பணிபுரியும் பெண்களுக்கு மாதவிடாய் காலத்தில் ஊதியத்துடன் கூடிய கட்டாய விடுப்பு வழங்கக் கோரித் தாக்கல் செய்யப்பட்ட பொதுநல மனுவை, உச்சநீதிமன்றம் இன்று (வெள்ளிக்கிழமை) தள்ளுபடி செய்து உத்தரவிட்டது.

நீதிமன்றத்தின் முக்கியக் கருத்துகள்:
தலைமை நீதிபதி சூர்ய காந்த் தலைமையிலான அமர்வு, இத்தகைய சட்டம் மனிதாபிமான அடிப்படையில் தோன்றினாலும், நடைமுறையில் பெண்களின் முன்னேற்றத்திற்குத் தடையாக அமையும் எனப் பின்வரும் காரணங்களைச் சுட்டிக்காட்டியது:

வேலைவாய்ப்பு பாதிப்பு: "மாதவிடாய் காலத்தில் ஊதியத்துடன் கூடிய கட்டாய விடுப்பு அளிக்கும்படி சட்டமியற்றினால், நிறுவன உரிமையாளர்கள் பெண்களை வேலைக்கு அமர்த்தத் தயங்குவார்கள். இது பெண்களுக்கான வேலைவாய்ப்புகளைப் பறிக்கும்".

உளவியல் தாக்கம்: இத்தகைய சட்டம், பணியிடங்களில் ஆண்களை விடப் பெண்கள் 'தாழ்ந்தவர்கள்' அல்லது 'பலவீனமானவர்கள்' என்ற தவறான பிம்பத்தை உருவாக்கி, அவர்கள் மீது உளவியல் தாக்கத்தை ஏற்படுத்தும்.

சந்தை நிலவரம்: அரசியலமைப்புச் சட்டப்படி பெண்களுக்கு உரிமைகள் இருந்தாலும், நிதர்சனமான சந்தை நிலவரத்தைக் கணக்கில் கொள்ள வேண்டும். இது பணியிடங்களில் பெண்களின் பங்களிப்பைக் குறைக்கக்கூடும்.

கட்டாயமாக்க முடியாது:
சில நிறுவனங்கள் தாமாக முன்வந்து இத்தகைய விடுப்பை வழங்குவதை நீதிமன்றம் வரவேற்றது. இருப்பினும், "விழிப்புணர்வு ஏற்படுத்துவது வேறு, சட்டத்தைக் கட்டாயமாக்குவது வேறு" எனக் குறிப்பிட்ட நீதிபதிகள், இதுவரை இக்கோரிக்கையுடன் எந்தப் பெண்ணும் நீதிமன்றத்தை அணுகவில்லை என்பதையும் சுட்டிக்காட்டினர்.