தென்னிந்திய திரையுலகை தூக்கி ஆட்டும் விதமாக, இசைமைப்பாளர் ஏ.ஆர். ரகுமான் தற்போது ஒரு காப்புரிமை சர்ச்சையில் சிக்கியுள்ளார். மணிரத்னம் இயக்கத்தில் கடந்த 2023-ஆம் ஆண்டு வெளியான பொன்னியின் செல்வன் 2 திரைப்படத்தில் இடம்பெற்ற "வீர ராஜ வீர" என்ற பாடல் தொடர்பாக, புகழ்பெற்ற பாடகர் வாசிஃபுதீன் தாகூர் தொடர்ந்த வழக்கில், டெல்லி உயர் நீதிமன்றம் ரூ.2 கோடி அபராதம் விதித்து உத்தரவு பிறப்பித்துள்ளது.

இந்த பாடல், வாசிஃபுதீன் தாகூரின் தாத்தா மற்றும் தந்தை இயற்றிய 'சிவா ஸ்துதி' இசையை மையமாகக் கொண்டு அமைக்கப்பட்டுள்ளது என்று அவர் குற்றச்சாட்டு எழுப்பியிருந்தார். இது, அவர்களுடைய குடும்ப காப்புரிமைக்கு எதிரான நடவடிக்கையாகும் என அவர் நீதிமன்றத்தில் வலியுறுத்தியிருந்தார்.

இந்த வழக்கை பரிசீலித்த டெல்லி உயர் நீதிமன்றம், ஏ.ஆர். ரகுமான் மற்றும் படத்தினை தயாரித்த லைகா மற்றும் மெட்ராஸ் டாக்கீஸ் நிறுவனங்கள் ரூ.2 கோடி நஷ்டஈடு வழங்க வேண்டும் எனத் தண்டனை விதித்துள்ளது.

ஏற்கனவே 'ரோஜா' படத்தின் மூலம் திரையுலகில் இசை அமைப்பாளராக அறிமுகமாகி, உலகளாவிய அங்கீகாரம் பெற்ற ரகுமான், இதுபோன்ற ஒரு சர்ச்சையில் சிக்குவது அதிர்ச்சி அளிக்கிறது. ஆஸ்கர் விருது பெற்ற இவருடைய இசை, சாதனைகள், மற்றும் ரசிகர்களிடையே உள்ள பிரபலத்தை நினைத்தால், இந்த விவகாரம் மிக பெரிய பரபரப்பை கிளப்பி உள்ளது.

'பொன்னியின் செல்வன்' படத்தினை கல்கியின் புகழ்பெற்ற நாவலை அடிப்படையாக கொண்டு இயக்குனர் மணிரத்னம் உருவாக்கினார். இதில் விக்ரம், ஐஸ்வர்யா ராய், கார்த்தி, ஜெயம் ரவி, திரிஷா உள்ளிட்டோர் முக்கிய கதாப்பாத்திரங்களில் நடித்திருந்தனர். இரு பாகங்களாக வெளியான இப்படம், உலகம் முழுவதும் வசூல் சாதனைகளையும், விமர்சன வரவேற்புகளையும் பெற்றிருந்தது.

இந்நிலையில், 'வீர ராஜ வீர' பாடலுக்காக காப்புரிமை சட்டங்களை மீறியதாக ஏ.ஆர். ரகுமான் மீது விதிக்கப்பட்ட அபராதம், இந்திய திரையுலகத்தில் எதிர்வினைகளை கிளப்பியுள்ளது. இது எதிர்காலத்தில் படப்பாடல்களின் காப்புரிமை மீதான விழிப்புணர்வையும் அதிகரிக்கச் செய்யும் என்று எதிர்பார்க்கப்படுகிறது.