முத்தலாக், நிக்காஹ் ஹலாலா உள்ளிட்ட நடைமுறைகளால் பாதிக்கப்பட்டு ஆதரவற்ற நிலைக்குத் தள்ளப்பட்டுள்ள முஸ்லிம் பெண்களுக்கு இலவசக் குடியிருப்புகளை வழங்கி மறுவாழ்வு அளிக்க உத்தராகண்ட் மாநில அரசு அதிரடியாக முடிவு செய்துள்ளது. இத்திட்டம் உத்தராகண்ட் வஃக்பு வாரியத்தின் மூலம் முழுமையாக அமல்படுத்தப்படவுள்ளது.

வஃக்பு வாரிய நிலங்கள் மீட்பு & வீடுகள் உருவாக்கம்:

இத்திட்டம் குறித்துப் பேசிய உத்தராகண்ட் வஃக்பு வாரியத் தலைவர் ஷதாப் ஷம்ஸ், மாநிலத்தில் உள்ள ஒவ்வொரு மாவட்டத்திலும் வஃக்பு வாரியத்திற்குச் சொந்தமான ஆயிரக்கணக்கான ஏக்கர் நிலங்கள் உள்ளதாகத் தெரிவித்தார். அந்த நிலங்களில் உள்ள சட்டவிரோத ஆக்கிரமிப்புகள் அனைத்தும் உடனடியாக அகற்றப்பட்டு, மீட்கப்படும் நிலங்கள் மற்றும் கட்டிடங்கள் பாதிக்கப்பட்ட பெண்களின் தங்கிவாழும் உரிமைக்காகவும், அவர்களுக்குப் புதிய குடியிருப்புகள் கட்டுவதற்காகவும் பயன்படுத்தப்படும் என அவர் உறுதியளித்தார்.

பாதிக்கப்பட்ட பெண்களுக்குப் பாதுகாப்பு:

பொதுவாக முஸ்லிம் சமுதாயத்தில் முத்தலாக் நடைமுறைக்குப் பிறகு பெண்கள் உடனடியாகக் கைவிடப்பட்டுத் துயரத்திற்கு ஆளாவதும், கணவர் மறுமணம் செய்து கொள்வதும் தொடர்கதையாக உள்ளது. இத்தகைய சூழலில், ஆதரவற்று நிற்கும் பெண்களுக்குப் பாதுகாப்பான இருப்பிடத்தை வழங்கி, அவர்களைச் சமூகத்தின் முதன்மை நீரோட்டத்தில் இணைப்பதே இத்திட்டத்தின் முதன்மை நோக்கமாகும் என பாஜக தலைமையிலான உத்தராகண்ட் அரசு தெரிவித்துள்ளது.

பொது சிவில் சட்டப் பின்னணி:

இந்தியாவிலேயே முதன்முறையாகப் பொது சிவில் சட்டத்தை (UCC) நிறைவேற்றிய பெருமையைப் பெற்ற உத்தராகண்ட் அரசு, மத்திய அரசு சட்டத்திற்கு அப்பால் மாநில அளவிலும் முத்தலாக்கை முற்றிலுமாகத் தடை செய்துள்ளது. இருப்பினும், கடந்த காலங்களில் முத்தலாக்கால் பாதிக்கப்பட்ட ஏராளமான பெண்கள் இன்னமும் சரியான வாழ்வாதாரமின்றித் தவித்து வருகின்றனர். அவர்களுக்கு உதவும் வகையில் கொண்டுவரப்பட்டுள்ள இத்திட்டம், பொது சிவில் சட்டத்திற்கு முஸ்லிம் சமூக மக்களிடையே எழும் எதிர்ப்புகளைக் குறைத்து, நேர்மறையான ஆதரவைப் பெறுவதற்கான அரசின் முக்கிய நகர்வாகப் பார்க்கப்படுகிறது.