இந்திய உணவுப் பாதுகாப்பு மற்றும் தர நிர்ணய ஆணையம் (FSSAI), முன்னணி மதுபான உற்பத்தி நிறுவனங்கள் உணவுப் பாதுகாப்பு மற்றும் லேபிளிங் விதிமுறைகளை மீறியதாகக் கூறி அதிரடி அமலாக்க நடவடிக்கையைத் தொடங்கியுள்ளது. ஓல்ட் மங்க், மெக்டொவல்ஸ், பேக்பைப்பர், ஆன்டிகுவிட்டி ப்ளூ மற்றும் ராயல் சேலஞ்ச் உள்ளிட்ட பிரபல பிராண்டுகள் இதில் சிக்கியுள்ளன.

FSSAI ஆய்வில் கண்டறியப்பட்ட முக்கிய விதிமீறல்கள்
செயற்கைச் சுவையூட்டிகள் பயன்பாடு: வழக்கமான நொதித்தல் மற்றும் பக்குவப்படுத்துதல் முறையில் இயற்கையான சுவையைப் பெறுவதற்குப் பதிலாக, நடுநிலை ஆல்கஹாலில் (Neutral Alcohol) வெளியில் இருந்து செயற்கையாக "ரம்" மற்றும் "விஸ்கி" சுவையூட்டிகளைச் சேர்த்து நுகர்வோரை ஏமாற்றியது ஆய்வகப் பரிசோதனைகளில் அம்பலமாகியுள்ளது.

தவறான லேபிளிங்: இத்தகைய பானங்களை "ரம் சுவையூட்டப்பட்ட ஸ்பிரிட்" அல்லது "விஸ்கி சுவையூட்டப்பட்ட ஸ்பிரிட்" எனக் குறிப்பிடாமல், சாதாரண ரம் அல்லது விஸ்கி என சந்தைப்படுத்தியது கண்டறியப்பட்டுள்ளது.

போலியான பழமை உரிமை கோரல்: 'ஓல்ட் மங்க் XXX ரம்' பாட்டிலில் "7 ஆண்டுகள் பழமையான கலவை" (7 years old blend) எனக் குறிப்பிடப்பட்டிருந்தாலும், அதில் 5 சதவீதத்திற்கும் குறைவாகவே பக்குவப்பட்ட ரம் ஸ்பிரிட் இருப்பது சோதனையில் தெரியவந்துள்ளது. இது எஃப்.எஸ்.எஸ் 2018 விதிகளுக்கு முற்றிலும் எதிரானது.

FSSAI-ன் அதிரடி உத்தரவுகள் & தடை
குறிப்பிட்ட தயாரிப்புகளுக்குத் தடை: மோகன் ராக்கி ஸ்பிரிங்வாட்டர் (ஓல்ட் மங்க்), யுனைடெட் ஸ்பிரிட்ஸ் (மெக்டொவல்ஸ் நம்பர் 1 ரம்), இன்ப்ரூ பெவரேஜஸ் மற்றும் அசோசியேட்ஸ் ஆல்கஹால் ஆகிய நிறுவனங்களின் குறிப்பிட்ட தயாரிப்புகளின் விற்பனைக்கு FSSAI உடனடியாகத் தடை விதித்துள்ளது.

லேபிளிங் மாற்றம் கட்டாயம்: தற்போது கையிருப்பில் உள்ள பானங்களை விற்பனை செய்ய வேண்டுமெனில், பாட்டிலின் முன்பக்க லேபிளில் பானத்தின் உண்மையான தன்மையை தெளிவாக வெளிப்படுத்திய பின்னரே அனுமதிக்கப்படும் என உத்தரவிடப்பட்டுள்ளது.

எதிர்காலக் கட்டுப்பாடு: இனிவரும் காலங்களில் இத்தகைய செயற்கைச் சுவையூட்டிகளைப் பயன்படுத்துவதை உற்பத்தியாளர்கள் உடனடியாக நிறுத்த வேண்டும் எனவும், விதிமுறைகளுக்கு உட்பட்டு இயங்கும் மற்ற உற்பத்தியாளர்களுக்குப் பாதிப்பில்லை என்றும் FSSAI தெளிவுபடுத்தியுள்ளது.