கேரள மாநிலம் பாலக்காடு அருகிலுள்ள கீழ கேத்திரத்தைச் சேர்ந்த கிருஷ்ணதாஸ் (50) மற்றும் மாத்தூர் வெங்கார பரம்பு பகுதியைச் சேர்ந்த மணிகண்டன் (52) ஆகியோர், தனியார் லாரி போக்குவரத்து நிறுவனத்தில் டிரைவர்களாக பணியாற்றி வந்தனர். நீண்ட தூர சரக்கு போக்குவரத்திற்காக அடிக்கடி பயணிக்கும் இவர்கள், ஒரே லாரியில் இணைந்து பணிபுரிந்து வந்தனர்.

ஆனால், நீண்ட பயணங்களில் கிருஷ்ணதாஸ் அடிக்கடி தூங்கிவிடுவதால், பெரும்பாலான நேரங்களில் லாரியை மணிகண்டனே ஓட்ட வேண்டிய சூழல் உருவாகி வந்தது.

இந்த நிலைமை, மணிகண்டனுக்குள் நீண்டநாளாக ஏமாற்றமும் ஆத்திரமும் தேங்கச் செய்தது.இந்தச் சம்பவ நாளில், இருவரும் கோவையை நோக்கி லாரியில் பயணித்துக் கொண்டிருந்தனர்.

சுந்தராபுரம் அருகே சென்றுகொண்டிருந்தபோது, லாரியை மணிகண்டன் இயக்கிக் கொண்டிருந்தார். அதே நேரத்தில், கிருஷ்ணதாஸ் வழக்கம்போல் தூங்கிக் கொண்டிருந்தார்.

இதைக் கண்ட மணிகண்டன் கடும் கோபமடைந்து, “நான் மட்டும் லாரி ஓட்டிக் கொண்டிருக்கிறேன்; நீ தூங்கிக் கொண்டு சம்பளம் வாங்குகிறாய்” என்று வாக்குவாதத்தைத் தொடங்கினார்.

மேலும் இந்த வாக்குவாதம் தீவிரமடைந்த நிலையில், ஆத்திரத்தின் உச்சத்தில் மணிகண்டன், கிருஷ்ணதாஸை தாக்கி, ஓடிக்கொண்டிருந்த லாரியிலிருந்து கீழே தள்ளியதாக தெரிவிக்கப்படுகின்றது.

இந்த அதிர்ச்சிகர சம்பவத்தில் கிருஷ்ணதாஸ் கடுமையாக காயமடைந்தார். அருகிலிருந்தவர்கள் உடனடியாக அவரை மீட்டு கோவை அரசு மருத்துவமனைக்கு அனுப்பினர்.

அங்கு அவருக்கு தீவிர சிகிச்சை அளிக்கப்பட்டு வருகிறது.இந்த சம்பவம் தொடர்பாக கிருஷ்ணதாஸின் மனைவி சரிதா அளித்த புகாரின் பேரில், சுந்தராபுரம் காவலர்கள் வழக்குப் பதிவு செய்து மணிகண்டனை கைது செய்தனர்.

பின்னர் அவர் மதுக்கரை நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டார் என தெரிவிக்கப்படுகின்றது.