சாம்ராஜ்நகர் அருகே செல்வம் பெருகும் என்ற மூடநம்பிக்கையில் சிக்கி, 80 வயதான கண்பார்வையற்ற தாயை நரபலி கொடுக்க முயன்ற விவசாயி ஒருவரை காவலர்கள் திடீர் நடவடிக்கையில் கைது செய்த சம்பவம் பெரும் அதிர்ச்சியை ஏற்படுத்தியுள்ளது.

இந்த பரபரப்பான சம்பவம் குறித்து காவலர்கள் தரப்பில் தெரிவிக்கப்படுவதாவது: கர்நாடக மாநிலம் சாம்ராஜ்நகர் மாவட்டம் சாகடே கிராமத்தைச் சேர்ந்த ஷெட்டி (80) என்பவர் கண்பார்வையற்றதும், கேள்வித்திறன் குறைவுடையவருமாக உள்ளார். அவருக்கு மடாஷெட்டி (55) என்ற மகன் உள்ளார். இவர் விவசாயியாக செயல்பட்டு வந்தார்.

இந்நிலையில், மடாஷெட்டி ஒருசில நாட்களுக்கு முன்பு ஒரு சாமியாரை சந்தித்ததாக தெரிவிக்கப்படுகிறது. அப்போது தன்னுடைய வாழ்க்கையில் செல்வம் பெருக வேண்டும் என அவர் கேட்டதாகவும் கூறப்படுகிறது. அதற்கு, கண்பார்வையற்ற தாயை நரபலி கொடுத்தால் பணம் பெருகும் என சாமியார் அறிவுறுத்தியதாக சந்தேகிக்கப்படுகிறது.

இந்த மூடநம்பிக்கையை நம்பிய மடாஷெட்டி, சித்ரா பவுர்ணமி நாளை தேர்ந்தெடுத்து, பெற்ற தாயையே பலியிட முடிவு செய்ததாக தெரிவிக்கப்படுகிறது. இதற்காக அவர் தாயின் இல்லத்தில் சுமார் 4 அடி ஆழத்தில் குழி தோண்டி, பானை, குங்குமம், மஞ்சள், எலுமிச்சை போன்ற பொருட்களுடன் மாந்திரீக பூஜைகள் நடத்தத் தொடங்கியதாக தெரிவிக்கப்படுகிறது.

இந்த அசாதாரண செயல்பாடுகள் குறித்து அப்பகுதி மக்களுக்கு தகவல் தெரியவந்ததும், அவர்கள் உடனடியாக காவலர்களுக்கு தகவல் அளித்தனர். தகவலின் பேரில் சம்பவ இடத்திற்கு விரைந்து சென்ற காவலர்கள், அங்கு நடந்து கொண்டிருந்த நடவடிக்கைகளை தடுத்து நிறுத்தினர்.

இதனை அறிந்த சாமியார் தப்பிச் சென்றதாக தெரிவிக்கப்படுகிறது.அதனைத் தொடர்ந்து, மடாஷெட்டியை கைப்பற்றி விசாரணை மேற்கொண்ட காவலர்கள், முதலில் அவர் வழங்கிய பதில்களில் முரண்பாடுகளை கண்டறிந்தனர்.

பின்னர் தீவிர விசாரணையில், பணம் பெருக வேண்டும் என்ற நோக்கில் சித்ரா பவுர்ணமி நாளில் தாயை நரபலி கொடுக்க திட்டமிட்டது வெளிச்சத்துக்கு வந்ததாக தெரிவிக்கப்படுகிறது.

இதையடுத்து, மடாஷெட்டியை காவலர்கள் கைது செய்து வழக்குப்பதிவு செய்துள்ளனர். தொடர்ந்து இந்த சம்பவம் தொடர்பாக தீவிர விசாரணை நடைபெற்று வருகிறது.பணம் சேர்க்கும் ஆசையில், பெற்ற தாயையே பலியிட முனைந்த இந்த மனிதாபிமானமற்ற செயல், சமூகத்தில் கடும் அதிர்ச்சியையும் பரபரப்பையும் ஏற்படுத்தியுள்ளது.