இந்தியாவில் 'எண்மக் கைது' (Digital Arrest) மற்றும் ஆன்லைன் மோசடிகள் மூலம் பொதுமக்களின் ரூ.54,000 கோடி பணம் சூறையாடப்பட்டிருப்பதை "மிகப்பெரிய கொள்ளை" என வர்ணித்துள்ள உச்சநீதிமன்றம், இதனைத் தடுக்க மத்திய அரசுக்குத் தொடர் அதிரடி உத்தரவுகளைப் பிறப்பித்துள்ளது.

நீதிமன்றத்தின் முக்கியக் கண்டனங்களும் வழிகாட்டுதல்களும்:
சிபிஐ விசாரணை: நாடு முழுவதும் அதிகரித்து வரும் டிஜிட்டல் மோசடி புகார்களைச் சிபிஐ விசாரிக்க ஏற்கனவே உத்தரவிடப்பட்டுள்ளது. தில்லி மற்றும் குஜராத் மாநில அரசுகள் இந்த விசாரணைக்கு முழு ஒத்துழைப்பு வழங்க வேண்டும்.

வங்கி அதிகாரிகளின் மெத்தனம்: வங்கி அதிகாரிகளின் கவனக்குறைவு மற்றும் மெத்தனப் போக்கே இத்தகைய மோசடிகள் தடையின்றி நடக்க வழிவகுப்பதாக நீதிபதிகள் அதிருப்தி தெரிவித்தனர்.

ஒருங்கிணைந்த நடவடிக்கை (SOP): * பாதிக்கப்பட்டவர்களின் டெபிட் கார்டுகளை உடனடியாக முடக்குவது தொடர்பான வழிகாட்டுதல்களை ரிசர்வ் வங்கி (RBI) வகுக்க வேண்டும்.

மத்திய உள்துறை அமைச்சகம், தொலைத்தொடர்புத் துறை மற்றும் ரிசர்வ் வங்கி இணைந்து, குற்றங்களைத் தடுக்கவும் பாதிக்கப்பட்டவர்களுக்கு நிவாரணம் வழங்கவும் ஒரு நிலையான வழிகாட்டுதலை (SOP) உருவாக்க வேண்டும்.

"பணத்தை இழந்த சாமானியர்களுக்குத் தீர்வும் நிவாரணமும் கிடைப்பதை உறுதி செய்வதே முதன்மை நோக்கம்" எனக் குறிப்பிட்ட நீதிபதிகள், இது தொடர்பாக எடுக்கப்பட்ட நடவடிக்கைகள் குறித்து 4 வாரங்களுக்குள் விரிவான அறிக்கையைத் தாக்கல் செய்ய மத்திய அரசுக்கு உத்தரவிட்டுள்ளனர்.