தமிழக வெற்றிக் கழகத்தின் தலைவர் மற்றும் நடிகரான விஜய், அரசியல் களத்தில் முதல் முறையாக சட்டமன்றத் தேர்தலை சந்தித்துள்ள நிலையில், மே 4ஆம் தேதி நடைபெறவுள்ள வாக்கு எண்ணிக்கையை அவரது ரசிகர்களும், கட்சித் தொண்டர்களும் ஆவலுடன் எதிர்நோக்கி உள்ளனர். இந்த சூழலில், விஜயின் அரசியல் ஆசை மற்றும் முதலமைச்சர் கனவு குறித்து நடிகர் தாமு பகிர்ந்த தகவல் கவனத்தை ஈர்த்துள்ளது.

விஜய் தனது திரைப்பயணத்தில் குறிப்பாக துப்பாக்கி படத்திற்குப் பிறகு அரசியல் மற்றும் சமூக கருத்துகளை பிரதிபலிக்கும் கதைகளைத் தேர்வு செய்து நடித்தார். பல படங்களில் ஆட்சியையும் சமூக அமைப்பையும் கேள்விக்குள்ளாக்கும் வகையிலான கதாபாத்திரங்களில் நடித்தது, அவரது அரசியல் நோக்கங்கள் குறித்து ரசிகர்கள் மற்றும் அரசியல் வட்டாரங்களில் பல்வேறு விவாதங்களை ஏற்படுத்தியது.

சிலர், தமிழகத்தின் முன்னாள் முதல்வர்களான கருணாநிதி மற்றும் ஜெயலலிதா மறைவுக்குப் பிறகே விஜய்க்கு அரசியலில் நுழைய வேண்டும் என்ற எண்ணம் உருவானது எனக் கூறியிருந்தனர். மேலும் சிலர், அவரது நெருங்கியவர்களின் அரசியல் ஆலோசனைகளே இதற்குக் காரணம் என்றும் கருத்து தெரிவித்தனர்.

ஆனால் நடிகர் தாமு அளித்துள்ள பேட்டியில், விஜய்க்கு அரசியல் எண்ணமும் முதலமைச்சர் ஆக வேண்டும் என்ற கனவும் பல ஆண்டுகளுக்கு முன்பே இருந்ததாக தெரிவித்துள்ளார்.

இதுகுறித்து தாமு கூறுகையில், “நாளைய தீர்ப்பு படத்தின் காலத்திலேயே விஜய் சமூகப் பொறுப்புகள் குறித்து அதிகமாக பேசுவார். அந்தப் படப்பிடிப்பு முடிந்த நாளில் பெண்களுக்கு அரிசி, சர்க்கரை மற்றும் மளிகைப் பொருட்களை வழங்கினார். சமூக நலச் செயல்பாடுகளை அவர் அப்போதே தொடங்கிவிட்டார். அப்போது தான் ஒரு நாள் முதலமைச்சர் ஆக வேண்டும் என்ற எண்ணம் இருப்பதாக எங்களிடம் கூறியிருந்தார்,” என்றார்.

மேலும், அந்த எண்ணத்திற்கேற்ப தனது ரசிகர் மன்றத்தை மக்கள் இயக்கமாக மாற்றி, சமூக சேவைகள் மூலம் மக்களுடன் தொடர்பை வளர்த்துக் கொண்டதாகவும் தாமு குறிப்பிட்டார்.

தாமுவின் இந்த பேட்டி, விஜயின் அரசியல் பயணம் சமீபத்திய முடிவு அல்ல; நீண்டகால சிந்தனையின் விளைவாக இருக்கலாம் என்ற விவாதத்தை மீண்டும் தூண்டியுள்ளது. தேர்தல் முடிவுகள் வெளியாக உள்ள நிலையில், விஜயின் அரசியல் எதிர்காலம் குறித்து அதிக எதிர்பார்ப்பு நிலவி வருகிறது.