சென்னை: திருச்சி கிழக்கு சட்டப்பேரவைத் தொகுதி இடைத்தேர்தலை முன்னிட்டு தமிழக அரசியல் சூடுபிடித்துள்ளது. முன்னாள் முதலமைச்சர் மு.க.ஸ்டாலின் இந்தத் தொகுதியில் போட்டியிடலாம் என்ற தகவல்கள் வெளியாகி வரும் நிலையில், அவருக்கு எதிராக மதிமுக பொதுச்செயலாளர் வைகோவை வேட்பாளராக நிறுத்துவது குறித்து தமிழக வெற்றிக் கழகம் (தவெக) ஆலோசித்து வருவதாக அரசியல் வட்டாரங்களில் தகவல்கள் பரவி வருகின்றன.

2026 சட்டப்பேரவைத் தேர்தலில் பெரம்பூர் மற்றும் திருச்சி கிழக்கு ஆகிய இரண்டு தொகுதிகளில் வெற்றி பெற்ற முதலமைச்சர் விஜய், விதிமுறையின்படி திருச்சி கிழக்கு தொகுதி உறுப்பினர் பதவியை ராஜினாமா செய்தார். இதையடுத்து அத்தொகுதியில் இடைத்தேர்தல் நடைபெறவுள்ளது.

இந்தத் தேர்தல் ஆளுங்கட்சி மற்றும் பிரதான எதிர்க்கட்சியான திமுகவின் அரசியல் பலத்தை சோதிக்கும் முக்கிய தேர்தலாகக் கருதப்படுவதால், வேட்பாளர் தேர்வு மீது அதிக கவனம் செலுத்தப்பட்டு வருகிறது.

சட்டப்பேரவைத் தேர்தலில் தோல்வியடைந்த திமுக, தனது அரசியல் செல்வாக்கை மீண்டும் நிரூபிக்க வேண்டிய கட்டாயத்தில் இருப்பதாகக் கூறப்படுகிறது. இதற்கிடையில், சட்டப்பேரவையில் முதலமைச்சர் விஜய், மு.க.ஸ்டாலினை குறிப்பிட்டு கூறிய கருத்துகள் அரசியல் விவாதத்தை ஏற்படுத்திய நிலையில், ஸ்டாலின் மீண்டும் சட்டப்பேரவைக்குள் வர வேண்டும் என்ற கோரிக்கை திமுகவினரிடையே வலுத்துள்ளது.

திருச்சி தெற்கு மாவட்ட திமுக சார்பில், திருச்சி கிழக்கு இடைத்தேர்தலில் ஸ்டாலின் போட்டியிட வேண்டும் என்ற தீர்மானம் நிறைவேற்றப்பட்டதாகவும், முன்னாள் அமைச்சர் கே.என்.நேருவும் ஸ்டாலின் சட்டப்பேரவைக்கு திரும்புவார் என தெரிவித்ததாகவும் கூறப்படுகிறது.

எனினும், இதுகுறித்து செய்தியாளர்கள் எழுப்பிய கேள்விக்கு, "இன்னும் எந்த முடிவும் எடுக்கப்படவில்லை" என்று மு.க.ஸ்டாலின் பதிலளித்திருந்தார்.

இந்த நிலையில், ஸ்டாலின் போட்டியிட்டால் அவருக்கு இணையான அரசியல் அனுபவம் கொண்ட வேட்பாளரை களமிறக்க வேண்டும் என்ற நோக்கில் தவெக ஆலோசித்து வருவதாக கூறப்படுகிறது. அதன் ஒரு பகுதியாக, மதிமுக பொதுச்செயலாளர் வைகோவை வேட்பாளராக நிறுத்துவது குறித்து பேச்சுவார்த்தை நடைபெறுவதாக தகவல்கள் வெளியாகியுள்ளன.

அண்மையில் நடைபெற்ற மதிமுக பொதுக்குழு கூட்டத்திற்குப் பிறகு அக்கட்சி திமுக கூட்டணியில் இருந்து விலகியதாக கூறப்படும் சூழலில், வைகோவின் பெயர் இந்தத் தேர்தல் தொடர்பாக பேசப்படுகிறது.

மேலும், திருச்சி மக்களவைத் தொகுதியில் மதிமுக முதன்மைச் செயலாளர் துரை வைகோ தற்போது எம்.பி.யாக உள்ளதுடன், அக்கட்சிக்கு திருச்சி மாவட்டத்தில் ஓரளவு வாக்கு வங்கி இருப்பதாக அரசியல் ஆய்வாளர்கள் கருதுகின்றனர். இதனால், வைகோவை வேட்பாளராக நிறுத்தினால் போட்டி விறுவிறுப்பாக அமையும் என்ற கணிப்புகளும் வெளியாகி வருகின்றன.

இருப்பினும், ஸ்டாலின் அல்லது வைகோ போட்டியிடுவது குறித்து திமுக, தவெக அல்லது மதிமுக ஆகிய எந்தக் கட்சியும் இதுவரை அதிகாரப்பூர்வ அறிவிப்பை வெளியிடவில்லை. தேர்தல் ஆணையம் இடைத்தேர்தல் அட்டவணையை அறிவித்த பிறகே வேட்பாளர்கள் மற்றும் கூட்டணி நிலைப்பாடுகள் தெளிவாகும் என அரசியல் பார்வையாளர்கள் தெரிவிக்கின்றனர்.