விஜய் தொலைக்காட்சியில் ஒளிபரப்பான ‘சரவணன் மீனாட்சி’ என்ற பிரபல சீரியலில் அம்மா கதாபாத்திரத்தில் நடித்ததன் மூலம் தமிழ் ரசிகர்களிடையே பரவலாக அறியப்பட்டவர் நடிகை லட்சுமி வாசுதேவன். இயல்பான நடிப்பும், குடும்பத்தோடு ஒன்றிணைந்த கதாபாத்திரமும் அவரை குறுகிய காலத்திலேயே ரசிகர்களின் மனதில் நிலைநிறுத்தியது.

அந்த சீரியலின் வெற்றியைத் தொடர்ந்து, பல்வேறு தொலைக்காட்சி தொடர்களில் அம்மா, அத்தை, அக்கா போன்ற முக்கியமான துணை கதாபாத்திரங்களில் தொடர்ந்து நடித்து வருகிறார். சின்னத்திரையில் பாரம்பரியமான குடும்பப் பெண்மணியாக தோன்றும் லட்சுமி வாசுதேவன், சமூக வலைதளங்களில் முற்றிலும் மாறுபட்ட தோற்றத்தில் ரசிகர்களை ஆச்சரியப்படுத்தி வருகிறார்.

இணையத்தில் எப்போதும் ஆக்டிவாக இருக்கும் அவர், தனது இன்ஸ்டாகிராம் பக்கத்தில் அடிக்கடி புகைப்படங்கள், வீடியோக்களை பகிர்ந்து ரசிகர்களுடன் நேரடி தொடர்பில் இருப்பது வழக்கமாக உள்ளது. அந்த வகையில், சமீபத்தில் அவர் பகிர்ந்துள்ள புத்தாண்டு வாழ்த்து போட்டோ இணையத்தில் பெரும் கவனத்தை ஈர்த்துள்ளது.

நீச்சல் குளத்தில், நீச்சல் உடையில் புத்தாண்டு வாழ்த்துகளை தெரிவிக்கும் அந்த புகைப்படம், ரசிகர்களை திக்குமுக்காட வைத்துள்ளது. சீரியல்களில் எட்டு முழ புடவையுடன் பாரம்பரிய அம்மா கதாபாத்திரத்தில் நடித்த நடிகை, இவ்வாறு மாடர்ன் லுக்கில் தோன்றியது பலருக்கு ஆச்சரியமாக அமைந்துள்ளது.

இந்த புகைப்படம் வெளியானதைத் தொடர்ந்து, சமூக வலைதளங்களில் கருத்துகள் குவிந்து வருகின்றன. ஒரு தரப்பினர் அவரது தன்னம்பிக்கை, உடல் ஆரோக்கியம் மற்றும் வாழ்க்கை மீதான நேர்மறை அணுகுமுறையை பாராட்டி வருகின்றனர். மற்றொரு தரப்பினர், “திரையில் அம்மா… இன்ஸ்டாவில் கிளாமர் குயினா?” என கேள்வி எழுப்பி விமர்சனங்களையும் முன்வைத்து வருகின்றனர். விமர்சனங்களும் பாராட்டுகளும் கலந்த நிலையில், லட்சுமி வாசுதேவனின் இந்த புத்தாண்டு பதிவு தற்போது இணையத்தில் வைரலாகி பேசுபொருளாக மாறியுள்ளது.

இதற்கிடையே, கடந்த சில ஆண்டுகளுக்கு முன்பு நடிகை லட்சுமி வாசுதேவன் சந்தித்த மிகவும் கடினமான அனுபவம் மீண்டும் நினைவுகூரப்படுகிறது. அப்போது அவர் ஒரு பேட்டியில்,“எனக்கு குறுஞ்செய்தி மூலம் வந்த ஒரு லிங்கை தொட்டதும் என் மொபைல் ஹேக் செய்யப்பட்டது. அதன் பிறகு என் போனில் இருந்த புகைப்படங்கள் மார்பிங் செய்யப்பட்டன. அந்த படங்களை என் பெற்றோர் மற்றும் நண்பர்களுக்கு அனுப்புவதாக மிரட்டினார்கள்”என்று கண்கலங்கி பேசியிருந்தார். அந்த சம்பவம் ரசிகர்களிடையே பெரும் அதிர்ச்சியை ஏற்படுத்தியிருந்தது.

சின்னத்திரை, சமூக வலைதளங்கள், தனிப்பட்ட போராட்டங்கள் என பல பரிமாணங்களில் பயணித்து வரும் நடிகை லட்சுமி வாசுதேவன், தற்போது மீண்டும் தனது புத்தாண்டு பதிவின் மூலம் கவனத்தின் மையமாக மாறியுள்ளார்.