சுதா கொங்கரா இயக்கத்தில், சிவகார்த்திகேயன் நடிப்பில் உருவாகியுள்ள ‘பராசக்தி’ திரைப்படத்தின் டிரெய்லர் வெளியாகி சமூக வலைதளங்களில் தீவிரமாக வைரலாகி வருகிறது. 1960-களில் தமிழகத்தில் நடைபெற்ற இந்தி எதிர்ப்புப் போராட்டத்தை மையமாகக் கொண்டு உருவாகியுள்ள இந்த படம், ஒரு சாமானிய மனிதன் எப்படி ஒரு புரட்சித் தலைவனாக மாறுகிறான் என்பதை வலுவாகப் பதிவு செய்கிறது.

பொங்கல் பண்டிகையை முன்னிட்டு, விஜய்யின் ‘ஜன நாயகன்’ படத்துடன் நேரடியாக மோதத் தயாராகி வரும் நிலையில், ‘பராசக்தி’ டிரெய்லர் ரசிகர்களிடையே பெரும் எதிர்பார்ப்பை உருவாக்கியுள்ளது. சுமார் 200 விநாடிகள் ஓடும் இந்த டிரெய்லர், ஆரம்பம் முதல் முடிவு வரை பார்வையாளர்களை கட்டிப் போடும் வகையில் அமைந்துள்ளது.

டிரெய்லரில், ஒரு எளிய வாழ்க்கை நடத்தும் இளைஞனாக இருக்கும் சிவகார்த்திகேயன், காலப்போக்கில் மாணவர் புரட்சியின் முக்கிய முகமாக மாறும் விதம் மிக நுணுக்கமாக சித்தரிக்கப்பட்டுள்ளது. மாணவர் அரசியல், அடக்குமுறை, காவல் துறையின் கடுமையான அணுகுமுறை என 60-களின் அரசியல் சூழல் திரையில் உயிர்ப்புடன் வெளிப்படுகிறது.

படத்தில் அதர்வா மாணவர் தலைவராக வலுவான கதாபாத்திரத்தில் நடித்துள்ளார். ரவி மோகன் அதிகாரம் கொண்ட காவல்துறை அதிகாரியாக வில்லன் வேடத்தில் மிரட்டலான நடிப்பை வழங்கியுள்ளார். ஸ்ரீலீலா முக்கியமான பெண் கதாபாத்திரத்தில் தோன்றுகிறார். நடிகர்களின் நடிப்பும், அரசியல் பின்னணியும் டிரெய்லரை இன்னும் தாக்கமுள்ளதாக மாற்றியுள்ளது.

இந்த படம் ஜி.வி. பிரகாஷ் குமாரின் 100-வது திரைப்படம் என்பதும் குறிப்பிடத்தக்கது. ஏற்கனவே வெளியாகியுள்ள ‘அடி அலையே’, ‘ரத்னமாலா’ பாடல்கள் ரசிகர்களிடம் நல்ல வரவேற்பைப் பெற்ற நிலையில், டிரெய்லரில் இடம்பெறும் பின்னணி இசை காட்சிகளின் தாக்கத்தை பல மடங்கு உயர்த்தியுள்ளது.

படத்திற்காக சென்னை வள்ளுவர் கோட்டத்தில், 1960-களின் காலக்கட்டத்தை பிரதிபலிக்கும் வகையில் பிரம்மாண்டமான செட்கள் அமைக்கப்பட்டுள்ளன. பழைய காலத்து ரயில்கள், கார்கள், ரயில் நிலைய அமைப்புகள் போன்றவை பொதுமக்கள் பார்வைக்காகக் கண்காட்சியாக வைக்கப்பட்டு பெரும் வரவேற்பைப் பெற்றன. இது படத்தின் தயாரிப்பு தரத்தை வெளிப்படுத்தும் ஒரு முக்கிய அம்சமாக பார்க்கப்படுகிறது.

நேற்று ‘பராசக்தி’ படத்தின் இசை வெளியீட்டு விழா கோலாகலமாக நடைபெற்ற நிலையில், தற்போது வெளியாகியுள்ள டிரெய்லர் படத்தின் மீதான எதிர்பார்ப்பை உச்சத்துக்கு கொண்டு சென்றுள்ளது. வரும் ஜனவரி 10ஆம் தேதி, பொங்கல் விடுமுறையை முன்னிட்டு, ‘பராசக்தி’ உலகம் முழுவதும் திரையரங்குகளில் வெளியாகிறது.