இந்திய விண்வெளி ஆராய்ச்சி நிறுவனம் (இஸ்ரோ), இளம் தொழில்நுட்ப திறமையாளர்களின் புதுமைச் சிந்தனைகளை வெளிக்கொணரும் நோக்கில் ‘பாரதிய அந்தரிக்க்ஷ் ஹேக்கத்தான்–2026’ என்ற தேசிய அளவிலான தொழில்நுட்பப் போட்டியை அறிவித்துள்ளது. தொடர்ந்து மூன்றாவது ஆண்டாக நடைபெறவுள்ள இந்தப் போட்டி, மாணவர்கள் விண்வெளித் தொழில்நுட்பத் துறையில் தங்களது அறிவு, திறமை மற்றும் படைப்பாற்றலை வெளிப்படுத்தும் அரிய வாய்ப்பாகக் கருதப்படுகிறது.

விண்வெளி ஆய்வு மற்றும் மேம்பாட்டுத் துறையில் புதிய மென்பொருள் மற்றும் வன்பொருள் தீர்வுகளை உருவாக்கும் நோக்கில் நடத்தப்படும் இந்தப் போட்டியில், இந்தியாவில் அங்கீகரிக்கப்பட்ட கல்வி நிறுவனங்களில் தற்போது பயிலும் இளங்கலை, முதுகலை மற்றும் முனைவர் பட்ட ஆராய்ச்சி மாணவர்கள் மட்டுமே பங்கேற்க தகுதி பெற்றுள்ளனர்.

பணியில் உள்ள தொழில்முறை வல்லுநர்களுக்கு இதில் பங்கேற்க அனுமதி இல்லை என தெரிவிக்கப்பட்டுள்ளது.போட்டியில் பங்கேற்கும் ஒவ்வொரு அணியிலும் குறைந்தபட்சம் 3 பேரும், அதிகபட்சம் 4 பேரும் இடம்பெற வேண்டும். மேலும், வெவ்வேறு கல்லூரிகள் மற்றும் பல்கலைக்கழகங்களைச் சேர்ந்த மாணவர்கள் ஒன்றிணைந்து ஒரே அணியாக பங்கேற்கும் வசதியும் வழங்கப்பட்டுள்ளது.

இதன் மூலம் பல்வேறு கல்வி நிறுவனங்களுக்கு இடையேயான அறிவுப் பரிமாற்றம் மற்றும் கூட்டுச் செயல்பாட்டை ஊக்குவிக்கும் முயற்சி மேற்கொள்ளப்பட்டுள்ளது.பதிவு மற்றும் யோசனை சமர்ப்பிக்கும் பணிகள் ஏற்கனவே தொடங்கியுள்ள நிலையில், போட்டியில் இடம்பெறும் தொழில்நுட்பச் சவால்கள் குறித்து மாணவர்கள் தெளிவாக அறிந்து கொள்ளும் வகையில், இஸ்ரோ சார்பில் இரண்டு சிறப்பு விளக்க அமர்வுகள் நடத்தப்பட உள்ளன.

இந்த அமர்வுகளில் போட்டியின் நோக்கம், தொழில்நுட்பத் தேவைகள், மதிப்பீட்டு நடைமுறைகள் மற்றும் விண்வெளி சார்ந்த சவால்கள் குறித்து விரிவான விளக்கங்கள் வழங்கப்பட உள்ளதாக தெரிவிக்கப்படுகிறது.இந்த தேசிய அளவிலான போட்டியில் பங்கேற்பதற்கு எந்தவித கட்டணமும் வசூலிக்கப்படாது.

முழுமையாக இலவசமாக நடத்தப்படும் இந்த நிகழ்வில் தகுதியுடைய மாணவர்கள் அதிகாரப்பூர்வ இணையதளம் வாயிலாக விண்ணப்பிக்கலாம் என தெரிவிக்கப்பட்டுள்ளது.விண்ணப்பங்கள் மற்றும் திட்ட யோசனைகளை சமர்ப்பிப்பதற்கான கடைசி நாள் ஜூலை 1 என அறிவிக்கப்பட்டுள்ளது.

மாணவர்கள் சமர்ப்பிக்கும் யோசனைகள் மற்றும் தொழில்நுட்பத் திட்டங்கள் நிபுணர் குழுவால் மதிப்பீடு செய்யப்பட்டு, தேர்வான அணிகளின் இறுதிப் பட்டியல் ஜூலை 20-ஆம் தேதி வெளியிடப்பட உள்ளது. இதனைத் தொடர்ந்து ஜூலை 21-ஆம் தேதி தேர்வான அணிகளுக்கான அறிமுக மற்றும் வழிகாட்டல் நிகழ்ச்சி நடைபெறும்.போட்டியின் உச்சக்கட்ட நிகழ்வாக ஆகஸ்டு 6 மற்றும் 7 ஆகிய தேதிகளில் 30 மணி நேரம் இடைவிடாத நேரலை இறுதிப்போட்டி நடத்தப்பட உள்ளது.

இதில் மாணவர்கள் தங்களது தொழில்நுட்பத் திறன், புதுமைச் சிந்தனை மற்றும் சிக்கல்களைத் தீர்க்கும் திறமைகளை நேரடியாக வெளிப்படுத்த உள்ளனர்.இளம் அறிவாளிகளை விண்வெளித் துறையின் எதிர்கால கண்டுபிடிப்பாளர்களாக உருவாக்கும் நோக்கில் இந்த முயற்சி முன்னெடுக்கப்படுவதாக இஸ்ரோ தரப்பில் தெரிவிக்கப்படுகிறது.