மருத்துவமனையில் தர்மேந்திராவின் தனியுரிமை மீறல்...! ரகசிய வீடியோ வைரல்…!! - ஊழியர்கள் கைது!

பாலிவுட் உலகில் தன்னிகரற்ற வரலாறு படைத்த மூத்த நடிகரும், முன்னாள் மக்களவை உறுப்பினருமான தர்மேந்திரா (89), கடந்த ஆறு தசாப்தங்களாக இந்திய சினிமாவின் ஒளி என திகழ்கிறார். சமீப நாட்களில் உடல்நிலை திடீரென மோசமானதால், மும்பையின் பிரீச் கேண்டி தனியார் மருத்துவமனையில் அவசர சிகிச்சைக்காக அவர் சேர்க்கப்பட்டார்.

சிகிச்சை முடிந்த பின், கடந்த 12 ஆம் தேதி வீடு திரும்பிய தர்மேந்திராவின் நலன் குறித்து ரசிகர்கள் ஆவலுடன் இருந்த நிலையில், அதிர்ச்சிகரமான சம்பவம் வெளிச்சத்திற்கு வந்தது.மருத்துவமனையில் படுக்கையிலிருந்த தர்மேந்திராவை, அவரின் தனியுரிமையை மீறியும், அனுமதியின்றியும், சில மருத்துவ ஊழியர்கள் ரகசியமாக வீடியோ பதிவு செய்து இணையத்தில் பரப்பினர்.

தெளிவற்ற நிலையில் எடுத்த அந்த காட்சி, சில நிமிடங்களில் வைரலாகி அவரது குடும்பத்தினரிடையே பெரும் பதற்றத்தை ஏற்படுத்தியது.இதையடுத்து விரைவாக விசாரணை ஆரம்பித்த போலீசார், தர்மேந்திராவின் வீடியோவை பதிவு செய்து பரப்பிய மருத்துவமனை ஊழியர்களை கைது செய்துள்ளனர்.

இந்த நிகழ்வு மருத்துவமனைகளில் நோயாளிகளின் தனியுரிமை பாதுகாப்பு குறித்து கடும் கேள்விகளை எழுப்பியுள்ளது.