முகத்தின் இயற்கை அழகை மங்கச் செய்யும் பொதுவான சருமப் பிரச்சினைகளில் கரும்புள்ளிகள் முக்கிய இடம் பெறுகின்றன. குறிப்பாக மூக்கு மற்றும் அதைச் சுற்றியுள்ள பகுதிகளில் தோன்றும் இந்தச் சிறிய கருநிறப் புள்ளிகள், முகத்தின் பொலிவை குறைத்து காட்டுகின்றன. சருமத்தில் அதிகமாக சுரக்கும் எண்ணெய், இறந்த செல்கள், தூசித் துகள்கள் மற்றும் சுற்றுச்சூழல் மாசுக்கள் ஆகியவை சருமத் துளைகளில் தேங்கி அடைப்பை உருவாக்குகின்றன. பின்னர் அவை காற்றுடன் தொடர்பு கொள்ளும்போது நிறமாற்றம் அடைந்து கரும்புள்ளிகளாக மாறுகின்றன.மூக்குப் பகுதி இயல்பாகவே எண்ணெய் சுரப்பு அதிகம் காணப்படும் இடமாக இருப்பதால், அங்கு கரும்புள்ளிகள் உருவாகும் வாய்ப்பும் அதிகமாக உள்ளது. இருப்பினும் சில எளிய பராமரிப்பு முறைகளை தொடர்ந்து பின்பற்றினால், இந்தப் பிரச்சினையை கட்டுப்படுத்த முடியும்.

முகத் தூய்மையே முதல் தீர்வு
தினமும் காலை மற்றும் இரவு நேரங்களில் மென்மையான எண்ணெய் இல்லாத முகச் சுத்திகரிப்பானை பயன்படுத்தி முகத்தை கழுவுவது அவசியம். இது சருமத்தில் தேங்கும் அழுக்குகள் மற்றும் கூடுதல் எண்ணெயைப் போக்கி, துளைகள் அடைபடுவதைத் தடுக்கிறது. அதேசமயம் அடிக்கடி முகம் கழுவுவதும் சருமத்தை வறட்சியடையச் செய்யக்கூடும் என்பதால் அளவான பராமரிப்பே சிறந்தது.

நீராவி சிகிச்சை தரும் புத்துணர்வு
வாரத்திற்கு ஒருமுறை முகத்திற்கு நீராவி பிடிப்பது, அடைபட்ட துளைகளை திறக்க உதவுகிறது. இதன் மூலம் துளைகளுக்குள் சிக்கியிருக்கும் அழுக்குகள் மற்றும் எண்ணெய் படிவங்கள் தளர்ந்து வெளியேறுகின்றன. பின்னர் மென்மையான துணியால் முகத்தைத் துடைத்தால் சருமம் புத்துணர்ச்சியுடன் காணப்படும்.

இயற்கை வழிகளும் பயனளிக்கும்
உப்பு, கடலை மாவு மற்றும் சிறிதளவு தண்ணீர் சேர்த்து தயாரிக்கும் கலவையை கரும்புள்ளிகள் உள்ள பகுதியில் தடவி கழுவினால் இறந்த செல்கள் நீங்கி சருமம் சுத்தமடையும்.அதேபோல் முட்டையின் வெள்ளைக் கருவை மூக்கின் மேல் தடவி உலர்ந்த பின் கழுவுவது துளைகளில் இருக்கும் அழுக்குகளை அகற்ற உதவுகிறது. தேன் மற்றும் சர்க்கரை கலவையால் மென்மையாக தேய்ப்பதும் சருமத்தை சுத்தப்படுத்தும் இயற்கை முறையாக கருதப்படுகிறது.

உடனடி தீர்வுக்கு மூக்குப் பட்டைகள்

சந்தையில் கிடைக்கும் மூக்குப் பட்டைகள் கரும்புள்ளிகளை விரைவாக அகற்ற உதவுகின்றன. இருப்பினும் அவற்றை அளவுக்கு மீறி பயன்படுத்தாமல் வழிகாட்டுதலின்படி பயன்படுத்துவது நல்லது. இல்லையெனில் சருமத்தில் எரிச்சல் ஏற்பட வாய்ப்பு உள்ளது.

சிறப்பு அமிலங்கள் கொண்ட முகக் கழுவிகள்

சாலிசிலிக் அமிலம் அல்லது பீட்டா ஹைட்ராக்ஸி அமிலம் கலந்த முகச் சுத்திகரிப்பான்கள், சருமத் துளைகளுக்குள் ஊடுருவி அடைப்புகளை கரைக்க உதவுகின்றன. எண்ணெய் பசை அதிகம் உள்ள சருமம் கொண்டவர்களுக்கு இவை சிறந்த பலனை வழங்குகின்றன.

களிமண் முகமூடி தரும் கூடுதல் பாதுகாப்பு

வாரத்திற்கு ஒருமுறை களிமண் அடிப்படையிலான முகமூடியைப் பயன்படுத்துவது, அதிகப்படியான எண்ணெயை உறிஞ்சி சருமத் துளைகளை ஆழமாக சுத்தப்படுத்த உதவுகிறது. இதன் மூலம் புதிய கரும்புள்ளிகள் உருவாகும் வாய்ப்பு குறைகிறது.

சூரியக் கதிர்களிலிருந்து பாதுகாப்பு அவசியம்

சருமத்தை ஆரோக்கியமாக வைத்திருக்க தினமும் சூரிய ஒளி பாதுகாப்பு கிரீமை பயன்படுத்த வேண்டும். இது சரும சேதத்தைத் தடுக்குவதோடு, முகப்பரு மற்றும் கரும்புள்ளிகள் தீவிரமடைவதையும் கட்டுப்படுத்துகிறது.

ஒப்பனை நீக்காமல் உறங்காதீர்கள்

ஒப்பனைப் பொருட்களை பயன்படுத்துபவர்கள் இரவு உறங்குவதற்கு முன் அவற்றை முழுமையாக அகற்ற வேண்டும். இல்லையெனில் துளைகள் அடைபட்டு கரும்புள்ளிகள் மற்றும் முகப்பருக்கள் அதிகரிக்கக்கூடும்.

கிள்ளி அகற்ற முயற்சிக்காதீர்கள்

கரும்புள்ளிகளை நகங்களால் அழுத்தி அகற்றுவது சருமத்தில் காயம், தழும்பு மற்றும் தொற்று பாதிப்புகளுக்கு வழிவகுக்கலாம். எனவே இத்தகைய முயற்சிகளை தவிர்ப்பதே பாதுகாப்பானது.

உணவுப் பழக்கமும் முக்கியம்

புதிய பழங்கள், காய்கறிகள், போதிய தண்ணீர் மற்றும் வைட்டமின் சத்துகள் நிறைந்த உணவுகள் சருமத்தை உள்ளிருந்து ஆரோக்கியமாக வைத்திருக்க உதவுகின்றன. அதிக எண்ணெய் மற்றும் பதப்படுத்தப்பட்ட உணவுகளை குறைப்பதும் நல்ல பலனை அளிக்கும்.

தலையணை உறை, கைபேசி சுத்தமும் அவசியம்

தினசரி பயன்படுத்தப்படும் கைபேசி திரைகள் மற்றும் தலையணை உறைகளில் கிருமிகளும் எண்ணெய் படிவங்களும் தேங்கக்கூடும். அவற்றை சுத்தமாக வைத்திருப்பது சருமப் பிரச்சினைகளைத் தவிர்க்க உதவும்.

நல்ல தூக்கம்... நல்ல சருமம்

போதிய தூக்கமின்மை மற்றும் மனஅழுத்தம் ஹார்மோன் மாற்றங்களை ஏற்படுத்தி எண்ணெய் சுரப்பை அதிகரிக்கச் செய்யலாம். இதனால் கரும்புள்ளிகள் மற்றும் முகப்பருக்கள் அதிகரிக்கும். தினமும் 7 முதல் 8 மணி நேரம் வரை நிம்மதியான உறக்கம் பெறுவது சரும ஆரோக்கியத்திற்கு அவசியமானது.சருமத்தை தொடர்ந்து சுத்தமாக வைத்திருப்பதும், பொருத்தமான பராமரிப்பு முறைகளை பின்பற்றுவதும், ஆரோக்கியமான வாழ்க்கை முறையை கடைபிடிப்பதும் கரும்புள்ளிகளை நீக்கவும் மீண்டும் உருவாகாமல் தடுக்கவும் மிகவும் பயனுள்ளதாக அமைகிறது. சிறிய கவனிப்பே முகத்தின் இயற்கை அழகை நீண்ட காலம் பாதுகாக்கும்.