கரைக்கு பதிலாக தேனை பயன்படுத்துவது, கூடுதல் கலோரி சேர்வதைத் தடுக்கும் ஒரு நுட்பமான வழியாக பார்க்கப்படுகிறது. ஆனால், இயற்கையானது என்பதற்காக தேனை அளவுக்கு மீறி எடுத்துக்கொள்ளலாம் என்ற எண்ணம் தவறானது என வலியுறுத்தப்படுகிறது.

உண்மையில், தேனும் அதிக கலோரி கொண்டதே; ஒரு தேக்கரண்டி தேனில் கூட கணிசமான ஆற்றல் உள்ளதால், அதை அதிகப்படியாக பயன்படுத்தினால் உடல் எடை கூடும் அபாயம் உருவாகும். எனவே, உடற்பயிற்சி, சமநிலையான உணவு முறைகள் மற்றும் போதிய உறக்கம் ஆகியவற்றுடன் இணைந்து பயன்படுத்தினால்தான் தேன் உண்மையான பலனை அளிக்கும் என்று தெரிவிக்கப்படுகிறது.

மேலும், தேன் செரிமானத்தை சீராக்கி குடல்நலத்தை மேம்படுத்துவதோடு, உடலுக்கு உடனடி ஆற்றல் வழங்கும் இயற்கை ஊட்டமாகவும் விளங்குகிறது.அதேசமயம், நீரிழிவு நோய் அல்லது இன்சுலின் எதிர்ப்பு பிரச்சனைகள் உள்ளவர்கள், தேனை பயன்படுத்துவதற்கு முன் மருத்துவர் அல்லது ஊட்டச்சத்து நிபுணரின் ஆலோசனையை பெறுவது அவசியம்.

ஏனெனில், தேன் ரத்த சர்க்கரை அளவை உயர்த்தக்கூடிய தன்மை கொண்டதாக இருக்கலாம்.மொத்தத்தில், தேனை ஒரு அதிசய மருந்தாக அல்லாது, ஆரோக்கியமான வாழ்க்கை முறையின் ஒரு பகுதியாக கருதி, கட்டுப்பாட்டுடன் பயன்படுத்தினால் மட்டுமே உடல் நலத்திற்கும் எடை மேலாண்மைக்கும் பயனளிக்கும் என்று தெரிவிக்கப்படுகிறது.