மகாராஷ்டிரா: மகாராஷ்டிராவில் டிசம்பர் 2-ஆம் தேதி உள்ளாட்சித் தேர்தல் நடைபெறவுள்ள நிலையில், இல்லத்தரசிகளை நோக்கிக் கூட்டத்தில் பேசிய அம்மாநில பா.ஜ.க. அமைச்சர் ஜெய்குமார் கோரே, முதல்வர் தேவேந்திர பட்னவீஸ் வழங்குவதாகக் கூறப்படும் மாதந்தோறும் ரூ. 1,500 நிதியுதவிக்காகப் பெண்கள் அவருக்கு நன்றியுணர்வுடன் வாக்களிக்க வேண்டும் என்று வலியுறுத்தியுள்ளார்.

அமைச்சரின் சர்ச்சை பேச்சு

பொதுக்கூட்டத்தில் பேசிய ஜெய்குமார் கோரே, "உங்களால் (இல்லத்தரசிகள்) உங்கள் கணவன்மார்களிடமிருந்து ரூ. 100 கூட பெற முடியாது. அப்படியிருக்கும்போது, முதல்வர் தேவேந்திர பட்னவீஸ் மகளிருக்கான திட்டம் மூலம் மாதந்தோறும் ரூ. 1,500 வழங்கி வருகிறார்" என்று குறிப்பிட்டார்.

முதல்வர் ஆட்சியிலிருந்து நீக்கப்பட்டால், இந்தக் குடும்ப நிதி உதவி நிறுத்தப்பட்டுவிடும் என்றும் அவர் எச்சரித்தார்.

"எவரிடமிருந்தாவது பணத்தைப் பெற்றுக்கொள்ளுங்கள். ஆனால், அவர்களுக்கு வாக்கு செலுத்தக் கூடாது. நீங்கள் வாக்கு செலுத்தும்போது, பட்னவீஸ் வழங்கிய ரூ. 1,500 உங்கள் மனத்தில் நினைவுக்கு வர வேண்டும். நன்றியுணர்வுடன் நடந்து கொள்ளுங்கள்" என்றும் கோரே பேசினார்.

உள்ளாட்சி தேர்தல்: மகாராஷ்டிராவில் 246 நகராட்சி கவுன்சில்கள் மற்றும் 42 நகர பஞ்சாயத்துகளுக்கு டிசம்பர் 2-இல் தேர்தல் நடைபெறுகிறது. டிசம்பர் 3-இல் வாக்குகள் எண்ணப்பட்டு முடிவுகள் அறிவிக்கப்பட உள்ளன. இதில் 1.07 கோடிக்கும் மேற்பட்ட வாக்காளர்கள் வாக்களிக்க உள்ளனர்.