சென்னை: அதிமுகவில் சமீபத்தில் நடைபெற்ற நிர்வாகிகள் நியமனம் கட்சிக்குள் மீண்டும் பரபரப்பை ஏற்படுத்தியுள்ளது. பல முன்னாள் அமைச்சர்களுக்கு முக்கிய பொறுப்புகள் வழங்கப்பட்ட நிலையில், முன்னாள் அமைச்சர் மற்றும் மயிலம் தொகுதி எம்.எல்.ஏ. சி.வி.சண்முகத்தின் பெயர் பட்டியலில் இடம்பெறாதது அரசியல் வட்டாரங்களில் கவனத்தை ஈர்த்துள்ளது.

2026 சட்டப்பேரவைத் தேர்தலுக்குப் பிறகு அதிமுகவில் உள்கட்சி கருத்து வேறுபாடுகள் தீவிரமடைந்தன. எடப்பாடி பழனிசாமியின் தலைமையை எதிர்த்து சில முன்னாள் அமைச்சர்கள் மற்றும் அவர்களது ஆதரவாளர்கள் அதிருப்தி தெரிவித்ததாக கூறப்பட்டது. இதையடுத்து பலரின் கட்சிப் பொறுப்புகள் மாற்றப்பட்டதுடன், சில நிர்வாகிகளும் பதவிகளில் இருந்து நீக்கப்பட்டனர்.

பின்னர் ஏற்பட்ட சமரச முயற்சிகளின் ஒரு பகுதியாக, முன்னாள் அமைச்சர்கள் எஸ்.பி.வேலுமணி, நத்தம் விஸ்வநாதன் உள்ளிட்டோர் எடப்பாடி பழனிசாமியை சந்தித்து ஆலோசனை நடத்தினர். அதன் தொடர்ச்சியாக வெளியிடப்பட்ட புதிய நிர்வாகிகள் பட்டியலில், எஸ்.பி.வேலுமணி மற்றும் நத்தம் விஸ்வநாதனுக்கு துணைப் பொதுச்செயலாளர் பொறுப்பும், எம்.ஆர்.விஜயபாஸ்கர், கே.பி.அன்பழகன், காமராஜ், கே.சி.வீரமணி உள்ளிட்டோருக்கு அமைப்புச் செயலாளர் பொறுப்பும் வழங்கப்பட்டது.

ஆனால், கட்சியின் மூத்த தலைவர்களில் ஒருவராகக் கருதப்படும் சி.வி.சண்முகத்திற்கு எந்தப் பொறுப்பும் வழங்கப்படாதது பேசுபொருளாகியுள்ளது.

ஜெயலலிதா தலைமையிலான ஆட்சியில் இரு முறை அமைச்சராகப் பதவி வகித்த சி.வி.சண்முகம், விழுப்புரம் மாவட்டத்தில் அதிமுகவின் முக்கிய முகமாக நீண்ட காலம் செயல்பட்டவர். ஜெயலலிதா மறைவுக்குப் பிறகும் கட்சியில் செல்வாக்கு மிக்க தலைவராக இருந்து வந்தார்.

எனினும், கட்சி முடிவுகள் மற்றும் கூட்டணி தொடர்பான சில விவகாரங்களில் எடப்பாடி பழனிசாமியுடன் கருத்து வேறுபாடு ஏற்பட்டதாக அரசியல் வட்டாரங்களில் பேசப்பட்டது. தேர்தலுக்குப் பிறகு கட்சிக்குள் ஏற்பட்ட மாற்றங்களின் போது, தன்னிடம் இருந்து பறிக்கப்பட்ட மாவட்டச் செயலாளர் மற்றும் அமைப்புச் செயலாளர் பொறுப்புகளை மீண்டும் வழங்க வேண்டும் என்று அவர் வலியுறுத்தியதாகவும் தகவல்கள் வெளியாகின.

ஆனால், முதலில் அனைவரும் ஒன்றிணைந்து செயல்பட வேண்டும்; பதவிகள் குறித்து பின்னர் முடிவு செய்யலாம் என்ற நிலைப்பாட்டையே கட்சித் தலைமை எடுத்ததாக கூறப்படுகிறது. அதன் காரணமாகவே புதிய நிர்வாகிகள் பட்டியலில் சி.வி.சண்முகத்தின் பெயர் இடம்பெறவில்லை என கூறப்படுகிறது.

இதனால் அவரது ஆதரவாளர்கள் மத்தியில் அதிருப்தி நிலவி வருவதாக தகவல்கள் வெளியாகியுள்ளன. இருப்பினும், எதிர்காலத்தில் அவருக்கு மீண்டும் முக்கியப் பொறுப்பு வழங்கப்படுமா என்பது குறித்து இதுவரை அதிகாரப்பூர்வ தகவல் எதுவும் வெளியாகவில்லை.