சிவமொக்கா மாவட்டம் லக்கினகொப்பா கிராமத்தின் வித்யாநகர் பகுதியில், 9 வயதுடைய சிறுமி தனது பெற்றோருடன் அமைதியாக வாழ்ந்து வந்தாள். அப்பகுதியில் உள்ள தனியார் பள்ளியில் 4-ம் வகுப்பு படித்து வந்த அவள், தற்போது 5-ம் வகுப்பிற்கு முன்னேற தயாராக இருந்தாள். கோடை விடுமுறையை முன்னிட்டு, சித்தி வீட்டில் சில நாட்கள் கழித்து மீண்டும் தன் இல்லத்திற்கு திரும்பியிருந்தாள்.

இந்தச் சூழலில், கடந்த முன்தினம் வீட்டில் தனியாக இருந்த சிறுமி, குழந்தைத்தனமான மகிழ்ச்சியில் ஊஞ்சல் கட்டி விளையாடிக் கொண்டிருந்தாள். ஆனால் அந்த சின்னச் சின்ன விளையாட்டு தருணமே விபரீதமாக மாறியது.

ஊஞ்சல் கயிறு திடீரென கழுத்தை இறுக்கிப் பிடித்ததால், அவள் சிக்கி உயிரிழந்ததாக தெரிவிக்கப்படுகிறது.அந்த நேரத்தில் வீட்டில் யாரும் இல்லாததால், இந்த துயரச் சம்பவம் உடனடியாக யாருக்கும் தெரியவில்லை.

பின்னர் வீடு திரும்பிய சித்தி மற்றும் குடும்பத்தினர், சிறுமி அசைவற்ற நிலையில் கிடப்பதை கண்டு திகைத்து அழுதனர்.பின்னர் இந்த துயரச் செய்தி பெற்றோருக்கு தெரிவிக்கப்பட்டது.

அவசரமாக வந்த அவர்கள், தங்கள் செல்ல மகளின் உடலைக் கண்டு கதறி அழுதனர். இந்த சம்பவம் அப்பகுதியில் பெரும் சோகத்தை ஏற்படுத்தியது.

இதுகுறித்து அளிக்கப்பட்ட புகாரின் பேரில், காவலர்கள் வழக்குப் பதிவு செய்து, சம்பவத்தின் முழு விவரங்களை ஆராய்ந்து வருகின்றனர் என தெரிவிக்கப்படுகிறது.