நடிகர் அஜித்குமார் திரை வாழ்க்கையில் மிக முக்கியமான படமாக கருதப்படும் ‘மங்காத்தா’ திரைப்படம், ரசிகர்களின் நீண்ட நாள் கோரிக்கையை நிறைவேற்றும் வகையில் வரும் ஜனவரி 23ஆம் தேதி மீண்டும் திரையரங்குகளில் ரீ-ரிலீஸ் செய்யப்படுகிறது. இதனை படக்குழு அதிகாரப்பூர்வமாக அறிவித்துள்ள நிலையில், அஜித் ரசிகர்கள் மத்தியில் பெரும் உற்சாகம் ஏற்பட்டுள்ளது.

இயக்குநர் வெங்கட் பிரபு இயக்கத்தில், சன் பிக்சர்ஸ் தயாரிப்பில், அஜித்தின் 50வது படமாக கடந்த 2011ஆம் ஆண்டு வெளியான மங்காத்தா, வெளியான போதே பிரமாண்டமான வெற்றியைப் பெற்றது. வித்தியாசமான கதைக்களம், மிரட்டலான திரைக்கதை, மற்றும் முற்றிலும் புதிய அஜித் இமேஜ் ஆகிய காரணங்களால், இந்த படம் காலத்தால் அழியாத கல்ட் கிளாசிக்காக மாறியது.

அஜித் நடித்த தீனா, அட்டகாசம் உள்ளிட்ட சில படங்கள் ஏற்கனவே ரீ-ரிலீஸ் செய்யப்பட்டிருந்தாலும், மங்காத்தாவை மீண்டும் திரையிட வேண்டும் என்ற கோரிக்கை ரசிகர்கள் மட்டுமல்லாமல், தியேட்டர் உரிமையாளர்கள் தரப்பிலிருந்தும் தொடர்ந்து முன்வைக்கப்பட்டு வந்தது. சமீப காலமாக ரீ-ரிலீஸ் செய்யப்படும் படங்களுக்கு ரசிகர்கள் அளித்து வரும் அமோக ஆதரவை கருத்தில் கொண்டு, மங்காத்தாவையும் மீண்டும் வெளியிட படக்குழு முடிவு செய்துள்ளது.

மங்காத்தா படத்தில், அஜித் வில்லனா அல்லது ஹீரோவா? என்ற கேள்வி இன்னும் பலரிடமும் நிலவுகிறது. கதையின் மையக் கதாபாத்திரமாக இருந்தாலும், முழுக்க முழுக்க வில்லத்தனமான குணாதிசயங்களுடன் தோன்றிய ‘விநாயக் மகாதேவ்’ கதாபாத்திரம், அஜித் ரசிகர்களுக்கு மறக்க முடியாத ஒன்றாக மாறியது. வெங்கட் பிரபுவின் கச்சிதமான திரைக்கதை, எதிர்பார்ப்புகளை உடைக்கும் ட்விஸ்ட்கள், மற்றும் யுவன் சங்கர் ராஜாவின் பின்னணி இசை படத்தின் பெரிய பலமாக அமைந்தது.

அஜித் படம் என்றாலே ஓப்பனிங் என்பதே தனி அடையாளமாக உள்ள நிலையில், வரும் ஜனவரி 23ஆம் தேதி ரீ-ரிலீஸிலும் அதே உற்சாகம் திரையரங்குகளில் வெடிக்கும் என ரசிகர்கள் நம்பிக்கை தெரிவிக்கின்றனர். குறிப்பாக,– செஸ் போர்டு காட்சி,– பைக் வீலிங் காட்சி,– அர்ஜுனுடன் மொபைலில் பேசும் காட்சி,– “I am not a saint, I am not a criminal” போன்ற டயலாக்கள்
என பல காட்சிகளில் தியேட்டர்கள் அதிரும் என எதிர்பார்க்கப்படுகிறது.

15 ஆண்டுகளுக்குப் பிறகு, ‘கிங் மேக்கர்’ விநாயக் மகாதேவ் கதாபாத்திரத்தை மீண்டும் பெரிய திரையில் காணும் வாய்ப்பு கிடைத்துள்ளதால், மங்காத்தா ரீ-ரிலீஸ் அஜித் ரசிகர்களுக்கு ஒரு திருவிழாவாக மாறும் என்பதில் எந்த சந்தேகமும் இல்லை.