தமிழ் சினிமாவில் தொடர்ந்து ஹிட் படங்களை குவித்து, நம்பிக்கைக்குரிய இளம் ஹீரோவாக வளர்ந்து வரும் ரியோ ராஜ், தனது புதிய படமான ‘ராம் இன் லீலா’வுடன் மீண்டும் திரையுலகில் கவனம் ஈர்த்துள்ளார். விஜய் டிவி மூலம் பிரபலமான ரியோ, ‘சத்ரியன்’ படத்தில் நண்பன் கதாபாத்திரமாக அறிமுகமானார். பின்னர் சிவகார்த்திகேயன் தயாரிப்பில் உருவான ‘நெஞ்சமுண்டு நேர்மையுண்டு ஓடுராஜா’ மூலம் ஹீரோவாக தன்னை நிலைநிறுத்திக் கொண்டார்.

அதற்குப் பிறகு ‘பிளான் பண்ணி பண்ணனும்’, ‘ஜோ’, ‘நிறம் மாறும் உலகில்’, ‘ஸ்வீட் ஹார்ட்’, மற்றும் சமீபத்திய பெரும் ஹிட் ‘ஆண் பாவம் பொல்லாதது’ ஆகிய படங்களின் வெற்றியால் ரியோ ராஜ் தற்போது தமிழ் சினிமாவின் குறிப்பிடத்தக்க பாக்ஸ் ஆபீஸ் ஹீரோக்களில் ஒருவராக மாறியுள்ளார். ‘ஆண் பாவம் பொல்லாதது’ படம் மட்டும் 20 கோடிக்கும் மேல் வசூல் செய்து அவருக்கு பெரிய வெற்றியைத் தந்தது.

ரியோ–மாளவிகா மனோஜ் ஜோடி அமைந்த ‘ஜோ’ மற்றும் ‘ஆண் பாவம் பொல்லாதது’ இரண்டும் வெற்றியடைய, மீண்டும் அதே கூட்டணி வரும் என எதிர்பார்த்த ரசிகர்களுக்கு இந்த முறை மாற்றம். ‘ராம் இன் லீலா’வில் ரியோ ராஜ் ஜோடியாக இன்ஸ்டாகிராம் மாடலாக கவனம் பெறும் வர்த்திகா ஜெயின் அறிமுகமாகிறார். ஃபர்ஸ்ட் லுக்கிலேயே அவர் க்யூட்டான தோற்றம் ரசிகர்களிடையே பேசுபொருளாகியுள்ளது.

இந்த படத்தை ராமசந்திரன் கண்ணன் எழுதி இயக்கியுள்ளார். ரியோ ராஜின் வாழ்க்கையின் லீலைகள் மற்றும் காதலை நகைச்சுவை மற்றும் உணர்ச்சி கலந்த வடிவில் காட்சிப்படுத்தும் முயற்சியாக படம் இருக்கும் என படக்குழு எதிர்பார்ப்பு உருவாக்கியுள்ளது.

முன்னாள் பிக் பாஸ் போட்டியாளரான ரியோவுக்கு ஆதரவாக, தற்போது பிக் பாஸ் தொகுத்து வழங்கி வரும் விஜய் சேதுபதி தான் ‘ராம் இன் லீலா’ படத்தின் ஃபர்ஸ்ட் லுக் போஸ்டரை வெளியிட்டார். இதனால் படம் குறித்து ரசிகர்களிடையே மேலும் ஆர்வம் அதிகரித்துள்ளது.

குறைந்த பட்ஜெட்டில் 5–8 கோடி மதிப்பில் படங்களை உருவாக்கி, 20 கோடி வரை வசூல் செய்யும் ரியோ ராஜ், தற்போது தமிழ்த் திரையுலகில் ஒரு லாபகரமான ஹீரோவாகவும், சரியான கதைகளைத் தேர்வு செய்யும் நட்சத்திரமாகவும் தன்னை நிரூபித்துள்ளார்.

‘ராம் இன் லீலா’ ரியோ ராஜ்க்கு மேலும் ஒரு ஹிட் சேர்க்குமா என்பதைக் காண ரசிகர்கள் ஆவலுடன் காத்திருக்கின்றனர்.