தமிழ் சினிமாவில் இசைஞானி இளையராஜாவின் இசை பல சுவாரஸ்யமான கதைகளால் நிரம்பியுள்ளது. அப்படியான ஒரு சம்பவத்தை இயக்குநரும் நடிகருமான கே.பாக்யராஜ் சமீபத்தில் பகிர்ந்து ரசிகர்களை ஆச்சரியப்படுத்தியுள்ளார். அவர் இயக்கிய படத்துக்காக இசையமைக்கப்பட்ட இரண்டு பாடல்கள் பின்னர் ரஜினிகாந்த் நடித்த “எஜமான்” படத்தில் இடம்பெற்ற சம்பவம் தான் அது.

பாக்யராஜ் இயக்கிய “ராசுக்குட்டி” படத்திற்காக இசை அமைக்க இளையராஜாவை பொள்ளாச்சிக்கு அழைத்துச் சென்றாராம். அங்கு ஒரு தோட்டத்தில் அமர்ந்து அந்த படத்திற்கான பாடல்களை கம்போஸ் செய்து கொண்டிருந்தார் இளையராஜா. பாக்யராஜ் கேட்ட பாடல்களுக்கு கூடுதலாக, இளையராஜா இன்னும் இரண்டு மெட்டுகளையும் உருவாக்கியிருந்தாராம்.

அந்த இரண்டு மெட்டுகளும் பாக்யராஜுக்கு மிகவும் பிடித்ததால்,
“இதை இப்போ இந்த படத்தில் பயன்படுத்த முடியவில்லை; அடுத்த படத்தில் பயன்படுத்திக்கொள்கிறேன்” என்று சொல்லி வைத்திருந்தாராம். இளையராஜாவும் அதற்கு சம்மதித்திருந்தார்.

பின்னர் அந்த இரண்டு மெட்டுகளே

• “ஒரு நாளும் உனை மறவாத”

• “நிலவே முகம் காட்டு”

என்ற பாடல்களாக உருவானது.

ஆனால் ஒரு நாள் பாக்யராஜ் ஏவிஎம் ஸ்டூடியோ சென்றபோது, ஒரு அறையில் “ஒரு நாளும் உனை மறவாத” பாடல் ஒலித்துக் கொண்டிருந்ததாம். இது தன்னுடைய படத்துக்காக கம்போஸ் செய்யப்பட்ட பாடல் என்பதால் அவர் ஆச்சரியமடைந்தார்.

அந்த அறைக்குள் சென்று பார்த்தபோது, இயக்குநர் ஆர்.வி.உதயகுமார் இயக்கத்தில் ரஜினிகாந்த் நடித்த “எஜமான்” படத்திற்காக அந்த பாடலின் பதிவு நடந்து கொண்டிருந்தது.

இதைக் கண்ட பாக்யராஜ்,
“இது என்னோட படத்துக்காக போட்ட பாடலாச்சே… எப்படி இங்க பதிவு பண்றீங்க?” என்று கேட்டாராம். பின்னர் தான் அந்த பாடலை இளையராஜா எஜமான் படத்துக்கு கொடுத்துள்ளார் என்பதை அவர் புரிந்துகொண்டார்.

இது தெரிந்த பிறகும், இளையராஜாவின் இசைக்கு இருந்த மரியாதை காரணமாக பாக்யராஜ் இந்த விஷயத்தை பெரிதுபடுத்தவில்லை. பெரிய மனதுடன் அதை விட்டுவிட்டார்.

பின்னாளில் பாக்யராஜ் தானும் இசையமைப்பாளராக மாறி,“இது நம்ம ஆளு”, “ஆராரோ ஆரிராரோ”, “பொண்ணு பாக்க போறேன்”, “பவுனு பவுனுதான்”, “ஞானப்பழம்” போன்ற படங்களுக்கு இசையமைத்ததும் குறிப்பிடத்தக்கது.