சரக்கு மற்றும் சேவை வரி – ஜிஎஸ்டி, இதுவரை நான்கு அடுக்குகளாக இருந்தது. 5%, 12%, 18% மற்றும் 28% என பிரிக்கப்பட்டிருந்த இந்த வரி விகிதம், இனி இரண்டு மட்டுமே. 5% மற்றும் 18% என்ற விகிதங்களில் இன்று முதல் நடைமுறைக்கு வருகிறது.

இந்த முக்கிய மாற்றம் கடந்த செப்டம்பர் 4ஆம் தேதி மத்திய நிதியமைச்சர் நிர்மலா சீதாராமன் தலைமையில் நடந்த ஜிஎஸ்டி கவுன்சில் கூட்டத்தில் எடுக்கப்பட்ட முடிவு. அந்த அறிவிப்பின் படி, இன்று – செப்டம்பர் 22ஆம் தேதி முதல் புதிய விகிதம் அமலுக்கு வந்திருக்கிறது.

இதன் தாக்கம் என்ன தெரியுமா? அன்றாடம் பயன்படுத்தும் பொருட்களின் விலை கணிசமாகக் குறைகிறது.
ஹேர் ஆயில், ஷாம்பு, பற்பசை, சோப், டூத் பிரஷ், முகம் சவரம் கிரீம், வெண்ணெய், சீஸ், பொட்டல தின்பண்டங்கள், பாத்திரங்கள், குழந்தைகளுக்கான பாட்டில், நாப்கின், டயப்பர், தையல் இயந்திரம் மற்றும் அதன் பாகங்கள் – எல்லாவற்றுக்கும் ஜிஎஸ்டி குறைக்கப்பட்டிருக்கிறது.

சுகாதார துறையில், ஹெல்த் இன்சூரன்ஸ் மற்றும் லைஃப் இன்சூரன்ஸ் மேல் இருந்த 18% ஜிஎஸ்டி முற்றிலும் நீக்கப்பட்டுள்ளது. மருத்துவ உபகரணங்களான தெர்மாமீட்டர், ஆக்சிஜன் சிலிண்டர், டயக்னோஸ்டிக் கிட், குளுக்கோமீட்டர் போன்றவற்றின் ஜிஎஸ்டி 5% ஆகக் குறைக்கப்பட்டுள்ளது.

கல்வித்துறைக்கும் நல்ல செய்தி. வரைபடங்கள், விளக்கப்படங்கள், உலக உருண்டைகள், பென்சில், வண்ண பென்சில், ரப்பர், குறிப்பேடுகள், புத்தகங்கள் – இவை அனைத்துக்கும் இனி ஜிஎஸ்டி இல்லை.

வேளாண்மை துறையில் டிராக்டர் டயர் மற்றும் பாகங்கள் மீது இருந்த 18% ஜிஎஸ்டி 5% ஆகக் குறைக்கப்பட்டுள்ளது. டிராக்டர்கள், பூச்சிக்கொல்லிகள், ஊட்டச்சத்து மருந்துகள், சொட்டு நீர் பாசனம், தெளிப்பான்கள் – இவை 12% இலிருந்து 5% ஆகக் குறைக்கப்பட்டுள்ளன.

மின்னணு சாதனங்களில் கூட தளர்வு. மோட்டார் விசிறிகள், ஏசி இயந்திரங்கள், டிவி, மானிட்டர், ப்ரொஜெக்டர், செட்டாப் பாக்ஸ் போன்றவற்றின் ஜிஎஸ்டி 28% இலிருந்து 18% ஆக குறைந்துள்ளது.

இந்த மாற்றத்தால் அரசுக்கு வருடத்திற்கு சுமார் ரூ.93,000 கோடி வருவாய் இழப்பு ஏற்படும் என மதிப்பிடப்பட்டுள்ளது. ஆனால், பொதுமக்களுக்கு தினசரி செலவில் ஒரு சலுகை கிடைக்கும் என்பதில் ஐயமில்லை.

மொத்தத்தில், புதிய ஜிஎஸ்டி விகிதம் இன்று முதல் அமலுக்கு வந்துள்ளதால், பல அத்தியாவசிய பொருட்களின் விலை குறையலாம் என்ற எதிர்பார்ப்பு நிலவுகிறது.