மழைக்காலத்தில் வீடுகளை நோக்கி பாம்புகள் வருவது ஏன்? நிபுணர்கள் கூறும் முக்கிய காரணங்கள்
மழைக்காலம் தொடங்கியவுடன் குடியிருப்பு பகுதிகளில் பாம்புகள் அதிகமாகக் காணப்படுகின்றன என்ற கருத்து பொதுமக்களிடையே பரவலாக நிலவி வருகிறது. உண்மையில், பாம்புகள் மனிதர்களைத் தேடி வருவதில்லை. இயற்கையாகவே தனிமையை விரும்பும் இவ்வகை உயிரினங்கள், உணவு, தண்ணீர் மற்றும் பாதுகாப்பான தங்குமிடங்களை நாடியே மனிதர்கள் வசிக்கும் இடங்களுக்கு அருகில் வருவதாக வனவிலங்கு ஆர்வலர்கள் தெரிவிக்கின்றனர்.பாம்புகளின் முக்கிய தனிச்சிறப்புகளில் ஒன்று அவற்றின் கூர்மையான வாசனை உணர்வு. இரையை கண்டறிவதற்கும், பாதுகாப்பான சூழலை அடையாளம் காண்வதற்கும் இந்த திறனை அவை அதிகமாக பயன்படுத்துகின்றன. இதன் காரணமாக சில குறிப்பிட்ட வாசனைகளும் சுற்றுப்புற சூழல்களும் பாம்புகளை ஈர்க்கும் காரணிகளாக மாறுகின்றன.

எலிகள் இருந்தால் பாம்புகளும் வரலாம்
பெரும்பாலான பாம்புகளின் முதன்மை உணவாக எலிகள் திகழ்கின்றன. வீட்டைச் சுற்றி எலிகள் அதிகமாக இருந்தால், அவற்றின் கழிவுகள் மற்றும் சிறுநீரின் வாசனை பாம்புகளை எளிதில் ஈர்க்கக்கூடும். உணவைத் தேடி வரும் பாம்புகள் பின்னர் அந்த இடங்களை அடிக்கடி நாடும் சூழல் உருவாகலாம்.எனவே, உணவுப் பொருட்களை திறந்த நிலையில் வைக்காமல் பாதுகாப்பாக சேமித்தல், சுவர்கள் மற்றும் தரைப்பகுதிகளில் உள்ள ஓட்டைகள், விரிசல்கள் ஆகியவற்றை அடைத்தல் போன்ற நடவடிக்கைகள் அவசியமாக கருதப்படுகின்றன.

பறவைக் கூடுகளும் ஈர்ப்புக் காரணம்
சில பாம்பு இனங்கள் பறவைகள் மற்றும் அவற்றின் முட்டைகளை உணவாக உட்கொள்கின்றன. இதனால் பறவைகளின் கழிவுகள் மற்றும் கூடுகளின் வாசனை அவற்றை ஈர்க்கக்கூடும். வீட்டைச் சுற்றியுள்ள மரங்களில் அதிகளவில் பறவைகள் கூடுகட்டியிருப்பது அல்லது தொடர்ந்து உணவளிக்கப்படுவது போன்ற சூழல்கள் பாம்புகளின் வருகைக்கு வழிவகுக்கலாம்.அதேபோல், அடர்ந்த புதர்கள் மற்றும் பராமரிப்பின்றி காணப்படும் தோட்டங்கள் பாம்புகளுக்கு பாதுகாப்பான மறைவிடங்களாக மாறுகின்றன.

நீர்த் தேக்கங்களும் ஆபத்து
மீன்கள், தவளைகள் மற்றும் நீரில் வாழும் சிறிய உயிரினங்களை உணவாகக் கொள்ளும் பாம்புகள், நீர்நிலைகள் உள்ள பகுதிகளை அதிகம் நாடுகின்றன. வீட்டின் அருகே நீர் தேங்கியிருப்பது, திறந்த கிணறுகள், சிறிய குளங்கள் அல்லது பராமரிக்கப்படாத நீர்த் தொட்டிகள் இருப்பது போன்றவை பாம்புகளை ஈர்க்கும் வாய்ப்பை அதிகரிக்கின்றன.இதனால் தேவையற்ற நீர்த் தேக்கங்களை அகற்றி, சுற்றுப்புறத்தை சுத்தமாக பராமரிப்பது பாதுகாப்பிற்கான முக்கிய நடவடிக்கையாக கருதப்படுகிறது.

ஒரு பாம்பின் தடம் மற்றொரு பாம்பை வரவழைக்குமா?
பாம்புகள் பெரோமோன் எனப்படும் வேதியியல் சமிக்ஞைகள் மூலம் ஒன்றுக்கொன்று தகவல்களை பரிமாறிக்கொள்கின்றன. ஒரு இடத்தில் ஏற்கனவே பாம்பு நடமாட்டம் இருந்திருந்தால், அது விட்டுச் செல்லும் வாசனைத் தடயங்கள் மற்ற பாம்புகளையும் அந்தப் பகுதிக்கு ஈர்க்கக்கூடும் என்று வல்லுநர்கள் தெரிவிக்கின்றனர்.இதனால், ஒருமுறை பாம்பு காணப்பட்ட இடங்களில் தொடர்ந்து கண்காணிப்பு மற்றும் முன்னெச்சரிக்கை நடவடிக்கைகள் மேற்கொள்வது அவசியமாகிறது.

சுற்றுப்புற சுத்தமே சிறந்த பாதுகாப்பு
வீட்டைச் சுற்றி குவித்து வைக்கப்படும் மரக்கட்டைகள், பழைய கட்டுமானப் பொருட்கள், கற்கள், உலர்ந்த இலைகள் மற்றும் குப்பைக் குவியல்கள் பாம்புகளுக்கு பாதுகாப்பான பதுங்கிடங்களாக மாறுகின்றன. அதேபோல் உயரமாக வளர்ந்த புற்கள் மற்றும் பராமரிக்கப்படாத தோட்டங்களும் அவற்றின் தங்குமிடமாக அமையக்கூடும்.எனவே, வீட்டின் சுற்றுப்புறத்தை தூய்மையாக பராமரித்தல், புதர்களை அகற்றுதல் மற்றும் தேவையற்ற பொருட்களை அப்புறப்படுத்துதல் போன்றவை பாம்புகளின் நடமாட்டத்தை குறைக்கும் பயனுள்ள வழிமுறைகளாகும்.

நிபுணர்கள் வழங்கும் அறிவுரை
பாம்புகள் பொதுவாக மனிதர்களைத் தாக்கும் நோக்கத்துடன் வருவதில்லை. ஆனால் அவற்றிற்கு தேவையான உணவு, தண்ணீர் மற்றும் பாதுகாப்பான சூழல் அறியாமலே உருவாக்கப்பட்டால், அவை மனிதர்கள் வாழும் பகுதிகளுக்கு அடிக்கடி வரக்கூடும்.எலிகளின் எண்ணிக்கையை கட்டுப்படுத்துதல், நீர் தேங்காமல் பார்த்துக்கொள்ளுதல், அடர்ந்த புதர்கள் மற்றும் குப்பைக் குவியல்களை அகற்றுதல் போன்ற எளிய முன்னெச்சரிக்கை நடவடிக்கைகள் மூலம் பாம்புகள் வீடுகளை அணுகும் வாய்ப்பை கணிசமாகக் குறைக்க முடியும் என வனவிலங்கு நிபுணர்கள் வலியுறுத்துகின்றனர்.