இளையராஜாவின் இசை உரிமை மீறல் வழக்கால், நடிகை வனிதா விஜயகுமார் இயக்கிய Mrs & Mr திரைப்படம் தற்போது சர்ச்சையில் சிக்கியுள்ளது. 'மைக்கேல் மதன காமராஜன்' படத்தில் இடம்பெற்ற "சிவராத்திரி" பாடல், அனுமதி பெறாமல் பயன்படுத்தப்பட்டுள்ளதாக இசைஞானி இளையராஜா சென்னை உயர் நீதிமன்றத்தில் வழக்கு தொடர்ந்துள்ளார்.

வழக்கில் அவர் கூறியிருப்பதாவது:
தன்னுடைய இசையமைப்பில் உருவான "சிவராத்திரி" பாடல், வனிதா இயக்கிய Mrs & Mr திரைப்படத்தில் அனுமதியின்றி முழுமையாக பயன்படுத்தப்பட்டுள்ளது. இதன் மூலம் தனது காப்புரிமை மற்றும் நற்பெயர் பாதிக்கப்பட்டுள்ளது என அவர் தெரிவித்துள்ளார். இந்த வழக்கு வரும் திங்கட்கிழமை விசாரணைக்கு வரவுள்ளது.

இதற்கிடையே, படத்தின் டிரெய்லரில், இளையராஜாவின் பெயர் குறிப்பிடப்பட்டிருந்தாலும், அனுமதி பெறப்படவில்லை என்பது அவரது முக்கியமான குற்றச்சாட்டு. இந்த வழக்கு தொடர்வது, இனி இசையமைப்பாளர்களின் உரிமையை மீறி பாடல்கள் பயன்படுத்தும் படங்களுக்கு தடையாக அமையலாம் என எதிர்பார்க்கப்படுகிறது.

இளையராஜா ஏற்கனவே மஞ்சும்மல் பாய்ஸ், குட் பேட் அக்லி, லப்பர் பந்து போன்ற படங்களிலும் அனுமதியின்றி பழைய பாடல்களை பயன்படுத்தியதாகக் குற்றம்சாட்டி, நோட்டீஸ் அனுப்பியிருந்தார். அவர் தொடர்ந்து இசையமைப்பாளரின் உரிமையை பேணும் விதமாக சட்ட நடவடிக்கைகளை எடுத்து வருவது குறிப்பிடத்தக்கது.

இந்நிலையில், இளையராஜா வழக்குத் தொடர்வதையடுத்து, Mrs & Mr திரைப்படத்தின் மீது எதிர்பாராத எதிரொலி ஏற்பட வாய்ப்புள்ளது. இந்தப் படம் இன்று திரையரங்குகளில் வெளியான நிலையில், வனிதாவின் இயக்கத்திலும், அவரது மகள் ஜோவிகா தயாரிப்பிலும், ராபர்ட் – வனிதா ஆகியோர் முக்கிய கதாபாத்திரங்களில் நடித்துள்ளனர்.

சமூக வலைதளங்களில் இந்த விவகாரம் குறித்து கலந்துரையாடல்கள் துவங்கி விட்ட நிலையில், படம் எதிர்பார்த்த வரவேற்பைப் பெறுமா அல்லது இழுபறி வழக்கில் சிக்கிக் கொள்கிறதா என்பது வருங்காலத்தின் கையில் இருக்கிறது.