நம் பாரம்பரிய விழாக்கள், பண்டிகைகள், திருமணங்கள் மற்றும் சுபநிகழ்ச்சிகள் என்றாலே பெண்களின் நினைவில் முதலில் மலர்வது கைகளில் மருதாணி பூசும் அழகிய தருணம்தான். கைகளில் மருதாணி எவ்வளவு அழகாகவும் அடர் சிவப்பாகவும் பதிகிறதோ, அந்த நாள் அதே அளவு சிறப்பாக அமையும் என்ற நம்பிக்கையும் பலரிடையே உள்ளது.

மருதாணி அரைக்கும் போது கவனிக்க வேண்டியது
மருதாணி இலைகளை மிக்சியிலோ அல்லது அம்மியிலோ அரைக்கும் முன், சிறிய நெல்லிக்காய் அளவு புளி மற்றும் 2 பாக்குகளை சேர்த்து சிறிதளவு தண்ணீருடன் அரைத்துக் கொள்ள வேண்டும்.இவ்வாறு அரைத்தால் மருதாணி கைகளில் ஆழமான சிவப்பு நிறத்தில் அழகாகப் பதியும்.புளியில் உள்ள இயற்கை அமிலத்தன்மை, மருதாணி இலையில் இருக்கும் நிறச்சத்தை விரைவாக வெளிப்படுத்த உதவுகிறது.அதேபோல், பாக்கின் துவர்ப்புத் தன்மை மருதாணியின் நிறத்தை அடர்த்தியாக்கி நீண்ட நேரம் மங்காமல் வைத்திருக்க உதவுகிறது.

அழகான டிசைன் தேர்வு முக்கியம்
கைகளின் வடிவம் மற்றும் அளவுக்கு ஏற்ற மருதாணி வடிவங்களை தேர்வு செய்தால் கைகளின் அழகு பல மடங்கு அதிகரிக்கும்.அரபிக் வடிவம், மண்டலா கலை வடிவம், இடைவெளி வடிவமைப்பு மற்றும் மணப்பெண் பார்டர் வடிவங்கள் போன்றவை கைகளுக்கு பிரம்மாண்டமான தோற்றத்தை தரும்.

எலுமிச்சை - சர்க்கரை கலவை
மருதாணி கைகளில் காய்ந்த பிறகு எளிதில் உதிர்ந்து விடாமல் இருக்க, சர்க்கரை மற்றும் எலுமிச்சை சாறு கலந்த கலவையை பஞ்சு உதவியுடன் மெதுவாக மருதாணி மீது தடவ வேண்டும்.சர்க்கரை மருதாணி கைகளில் நன்றாக ஒட்ட உதவுகிறது. எலுமிச்சை சாறு நிறத்தை மேலும் ஆழமாக மாற்றுகிறது.

எண்ணெய் தடவுவது அவசியம்
மருதாணி முழுமையாக காய்ந்த பிறகு அதை மெதுவாக உதிர்த்துவிட்டு, உடனே கைகளில் தண்ணீர் படாமல் கவனிக்க வேண்டும்.அதன் பிறகு கடுகு எண்ணெய் அல்லது வீட்டில் பயன்படுத்தும் தைலத்தை கைகளில் தடவி மெதுவாக மசாஜ் செய்ய வேண்டும்.இது கைகளுக்கு வெப்பத்தை அளித்து மருதாணியின் நிறத்தை மேலும் அடர்த்தியாக்கும்.

கிராம்பு புகையின் மந்திரம்
மருதாணியை உதிர்க்கும் முன், ஒரு தவாவில் 4 முதல் 5 கிராம்புகளை போட்டு சூடாக்க வேண்டும்.அதில் இருந்து வரும் புகையில் கைகளை சில நொடிகள் காட்டினால், அந்த வெப்பம் மருதாணியின் நிறத்தை பல மடங்கு அதிகரிக்க உதவும்.

தவிர்க்க வேண்டிய முக்கிய விஷயங்கள்
மருதாணி வைத்த உடனேயே கைகளை சோப்பு அல்லது குளிர்ந்த நீரால் கழுவக்கூடாது.குறைந்தது 8 முதல் 10 மணி நேரம் தண்ணீர் படாமல் இருந்தால் சிறந்த நிறம் கிடைக்கும்.மேலும், மருதாணியை விரைவாக உலரச் செய்ய சூடான காற்று கருவி அல்லது மின்விசிறி காற்றை பயன்படுத்தக் கூடாது.இது மருதாணியின் இயற்கை நிறத்தை பாதித்து, அதன் அழகை குறைத்து விடும்.இந்த எளிய வழிமுறைகளை பின்பற்றினால், உங்கள் கைகளில் மருதாணி அடர் சிவப்பாகப் பதிந்து நீண்ட நாட்கள் அழகை தக்கவைத்திருக்கும்.