சிம்பு நடிப்பில் இறுதியாக வெளியான திரைப்படம் தான் வெந்து தணிந்தது காடு. இந்த படத்திற்கு ரசிகர்கள் மத்தியில் நல்ல வரவேற்பு கிடைத்தது. இந்த படத்தை தொடர்ந்து, சிம்புவின் ரசிகர்கள் மிகுந்த உற்சாகத்துடன் அவரை ஊக்குவித்து வருகின்றனர்.

அதனைத் தொடர்ந்து சிம்பு நடிப்பில் 'பத்து தல' திரைப்படம் வெளியாக இருக்கின்றது. இந்த திரைப்படத்தை என்.கிருஷ்ணா இயக்க, ஞானவேல் ராஜா தயாரிக்கிறார். மேலும், இந்த படத்தில் நடிகை ப்ரியா பவானி சங்கர் மற்றும் கௌதம் கார்த்திக் உள்ளிட்டோர் நடித்துள்ளனர்.

 சமீபத்தில், இந்த படத்தின் படப்பிடிப்புகள் அனைத்தும் முடிவடைந்த நிலையில், வரும் மார்ச் 30ம் தேதி வெளியாகும் என படக்குழு அறிவித்துள்ளது.

இதனிடையே பத்து தல படத்தின் முதல் பாடல் சிம்பு பிறந்த நாளை முன்னிட்டு வெளியிடப்பட்டிருந்தது. மேலும், பத்து தல திரைப்படத்தின் இசை வெளியீட்டு விழா மார்ச் 18ம் தேதி நடைபெற உள்ளதாக தகவல் வெளியாகியுள்ளது.

இந்த நிலையில் நடிகர் சிம்புவின் பத்து தல திரைப்படத்தின் டீஸர் இன்று மாலை 5.31 மணிக்கு படக்குழு வெளியிட்டுள்ளது. அதில், நடிகர் சிம்பு பக்கா கேங்ஸ்டராக தோற்றமளிக்கிறார். மேலும் இந்த திரைப்படம் அதிரடி ஆக்சன், காட்சிகளுடன் நிறைந்த திரைப்படம் ஆக இருக்கும் என எதிர்பார்க்கப்படுகிறது.