பெங்களூரு டி.ஜே. ஹள்ளியில் உள்ள ஆள் நடமாட்டம் இல்லாத வீட்டில், 16 வயது சிறுமி கழுத்தறுக்கப்பட்டுக் கொலை செய்யப்பட்டுக் கிடந்த வழக்கில், தலைமறைவாக இருந்த அவரது 25 வயது வருங்காலக் கணவரை ஒரு வாரத்திற்குப் பிறகு ராஜஸ்தானின் அஜ்மீரில் வைத்து காவலர்கள் கைது செய்துள்ளனர்.

மேலும், குற்றம் சாட்டப்பட்ட சையத் சபில், கே.ஜி. ஹள்ளியின் குஷால்நகரைச் சேர்ந்தவர். இவர் கடந்த ஆண்டு ஜூன் மாதம், கோலார் மாவட்டத்தைச் சேர்ந்த 16 வயதான ஜோயா ஃபாத்திமாவுடன் நிச்சயதார்த்தம் செய்து கொண்டார்.

ஃபாத்திமா தனது அத்தை வீட்டிற்கு வரும்போதெல்லாம், சையத் சபிலை ரகசியமாகச் சந்தித்து வந்துள்ளார். இவர்களது அடிக்கடி சந்திப்புகள் இரு குடும்பத்தாருக்கும் இடையே கருத்து வேறுபாடுகளையும் பதற்றத்தையும் ஏற்படுத்தியதாகத் தெரிவிக்கப்படுகிறது.

கடந்த மார்ச் 17-ம் தேதி, ஃபாத்திமா தனது அத்தை வீட்டிலிருந்து மாயமானார். அவர் தனது செல்போனை வீட்டிலேயே விட்டுச் சென்றிருந்ததால் சந்தேகம் அடைந்த குடும்பத்தினர், சபிலைத் தொடர்பு கொள்ள முயன்றும் பலனளிக்கவில்லை.

பின்னர் சபிலின் தாயார் கொடுத்த ரகசியத் தகவலின் அடிப்படையில், இருவரும் வழக்கமாகச் சந்திக்கும் டி.ஜே. ஹள்ளியில் உள்ள பாழடைந்த வீட்டிற்குச் சென்று பார்த்தபோது, ஃபாத்திமா ரத்த வெள்ளத்தில் கழுத்தறுக்கப்பட்டு சடலமாகக் கிடப்பது கண்டுபிடிக்கப்பட்டது.

இந்த விசாரணையில், ஃபாத்திமாவின் அலைபேசியிலிருந்து கடைசியாகச் சபிலுக்குத்தான் அழைப்பு சென்றிருந்தது உறுதியானது.

தற்போது அஜ்மீரில் பிடிபட்ட சபிலை 'டிரான்சிட் வாரண்ட்' மூலம் பெங்களூரு கொண்டு வரும் பணிகளை காவலர்கள் தொடங்கியுள்ளனர். அவர் பெங்களூரு கொண்டு வரப்பட்ட பிறகு, கொலைக்கான உண்மையான காரணம் குறித்து விரிவான விசாரணை நடத்தப்படும் என்று காவல் தரப்பில் தெரிவிக்கப்பட்டுள்ளது.