கழிப்பறைகளில் தோன்றும் மஞ்சள் மற்றும் பழுப்பு நிற வளையத் தடங்கள், சுண்ணாம்புப் படிவங்கள் போன்றவை பல இல்லங்களில் அடிக்கடி எதிர்கொள்ளப்படும் சுகாதாரச் சவால்களாக உள்ளன. குறிப்பாக கனிமச்சத்துகள் அதிகம் கலந்த கடின நீர் பயன்படுத்தப்படும் பகுதிகளில் இவ்வகை படிவங்கள் விரைவாக உருவாகி, நாளடைவில் அகற்ற முடியாத அளவுக்கு உறுதியாக ஒட்டிக்கொள்கின்றன.

ஆனால் சமையலறையில் எளிதில் கிடைக்கும் சமையல் சோடா மற்றும் வெள்ளை வினிகர் ஆகியவற்றின் உதவியால் இத்தகைய கறைகளை சிரமமின்றி நீக்க முடியும். முறையாகப் பராமரித்தால் கழிப்பறை மீண்டும் புத்தம் புதிய தோற்றத்தைப் பெறும்.

முதற்கட்டமாக, கழிப்பறை கிண்ணத்தில் இருக்கும் நீரை முடிந்தவரை வெளியேற்ற வேண்டும். இதற்காக நீர் வழங்கும் வால்வை மூடி, ஒருமுறை ஃப்ளஷ் செய்து தேங்கியிருக்கும் நீரை காலி செய்யலாம். அதன் பின்னர் சிறிய பாத்திரம் அல்லது தூரிகையின் உதவியுடன் மீதமுள்ள நீரையும் வடிகாலுக்குள் தள்ளிவிட வேண்டும்.

கறை படிந்த பகுதிகள் முழுமையாக வெளிப்பட்டவுடன் சுத்திகரிப்பு கலவைகள் நேரடியாகச் செயல்படத் தொடங்கும்.அடுத்ததாக, ஒரு கப் வெள்ளை வினிகரை கழிப்பறை கிண்ணத்தில் ஊற்றி, தூரிகையின் மூலம் அனைத்துப் பகுதிகளிலும் சமமாகப் பரவச் செய்ய வேண்டும். ஒரு நிமிடம் கழித்து ஒரு கப் சமையல் சோடாவைச் சேர்த்து, அதன் மேல் மேலும் ஒரு கப் வினிகரை ஊற்ற வேண்டும். இந்த இரண்டு பொருட்களும் ஒன்றுடன் ஒன்று வினைபுரியும் போது உருவாகும் நுரை, சுண்ணாம்புப் படிவங்கள், தாதுக் கழிவுகள் மற்றும் ஒட்டிக்கிடக்கும் அழுக்குகளை மெதுவாகத் தளர்த்தத் தொடங்கும்.

இந்தக் கலவையை குறைந்தபட்சம் ஒரு மணி நேரம் அப்படியே வைத்திருப்பது நல்லது. கறைகள் மிகவும் கடினமாக இருந்தால் இரவு முழுவதும் ஊறவிடலாம்.பின்னர் கழிப்பறை தூரிகையைக் கொண்டு கிண்ணத்தின் அனைத்துப் பகுதிகளையும் நன்கு தேய்த்து சுத்தம் செய்ய வேண்டும். குறிப்பாக நீர் மட்டம் காணப்படும் பகுதியில் உருவாகும் வளையத் தடங்கள் மற்றும் உறுதியான தாதுப் படிவங்களை அகற்றுவதற்கு கழிப்பறை சுத்தம் செய்யப் பயன்படுத்தப்படும் பியூமிஸ் கல் உதவிகரமாக இருக்கும்.

எனினும், பீங்கான் மேற்பரப்பில் கீறல்கள் ஏற்படாத வகையில் கல்லையும் சுத்தம் செய்யும் பகுதியையும் எப்போதும் ஈரப்பதத்துடன் வைத்திருக்க வேண்டும்.

அதிக அழுத்தம் கொடுக்காமல் மென்மையாகத் தேய்ப்பதே பாதுகாப்பான முறையாகும்.சுத்தம் செய்த பிறகு நீர் வால்வை மீண்டும் திறந்து, கழிப்பறையை ஃப்ளஷ் செய்து அனைத்து அழுக்குகளையும் வெளியேற்ற வேண்டும். தேவைப்பட்டால் மீண்டும் ஒரு முறை தூரிகையால் தேய்த்து இறுதிச் சுத்தம் செய்யலாம்.

இதன் மூலம் பழைய கறைகள், துர்நாற்றம் மற்றும் படிந்த கழிவுகள் பெருமளவில் அகற்றப்படும்.கறைகள் மீண்டும் உருவாகாமல் தடுக்க சில எளிய பராமரிப்பு நடவடிக்கைகளையும் பின்பற்றலாம்.

வாரத்திற்கு ஒருமுறையாவது கழிப்பறையை முழுமையாகச் சுத்தம் செய்வது நல்லது. மாதத்திற்கு ஒருமுறை வினிகரை ஊற்றி சில மணி நேரம் ஊறவைத்து சுத்தம் செய்தால் சுண்ணாம்புப் படிவங்கள் தேங்குவதைத் தடுக்க முடியும். மேலும், கடின நீர் அதிகம் உள்ள பகுதிகளில் நீர் மென்மையாக்கும் அமைப்புகளைப் பயன்படுத்துவது பயனளிக்கும்.

போராக்ஸ் அல்லது மென்மையான சுத்திகரிப்புப் பொடிகளை அவ்வப்போது பயன்படுத்துவதும் புதிய கறைகள் உருவாகுவதை கட்டுப்படுத்தும்.

வீட்டில் எளிதாகக் கிடைக்கும் இந்த இயற்கைச் சுத்திகரிப்பு பொருட்கள், விலையுயர்ந்த இரசாயனப் பொருட்களின் தேவையை குறைத்து, கழிப்பறையை சுத்தமாகவும் சுகாதாரமானதாகவும் பராமரிக்க உதவுகின்றன. தொடர்ச்சியான கவனிப்பும் முறையான பராமரிப்பும் இருந்தால், பிடிவாதமான கழிப்பறைக் கறைகள் உருவாகும் வாய்ப்பு கணிசமாகக் குறையும்.