கோடை வெப்பம் அதிகரிக்கும் காலங்களில் பாம்புகளின் நடமாட்டமும் கணிசமாக உயர்வது இயல்பான ஒன்றாகும். அதிக சூட்டிலிருந்து தப்பிக்க குளிர்ச்சியான இடங்கள், அமைதியான சூழல்கள் மற்றும் எளிதில் இரை கிடைக்கும் பகுதிகளைத் தேடி பாம்புகள் வீடுகள், தோட்டங்கள், கொட்டகைகள் மற்றும் பசுமை சூழல் நிறைந்த இடங்களுக்கு நுழையக்கூடும்.

குறிப்பாக கிராமப்புறங்கள் மற்றும் செடிகொடிகள் சூழ்ந்த பகுதிகளில் இந்த அபாயம் அதிகமாக இருப்பதாக நிபுணர்கள் எச்சரிக்கின்றனர்.இதனால், வீட்டைச் சுற்றியுள்ள சூழலை பாதுகாப்பாக பராமரிப்பது மிகவும் அவசியமானதாக பார்க்கப்படுகிறது. முன்கூட்டியே சில எளிய முன்னெச்சரிக்கை நடவடிக்கைகளை மேற்கொண்டால், பாம்புகள் வீட்டிற்குள் நுழைவதை பெருமளவில் தடுக்க முடியும் என தெரிவிக்கப்படுகிறது.

பழங்குடியின மக்கள் தலைமுறைகளாக பயன்படுத்தி வரும் சில இயற்கை முறைகளும் இன்றளவும் பல இடங்களில் பின்பற்றப்பட்டு வருகின்றன. வீட்டைச் சுற்றி வசம்பு செடியை வளர்ப்பதால் அதன் துர்நாற்றம் பாம்புகளை அப்புறப்படுத்தும் என நம்பப்படுகிறது. அதேபோல், தேங்காய் புண்ணாக்கை எரிக்கும் போது உருவாகும் புகை மற்றும் மணம் பாம்புகளுக்கு விருப்பமில்லாததாக இருப்பதால் அவை அந்த பகுதியை தவிர்க்கும் என கிராமப்புற மக்கள் தெரிவிக்கின்றனர்.

மேலும் தலைச்சுருளி போன்ற செடிகளை வீட்டைச் சுற்றி வளர்ப்பதும் பாதுகாப்பு முறையாக கருதப்படுகிறது.வீட்டின் சுற்றுப்புறத்தை எப்போதும் தூய்மையாக வைத்திருப்பது மிக முக்கியமான பாதுகாப்பு நடவடிக்கையாகும். அதிகமாக வளர்ந்த புல்கள், புதர்கள் மற்றும் கொடிகளை அடிக்கடி அகற்ற வேண்டும்.

மரக்கட்டைகள், பழைய டயர்கள், குப்பைகள் மற்றும் தேவையற்ற பொருட்களை வீட்டின் அருகில் குவித்து வைப்பதை தவிர்க்க வேண்டும். இவை பாம்புகளுக்கும், அவற்றின் முக்கிய இரையான எலிகளுக்கும் பாதுகாப்பான மறைவிடமாக மாறக்கூடும்.குறிப்பாக இரவு நேரங்களில் வீட்டின் வெளிப்புறம் இருட்டாக இல்லாமல் போதிய வெளிச்ச வசதிகளை ஏற்படுத்துவது அவசியம். அதிக வெளிச்சம் உள்ள இடங்களுக்கு பாம்புகள் வருவதற்கான வாய்ப்பு குறைவாக இருக்கும் என தெரிவிக்கப்படுகிறது.

வீட்டுச் சுவர்களில் காணப்படும் சிறிய துளைகள், கதவுகளின் அடிப்பகுதி இடைவெளிகள், நீர்குழாய்கள் செல்லும் ஓட்டைகள் போன்றவற்றை உடனடியாக அடைத்துவிட வேண்டும். மழைநீர் வடிகால் மற்றும் கழிவுநீர் குழாய்களை அடிக்கடி சுத்தம் செய்து பராமரிப்பதும் அவசியம்.மேலும், தோட்டங்களில் கற்கள் குவிந்த பகுதிகள் மற்றும் பழைய மரவேர் இடங்களையும் சீரமைத்து வைத்திருக்க வேண்டும்.

வீட்டைச் சுற்றி எலி வளைகள் அல்லது பொந்துகள் இருந்தால் அவற்றை மண் அல்லது கற்களால் மூடி பாதுகாப்பாக்க வேண்டும். ஏனெனில் எலிகள் அதிகம் காணப்படும் இடங்களைத் தேடி பாம்புகளும் அங்கு வரக்கூடும்.சில தாவரங்களின் மணத்தை பாம்புகள் விரும்பாது என பொதுவாக தெரிவிக்கப்படுகிறது.

அதன்படி சாமந்திப்பூ, எலுமிச்சைப்புல், பூண்டு செடி, வெங்காயச் செடி, துளசி மற்றும் பாம்புச் செடி போன்றவற்றை வீட்டைச் சுற்றி வளர்ப்பது பாதுகாப்பு சூழலை உருவாக்க உதவக்கூடும். குறிப்பாக எலுமிச்சைப்புல் மற்றும் பூண்டு செடிகளின் கடுமையான மணம் பாம்புகளை அப்புறப்படுத்த உதவும் என கிராமப்புறங்களில் நம்பப்படுகிறது.

இரவு நேரங்களில் வீட்டின் வெளியே காலணி அணியாமல் நடப்பதை தவிர்க்க வேண்டும். அதேபோல், குப்பைகள் அல்லது மரக்கட்டைகளை கைகளால் நேரடியாக நகர்த்தாமல் கம்பி அல்லது கருவிகளை பயன்படுத்துவது பாதுகாப்பான முறையாகும். குழந்தைகள் தோட்டம் மற்றும் வெளிப்புற பகுதிகளில் விளையாடும் போது பெரியவர்கள் கண்காணிப்பதும் அவசியம்.

ஒருவேளை பாம்பு வீட்டிற்குள் அல்லது அருகில் காணப்பட்டால், அதை தானாக பிடிக்க முயற்சிக்காமல் உடனடியாக வனத்துறை அதிகாரிகள் அல்லது பாம்பு மீட்புப் பணியாளர்களுக்கு தகவல் தெரிவிப்பதே பாதுகாப்பான மற்றும் சிறந்த நடைமுறையாக கருதப்படுகிறது.