தமிழக தலைமை தேர்தல் அதிகாரி அர்ச்சனா பட்நாயக் வெளியிட்டுள்ள செய்திக்குறிப்பில் தெரிவித்திருப்பதாவது,"இந்திய தேர்தல் ஆணையத்தின் வழிகாட்டுதலின்படி, தமிழ்நாடு முழுவதும் வாக்காளர் பட்டியலில் சிறப்பு தீவிர திருத்தப் பணிகள் மேற்கொள்ளப்பட்டு வருகின்றன.

அதன் ஒரு பகுதியாக, வரைவு வாக்காளர் பட்டியல் கடந்த 19-ஆம் தேதி அதிகாரப்பூர்வமாக வெளியிடப்பட்டது. இதனைத் தொடர்ந்து, பொதுமக்களிடமிருந்து ஏற்புரைகள் மற்றும் மறுப்புரைகள் பெறும் நடைமுறை அடுத்த மாதம் (ஜனவரி) 18-ஆம் தேதி வரை தொடரும்.

இந்த காலகட்டத்தில் தகுதியுள்ள அனைத்து குடிமக்களும் எளிதாக விண்ணப்பங்களை சமர்ப்பிக்க வசதியாக, மாநிலம் முழுவதும் உள்ள அனைத்து வாக்குச்சாவடிகளிலும் சிறப்பு முகாம்கள் நடத்தப்பட உள்ளன.

அதன்படி, டிசம்பர் 27 (சனிக்கிழமை), 28 (ஞாயிற்றுக்கிழமை) மற்றும் ஜனவரி 3 (சனிக்கிழமை), 4 (ஞாயிற்றுக்கிழமை) ஆகிய நாட்களில் இந்த சிறப்பு முகாம்கள் நடைபெறும்.வரைவு வாக்காளர் பட்டியலில் பெயர் இடம்பெறாதவர்கள் மற்றும் 18 வயது நிரம்பிய தகுதியான புதிய வாக்காளர்கள், படிவம்-6 மற்றும் உறுதிமொழி படிவத்தை சமர்ப்பித்து தங்களின் பெயரை சேர்க்க விண்ணப்பிக்கலாம்.

அதேபோல், ஏற்கனவே வாக்காளர் பட்டியலில் பெயர் உள்ளவர்கள், தவறான சேர்க்கைகளுக்கு ஆட்சேபனை தெரிவிக்கவோ அல்லது பெயர் நீக்கம் செய்யவோ படிவம்-7 மூலம் விண்ணப்பிக்க முடியும்.

மேலும், முகவரி மாற்றம், வாக்காளர் விவரங்களில் திருத்தம், வாக்காளர் புகைப்பட அடையாள அட்டை மாற்றம் போன்ற தேவைகளுக்காக படிவம்-8 மூலம் விண்ணப்பிக்கலாம்" என அந்த செய்திக்குறிப்பில் தெரிவிக்கப்பட்டுள்ளது.