குடல்வால் அழற்சி என்பது சிறுகுடலும் பெருங்குடலும் இணையும் பகுதியில் அமைந்துள்ள குடல்வாலில் ஏற்படும் வீக்கம் மற்றும் தொற்று காரணமாக உருவாகும் உடல்நலப் பிரச்சினையாகும். குடல்வாலில் உணவுத் துகள்கள் சிக்குவது, கிருமித் தொற்று அல்லது புழுத் தொற்று போன்ற காரணங்களால் இந்த பாதிப்பு ஏற்படலாம். ஆரம்பத்தில் சாதாரண வயிற்றுவலி போலத் தோன்றினாலும், உரிய நேரத்தில் சிகிச்சை பெறாவிட்டால் குடல்வால் வெடித்து வயிற்றுக்குள் தொற்று பரவும் அபாயம் உள்ளது.மனித உடலின் பரிணாம வளர்ச்சியில் பல்வேறு உறுப்புகளின் செயல்பாடுகள் மாற்றமடைந்துள்ளன.

அந்த வகையில், சிறுகுடலும் பெருங்குடலும் சந்திக்கும் இடத்தில் சிறிய வால் போன்ற அமைப்புடன் காணப்படுவதுதான் குடல்வால். பொதுவாக அதன் இருப்பை நாம் பெரிதாக உணர்வதில்லை. ஆனால், அதன் உள்ளே ஏதேனும் பொருள் சிக்கி, கிருமிகள் பெருகத் தொடங்கும்போது பிரச்சினை உருவாகிறது.சிறுகுடலில் செரிமானம் அடைந்த உணவுப் பொருட்கள் பெருங்குடலுக்குச் செல்லும் பாதையில் குடல்வாலின் வாயில் அடைப்பு ஏற்பட்டால், அதன் உள்ளே கிருமிகள் பெருகுவதற்கு சாதகமான சூழல் உருவாகும். இதனால் குடல்வால் வீங்கி அழற்சி ஏற்படுகிறது. சில நேரங்களில் புழுத் தொற்று அல்லது பிற காரணங்களாலும் குடல்வால் பாதிக்கப்படலாம். வீக்கம் தீவிரமடைந்து உரிய நேரத்தில் சிகிச்சை கிடைக்காவிட்டால் குடல்வால் வெடிக்கும் நிலைக்கும் செல்லக்கூடும்.

திடீரெனத் தொடங்கும் வயிற்றுவலி
குடல்வால் அழற்சியின் தொடக்க அறிகுறியாக நடுவயிற்றுப் பகுதியில் வலி ஏற்படலாம். சில மணி நேரங்களுக்குப் பிறகு அந்த வலி படிப்படியாக வலது கீழ்வயிற்றுப் பகுதிக்கு நகர்ந்து தீவிரமடையலாம். வயிற்றைப் பிடித்தாலும், அழுத்தினாலும் வலி அதிகமாக உணரப்படுவது குறிப்பிடத்தக்க அறிகுறியாகும்.இதனுடன் குமட்டல், வாந்தி, காய்ச்சல், வயிற்றுப்போக்கு அல்லது மலச்சிக்கல் போன்ற தொந்தரவுகளும் ஏற்படலாம். நடக்கும்போதுகூட வலி அதிகரிப்பதால் சிலர் உடலைச் சற்றுக் குனிந்தபடியே நடக்க நேரிடலாம்.குடல்வால் அழற்சி யாருக்கு வேண்டுமானாலும் ஏற்படக்கூடியது. குறிப்பாக குழந்தைகள் முதல் இளம் வயதினர் வரை பலரிடமும் இந்தப் பாதிப்பு காணப்படலாம். பல சமயங்களில் முன்கூட்டிய எச்சரிக்கை அறிகுறிகள் இல்லாமலேயே திடீரென வயிற்றுவலி தோன்றி மருத்துவ சிகிச்சை தேவைப்படும் நிலை உருவாகலாம்.

வலி ஏற்பட்டால் என்ன செய்ய வேண்டும்?
திடீரெனத் தொடங்கிய வயிற்றுவலி தொடர்ந்து அதிகரித்தால் அதை சாதாரண வயிற்றுப் பிரச்சினையாக நினைத்து வீட்டிலேயே சமாளிக்க முயற்சிக்கக் கூடாது. குறிப்பாக வலது கீழ்வயிற்றில் கடுமையான வலி, காய்ச்சல், வாந்தி அல்லது வயிற்றைத் தொடும்போது அதிக வலி போன்ற அறிகுறிகள் இருந்தால் உடனடியாக மருத்துவரை அணுக வேண்டும்.தேவையான சூழலில் கதிர்வீச்சு இல்லாத வயிற்றுப் படப்பரிசோதனை, ரத்தப் பரிசோதனை, சிறுநீர்ப் பரிசோதனை உள்ளிட்டவற்றின் உதவியுடன் பிரச்சினையை மருத்துவர்கள் கண்டறிவார்கள். அறுவை சிகிச்சை வசதி உள்ள மருத்துவமனையில் பரிசோதனை செய்து கொள்வது அவசர நிலைகளில் மிகவும் பயனுள்ளதாக இருக்கும்.

சிகிச்சை எவ்வாறு மேற்கொள்ளப்படுகிறது?
குடல்வால் அழற்சி எந்த நிலையில் உள்ளது என்பதைப் பொறுத்தே சிகிச்சை முறை தீர்மானிக்கப்படுகிறது. சில குறிப்பிட்ட ஆரம்பநிலைகளில் மருத்துவரின் கண்காணிப்புடன் மருந்துகள் மற்றும் கிருமி எதிர்ப்பு மருந்துகள் வழங்கப்படலாம். ஆனால் குடல்வால் அழற்சி தீவிரமாகி, குடல்வால் வெடிக்கும் அபாயம் இருந்தால் அறுவை சிகிச்சை அவசியமாகலாம்.தற்போது சிறிய துளைகள் மூலம் மேற்கொள்ளப்படும் நுண்துளை அறுவை சிகிச்சை பரவலாகப் பயன்படுத்தப்படுகிறது.

இதன் மூலம் குடல்வால் அகற்றப்படுவதால் பெரிய காயம் ஏற்படாமல், ரத்த இழப்பும் குறைவாக இருக்கக்கூடும். நோயாளியின் உடல்நிலை மற்றும் சிகிச்சை முறையைப் பொறுத்து மருத்துவமனையில் தங்கும் காலமும் மாறுபடும்.குடல்வால் ஏற்கெனவே வெடித்திருந்தால் நிலைமை மேலும் சிக்கலாகும். குடல்வாலில் இருந்த கிருமிகள் வயிற்றுக்குள் பரவி தீவிரமான தொற்றை ஏற்படுத்தக்கூடும். அத்தகைய சூழலில் தொற்றுப் பகுதிகளைச் சுத்தப்படுத்துவதுடன், தேவையான மருந்துகள் மற்றும் அறுவை சிகிச்சை மூலம் சிகிச்சை அளிக்கப்படலாம். நோயின் தீவிரத்தைப் பொறுத்து நுண்துளை முறையிலோ அல்லது திறந்த அறுவை சிகிச்சை முறையிலோ சிகிச்சை மேற்கொள்ளப்படலாம்.

உணவுப் பழக்கத்தால் தடுக்க முடியுமா?
நார்ச்சத்து அதிகம் உள்ள உணவுகளை உட்கொள்வது செரிமான அமைப்பின் இயல்பான செயல்பாட்டிற்கு உதவக்கூடும். காய்கறிகள், கீரைகள், பழங்கள், முழுதானியங்கள் போன்ற நார்ச்சத்து நிறைந்த உணவுகளை அன்றாட உணவில் சேர்த்துக் கொள்வது நல்ல உணவுப் பழக்கமாகும். போதுமான அளவு தண்ணீர் அருந்துவதும் உடலின் நீர்ச்சத்தைச் சீராக வைத்திருக்க உதவும்.எனினும், நார்ச்சத்து நிறைந்த உணவு, போதுமான தண்ணீர் அருந்துதல் போன்றவை ஒட்டுமொத்த செரிமான நலனுக்கு உதவினாலும், குடல்வால் அழற்சி முற்றிலும் ஏற்படாமல் தடுக்கும் என்று உறுதியாகக் கூற முடியாது.

அலட்சியம் வேண்டாம்!
குடல்வால் உடலில் இருப்பது இயல்பானது என்பதால், எந்த அறிகுறியும் இல்லாத நிலையில் அதை முன்கூட்டியே அகற்ற வேண்டிய அவசியம் இல்லை. வேறு வயிற்றுப் பகுதியில் அறுவை சிகிச்சை மேற்கொள்ளும்போது குடல்வாலில் வீக்கம் அல்லது வேறு பாதிப்பு இருப்பது கண்டறியப்பட்டால் மட்டுமே, மருத்துவர்களின் ஆலோசனைப்படி அதை அகற்றுவது குறித்து முடிவு செய்யப்படுகிறது.

திடீரெனத் தோன்றும் வயிற்றுவலி தொடர்ந்து அதிகரிப்பது, வலது கீழ்வயிற்றில் வலி, காய்ச்சல், வாந்தி, குமட்டல் போன்ற அறிகுறிகள் ஒன்றாகத் தோன்றினால் காலம் தாழ்த்தாமல் மருத்துவ உதவியை நாடுவது மிகவும் அவசியம். ஆரம்பத்திலேயே கண்டறிந்து சிகிச்சை பெறுவது குடல்வால் வெடிப்பு போன்ற தீவிரமான சிக்கல்களைத் தவிர்க்க உதவும்.