இந்தியா மற்றும் ரஷ்யா நாடுகளுக்கிடையிலான மூலோபாய உறவை மேலும் வலுப்படுத்தும் வகையில், இரு நாடுகளும் புதிய பயணிகள் விமானத்தை கூட்டாகத் தயாரிக்க முடிவு செய்துள்ளன. குறுகிய தூரப் பயணங்களுக்கான இந்த சிறிய இரட்டை எஞ்சின் விமானங்கள், இந்தியாவில் தயாரிக்கப்பட உள்ளன.

இந்தத் திட்டத்தை இந்துஸ்தான் ஏரோநாட்டிக்ஸ் லிமிடெட் (HAL) மற்றும் ரஷ்யாவின் யுனைடெட் ஏர்கிராப்ட் கார்ப்பரேஷன் (PJSC-UAC) இணைந்து செயல்படுத்த உள்ளன. இதற்கான ஒப்பந்தம் திங்கட்கிழமை மாஸ்கோவில் கையெழுத்தானது.

ஒப்பந்தத்தில் HAL நிறுவனத்தின் தலைவர் மற்றும் நிர்வாக இயக்குநர் டி. கே. சுனில், மற்றும் PJSC-UAC நிறுவனத்தின் தலைமை இயக்குநர் வடிம் படேகா ஆகியோர் பங்கேற்றனர்.

HAL நிறுவனம் வெளியிட்டுள்ள அறிக்கையின்படி, SJ-100 வகை விமானங்கள், இந்தியாவின் “உடான் (UDAN)” திட்டத்தின் கீழ் குறுகிய தூர விமான இணைப்பிற்கு ஒரு முக்கிய திருப்புமுனையாக இருக்கும்.

இந்த ஒப்பந்தத்தின் மூலம், உள்நாட்டு சந்தைக்கு தேவையான SJ-100 விமானங்களை இந்தியாவில் தயாரிக்கும் முழு உரிமையும் HALக்கு வழங்கப்பட்டுள்ளது.

“உடான் திட்டம்” என்பது இந்தியாவின் பிராந்திய விமானப் போக்குவரத்தைக் கட்டியெழுப்புவதற்காக உருவாக்கப்பட்ட அரசு முயற்சியாகும். அதனுடன் இணைந்து HAL மேற்கொள்ளும் இந்த உற்பத்தி, ‘ஆத்மநிர்பர் பாரத்’ (தற்சார்பு இந்தியா) கனவின் முக்கிய படியாகக் கருதப்படுகிறது.

இந்த முயற்சி மூலம் தனியார் விமானத் துறைக்கும் பெரும் ஊக்கம் கிடைக்கும் என HAL நம்புகிறது. அதேசமயம், விமானப் போக்குவரத்து துறையில் நேரடி மற்றும் மறைமுக வேலைவாய்ப்புகள் ஆயிரக்கணக்கில் உருவாகும் என எதிர்பார்க்கப்படுகிறது.

குறிப்பாக, 1961 முதல் 1988 வரை HAL நிறுவனம் தயாரித்த AVRO HS-748 விமான உற்பத்தியின் பின், இது இந்தியாவில் முழுமையான பயணிகள் விமான உற்பத்திக்கான முதல் பெரிய முயற்சியாகும்.

அடுத்த 10 ஆண்டுகளில், இந்தியாவில் பிராந்திய விமான இணைப்புக்காக 200-க்கும் அதிகமான ஜெட் விமானங்களும், மேலும் இந்தியப் பெருங்கடல் பிராந்தியத்தில் உள்ள சுற்றுலா தளங்களுக்கு 350-க்கும் மேற்பட்ட கூடுதல் விமானங்களும் தேவைப்படும் என மதிப்பிடப்பட்டுள்ளது.

தற்போது வரை, 200-க்கும் மேற்பட்ட SJ-100 விமானங்கள் தயாரிக்கப்பட்டு, 16-க்கும் மேற்பட்ட வணிக விமான நிறுவனங்களால் வெற்றிகரமாக இயக்கப்பட்டு வருகின்றன.

இந்த ஒத்துழைப்பு, இந்தியா மற்றும் ரஷ்யாவுக்கிடையேயான தொழில்நுட்ப நம்பிக்கையின் சின்னமாகவும், இந்திய விமானத் துறையில் புதிய வரலாற்றை படைக்கும் ஒரு மைல்கல்லாகவும் பார்க்கப்படுகிறது.

 “இந்தியாவில் தயாரிக்கப்பட்ட முதல் முழுமையான பயணிகள் விமானம் — இது ஒரு சாதனை மட்டுமல்ல, சுயநிறைவு நோக்கில் இந்தியாவின் வான்வெளிப் பாய்ச்சலாகும்,” என HAL தெரிவித்துள்ளது.