9 செயற்கைக்கோள்களுடன் பி.எஸ்.எல்.வி-சி54 ராக்கெட்.. நாளை விண்ணில் செலுத்துகிறது இஸ்ரோ.!

இந்திய விண்வெளி ஆராய்ச்சி நிறுவனம் இஸ்ரோ, ஸ்ரீஹரிகோட்டாவில் உள்ள சதீஷ் தவான் விண்வெளி மையத்தில் இருந்து 9 செயற்கை கோள்களுடன் 'பி.எஸ்.எல்.வி.சி-54' என்ற ராக்கெட்டை நாளை (சனிக்கிழமை) காலை 11.56 மணிக்கு விண்ணில் செலுத்துவதற்கு திட்டமிட்டு உள்ளது.

இந்த ராக்கெட் 'ஓசன்சாட்03' என்ற புவி செயற்கைக்கோள் மற்றும் 8 நானோ செயற்கைகக்கோள்களை சுமந்து செல்கிறது. இந்த ராக்கெட்டை விண்ணில் செலுத்துவதற்கான 'கவுண்ட் டவுன்' இன்று தொடங்க வாய்ப்புள்ளதாக இஸ்ரோ விஞ்ஞானிகள் தெரிவித்துள்ளனர்.

மேலும் இந்த பி.எஸ்.எல்.வி. சி-54 ராக்கெட், 4 நிலைகளைக் கொண்டு ஒவ்வொரு நிலையும் தனித்தனி உந்துவிசை அமைப்புடன் செயல்படும் திறன் கொண்டது. இதில் முதல் மற்றும் 3-வது உந்து நிலைகளில் திட எரிபொருளும், 2-வது மற்றும் 4-வது நிலை திரவ உந்துசக்தியும் பயன்படுத்தப்படுகிறது.